1 Tésalonika 3
3
Ya pagpadala kan Timotiyo adti Tésalonika
1Walaꞌ da kami pakatagad sa utaw na un mag-ubat-ubat kanami kun manu la ya pagpakabetang mayu. Yanagaw yan ya pagbayaꞌ nami na magpatagak da kami si Silas asini syudad na Aténas 2aw si Timotiyo ya pigpakadtu nami adti kamayu. Kay si Timotiyo inulug tadun aw sugu-anen na Tyumanem na gayed uman migpa-edeꞌ sa Madyaw na Ubat-ubat kan Kristu. Pigsuguꞌ nami sakanan adti kamayu na un nan pakabagsegen ya kamayu ginawa aw pakasaligen ya kamayu pagpangintu-u, 3pada diliꞌ magkalumay ya ginawa mayu asuntu sa madég na manga kalugan. Kay kya-ede-an da mayu na dumateng saba ya manga kalugan adti manga mangintu-uway. 4Yan ya piglong nami kamayu talana pa nami adti sayid mayu na un dumateng kanaten ya manga kalugan, aw nyaka-edeꞌ kamu na nya-imoꞌ da saba yeiy. 5Yanagaw, walaꞌ da aku pakatagad pada ka-ede-an kun masalig pa ya pagpangintu-u mayu. Aw yan ya du-an na pigpakadtu ku si Timotiyo, kay nyaypeng aku kamayu pagaw makasuway kamu asuntu sa pagtandaꞌ ni Satanas aw syapadan baling ya pagud nami dun ni sayid mayu.
6Manang adun, pagdateng da ni Timotiyo lekat adti kamayu, to-o madyaw ya pig-ubat nan kanami. Pigpa-edeꞌ nan na kenneꞌ na kasalig na pagpangintu-u mayu aw ya kamayu pagginawa sa Tyumanem aw manga ka-epedanan mayu. Aw piglong nan uman na madyaw ya ginawa mayu kanami aw yan ya kaliman mayu na magkakita͡ay kitadun, kasiling na kanami na malim uman kumitaꞌ kamayu. 7Yanagaw, kay manga inulug, pangkay dakulaꞌ to-o ya kalugan aw pagti-is nami, manang migkaga͡an ya kanami ginawa kay pig-ubatan da kami sa kamayu pagpangintu-u. 8Matingen da ya ginawa nami adun kay migpadeleg kamu dun ni kamayu pagpangintu-u sa kanaten Matas na Pangulu na si Jisu-Kristu. 9Dakulaꞌ to-o ya pagpasalamat nami adti Tyumanem sa pagleya na pig-atag nan kanami asuntu kamayu. 10Gabi aw allaw nyatibulluk kami nyanawagtawag adti Tyumanem na dumateng pa ya allaw na magkakita͡ay kitadun salut pada kadugangan nami ya walaꞌ pa kalingeb adti pangintu-u mayu.
11Na, migsekat kami adti Tyumanem na kanaten Ama aw kan Jisus na kanaten Matas na Pangulu, na walaꞌ da galu ya makabalabag sa kanami paglikuꞌ dun ni kamayu. 12Aw to-o pa nan galu dugangan ya pagginawa mayu sa kamayu manga inulug na nyangintu-u aw sa kadég na utaw, kasiling na pagginawa nami kamayu. 13Kay kun yeiy ya imo-un nan, magkasalig ya pagpangintu-u mayu, aw matani la kamu adti kanaten Ama na yan ya Tyumanem. Yanagaw, walaꞌ da ya pagsalaꞌ kamayu dun ni allaw na dumateng ya kanaten Matas na Pangulu na si Jisus, eped nan ya kadég na mangintu-uway kanan.
Currently Selected:
1 Tésalonika 3: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
