1 Tésalonika 4

Ya utaw na makatutuk sa Tyumanem

1Na, kay manga inulug, pigpalna-uwan da kamu nami sa bet na makatutuk sa Tyumanem, aw pangkay adun, yeiy ya pig-imoꞌ mayu. Manang manginayuꞌ kami magi sa katundanan na pig-atag kanami na kanaten Matas na Pangulu na si Jisu-Kristu, na to-o pa kadugangan ya kadyaw na bet mayu. 2Kya-ede-an da mayu saba ya pigpalna-u nami kamayu na lekat adti kanaten Matas na Pangulu na si Jisus. 3Kay yan ya kaliman na Tyumanem na malinis ya kamayu pagka-utawun. Yanagaw, pagpakawat kamu adti kadég na punganan na malatay, labi la ya pagkasala-enen, 4aw ya tagsambuksambuk kamayu pakadyawun nan galu ya pagpangugnan na diliꞌ makasalaꞌ adti Tyumanem aw diliꞌ pagsala-en na manga utaw. 5Aw diliꞌ mayu pagdalugun ya pagkaliman na kamayu pagka-utawun kasiling na pig-imoꞌ na manga utaw na walaꞌ paka-edeꞌ sa Tyumanem, 6pada diliꞌ mayu kalakadan ya suguꞌ na Tyumanem aw diliꞌ mayu uman pakalaten ya eped mayu na nyangintu-u. Kay kun singalan ya mag-imoꞌ sa maynan na malatay, piglong da nami kamayu na pa-emel-emelen saba silan na Tyumanem. 7Kay pigtawag kitadun na Tyumanem na un mag-imoꞌ sa pagkaliman nan aw diliꞌ mag-imoꞌ sa malatay. 8Yanagaw pangkay singalan ya kumele sa palna-u yeiy, bekeꞌ nami ya tengteng pigkele͡an nan, manang kyele͡an nan baling ya Tyumanem na nyatag sa Ispiritu nan adti kamayu.

9Na, diliꞌ nami salutun ya pagpalna-u na maggaginawa͡ay ya kadég mayu na mangintu-uway, kay pigpalna-uwan da kamu na Tyumanem kun unun mayu ya pagginawa sa kamayu manga eped na mangintu-uway, 10aw pigginawa͡an da mayu saba ya kadég na mangintu-uway adti kadakulaꞌ na probinsiya na Macédoniya. Manang pigpakabagseg nami ya ginawa mayu na to-o pa mayu pakadakula-en ya kamayu paggaginawa͡ay, 11aw pagbetangan mayu sa anenganeng na awun gayed kalinaw adti kamayu, aw diliꞌ kamu magpangilabet sa manga imo-unun na eped na utaw, manang madyaw pa baling na magkaseb kamu dun ni kamayu talabahu. Alag nami yeiy pigpalna-u kamayu sa adtu pa kami ni sayid mayu, 12pada madyaw ya kamayu dengeg adti manga utaw na walaꞌ pangintu-u aw diliꞌ kamu sumalig adti eped na utaw sa kapelekan mayu.

Ya paglikuꞌ na kanaten Matas na Pangulu na si Jisu-Kristu

13Na, kay manga inulug, kaliman nami magpa-edeꞌ kamayu kun unu ya datengan na manga mangintu-uway na nyatay da, pada diliꞌ to-o magkalat ya ginawa mayu kasiling na manga utaw na walaꞌ ya imanen nilan. 14Kay pyangintu-uwan tadun na pangkay nyatay si Jisus manang nyataw sakanan, aw yeiy saba ya indeganan sa pagpangintu-u tadun na matawun na Tyumanem ya manga mangintu-uway lekat adti pagkamatay aw pa-agad nan silan. 15Kay yan saba ya piglong ni Jisus idtu muna, na kitadun na utaw pa dun ni paglikuꞌ nan, diliꞌ kitadun muna sa manga mangintu-uway na nyatay da. 16Kay manog ya kanaten Matas na Pangulu na si Jisus lekat adti tas na langit na ka-epedan na dakulaꞌ na tingeg na migsuguꞌ, aw ya tatawag na kapitan na manga anghil, aw ya uni na trumpita na Tyumanem. Aw ya manga mangintu-uway na nyatay da, muna silan matawun. 17Pagkatigkas yan, magdengan ya kadég tadun na mangintu-uway ma-engat, dala ya bagu nyataw aw kitadun uman na utaw pa. Aw dun ni dalem na langit kitadun pagkitaꞌ si Jisus aw magad kitadun kanan aw meyaꞌ adti sayid nan na walaꞌ ya tyamanan. 18Yanagaw, magi sa piglong nami, pakabagsega ya ginawa na tagsambuksambuk kamayu.

Currently Selected:

1 Tésalonika 4: klgv

Highlight

Copy

Compare