1 Timotiyo 3
3
Ya bet na utaw na umbaꞌ taliguwan sa paggagad sa mangintu-uway
1Matinaw saba ya paglongun ini: Kun awun utaw na kaliman nan maggagad sa manga mangintu-uway, madyaw to-o ya pigkaliman nan. 2Aw ya utaw na umbaꞌ pamalli-en na ma-imoꞌ maggagaday kanilan, ya eseg na walaꞌ ya un pagsalaꞌ sa bet nan. Sambuk da ya ka͡ubayan nan. Matadeng sakanan magtagen sa pagkaliman na pagka-utawun nan aw pagbasa͡an sakanan. Aw una nan pag-anenganengen ya umbaꞌ nan imo-un. Madyaw ya dengeg nan aw magpamasa sa manga utaw na makalabaꞌ adti balay nan. Aw matadeng sakanan magpalna-u. 3Diliꞌ pala-inem sa magpakalangulangu. Diliꞌ matipanumbagay manang pagpakadyawun nan baling ya kadég na utaw. Diliꞌ mati-ayil aw diliꞌ nan pagginawa͡an ya kuwalta. 4Madyaw sakanan magdala sa ka-epedanan nan adti balay, yanagaw pagka͡agadan sakanan na mangayseꞌ nan aw pagbasa͡an nilan. 5Kay kun ya utaw diliꞌ matadeng magdala sa ka-epedanan nan dun ni kanan balay, unun nan ya pagdumala sa manga mangintu-uway sa Tyumanem? 6Aw ya eseg na pamalli-en diliꞌ galu bagu nyangintu-u pagaw magpatastas sakanan asuntu na maksay pigpamalliꞌ, aw masiling baling sakanan ni Satanas na pig-ukuman da na pa-emel-emelen asuntu sa pagpatastas nan. 7Aw yan ya pamalli-en mayu, ya eseg na pigsayaꞌ uman na manga utaw na walaꞌ pangintu-u, pada diliꞌ sakanan mulamula͡en aw diliꞌ kalitagan ni Satanas.
Ya pagpamalliꞌ sa manga dyakunu
8Maynan uman ya manga dyakunu.#3:8 Ya manga dyakunu, yan ya magtabang sa manga mangintu-uway aw sa manga imo-unun dun ni pagkatipunanan nilan. Yan ya pamalli-en mayu ya madyaw ya dengeg. Kasaligan silan dun ni kanilan tingeg. Aw diliꞌ silan pala-inem sa magpakalangulangu. Aw diliꞌ nilan pagginawa͡an ya kuwalta. 9Yan baling ya betang nilan adti kanilan anenganeng ya pigpa-edeꞌ da na Tyumanem sa pagpangintu-u kan Kristu, aw malinis ya anenganeng nilan. 10Aw ka-ilangan una talamanen kun walaꞌ ya pagsalaꞌ sa bet nilan, aw pagkatigkas yan bagu silan pamalli-en na ma-imoꞌ dyakunu. 11Aw maynan uman ya kanilan manga ka͡ubayan, madyaw ya dengeg nilan aw diliꞌ nilan pagkalaten ya dengeg na eped na utaw. Matadeng silan magtagen sa pagkaliman na pagka-utawun nilan, aw kasaligan silan dun ni kadég na imo-unun nilan.
12Ya utaw na ma-imoꞌ dyakunu, sambuk da ya kanan ka͡ubayan. Aw matadeng sakanan magdala sa mangayseꞌ nan aw ka-epedanan nan dun ni balay. 13Kay ya manga dyakunu na migpakadyaw sa pigtaligu kanilan, madyaw uman ya dengeg nilan adti eped na utaw, aw diliꞌ silan mamulamula maglong sa pagpangintu-u nilan kan Kristu Jisus.
Ya matinaw na pyangintu-uwan tadun
14Na, kay Timotiyo, awun palpa ku na maksay aku galu madtu ni tampid mu, manang pigsulat ku kanmu ya manga palna-u yeiy 15pagaw masalang pa aku, pada ka-ede-an da mu dadan kun unu ya imo-un na kadég na manga mangintu-uway na nyaka-akup dun ni kasakupan na Tyumanem na Gayed Awun. Kay kitadun ya kasakupan nan na kasiling na manga aligi aw palangad tullukanan sa katinawan. 16Aw kya-ede-an na kadég tadun na to-o madyaw ya pigbukasan da na Tyumanem sa pyangintu-uwan tadun:
Migka-utaw si Kristu aw
pigmatinaw na Ispiritu Santo na walaꞌ ya salaꞌ dun ni kanan.
Kyinitaꞌ sakanan na manga anghil.
Pig-ubat-ubat sakanan adti manga nasud.
Pyangintu-uwan da na madég na utaw,
aw nya-engat sakanan adti tas na langit.
Currently Selected:
1 Timotiyo 3: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
