1 Tésalonika 2
2
Ya manga imo-unun ni Pablo adti Tésalonika
1Na, kay manga inulug, kya-ede-an mayu na walaꞌ kasapad ya kanami pagkadtu dun ni kamayu. 2Pangkay sa walaꞌ pa kami adti kamayu, dadan da kami pigmulamula aw pigpamulayaman adti syudad na Pilipos. Aw pangkay awun dakulaꞌ na pag-ampang kanami dun ni kamayu banwa, manang pigpakabagseg na Tyumanem ya kanami ginawa sa pagpa-edeꞌ kamayu sa Madyaw na Ubat-ubat na lekat adti Tyumanem. 3Aw dun ni kanami pag-ubat-ubat, bekeꞌ na tud nami ya pagpalna-u sa baluk, aw walaꞌ kami pag-imoꞌ sa malatay, aw walaꞌ saba nami akali ya manga utaw. 4Kyapulba͡an da saba kami na Tyumanem, yanagaw pigtaligu nan kanami ya pagpa-edeꞌ sa Madyaw na Ubat-ubat kan Kristu. Aw bekeꞌ na tud nami na katutukan ya manga utaw, manang yan baling ya pagkaliman nami na katutukan ya Tyumanem, aw yan oloꞌ ya nyaka-edeꞌ sa kanami anenganeng. 5Aw kya-ede-an mayu na walaꞌ nami bulakbulaki ya kanami palna-u pada magagad kamu, aw walaꞌ ya pigtaguꞌ nami na malat na tud pada manguwalta kamayu. Ya Tyumanem yan ya magmatinaw. 6Aw walaꞌ kami pagtagad na deyen mayu kami aw deyen na eped na utaw, 7pangkay apostolés kami ni Kristu na umbaꞌ galu basa͡an. Manang pigpakatas nami ya kanami pasinsiya adti kamayu kasiling na ina na migkalmukan sa iseꞌ nan. 8Aw asuntu sa pagginawa nami kamayu, migleya kami migpa-edeꞌ adti kamayu sa Madyaw na Ubat-ubat na lekat adti Tyumanem, aw bekeꞌ nan oloꞌ, manang walaꞌ nami uman demetan adti kamayu ya kanami pagka-utawun, kay to-o kamu nami pigginawa͡an. 9Kya-anenganengan gya mayu, kay manga inulug, ya kadakulaꞌ na pagud nami dun ni sayid mayu. Walaꞌ kami salig kamayu sa kapelekan nami, manang migtalabahu kami gabi aw allaw pada diliꞌ kabegatan ya pangkay singalan kamayu talana nami migpa-edeꞌ adti kamayu sa Madyaw na Ubat-ubat. 10Makamatinaw kamu aw ya Tyumanem na migpakawat kami adti kadég na punganan na malatay, aw dyalug nami ya pagkaliman nan, aw ya bet nami walaꞌ ya pagsalaꞌ adti kadég mayu na mangintu-uway. 11Kya-ede-an mayu ya kanami pagdala sa tagsambuksambuk kamayu na kasiling na ama adti manga mangayseꞌ nan, 12kay gayed nami pigpakabagseg ya ginawa mayu pada makapadeleg kamu sa kamayu pagpangintu-u, aw gayed kamu nami pigtulada-an kun unu ya umbaꞌ imo-un na utaw pada katutukan ya Tyumanem kanan. Kay ya Tyumanem yan ya migtawag kamayu na un makasambuk adti kanan kadyawan aw adti Kasakupan na Pighari-an nan.
13Yan uman ya du-an na gayed nami pigpasalamatan ya Tyumanem, kay sa pagdengeg mayu sa kanan tingeg na pigpalna-u nami, pigdawat mayu, kay kya-ede-an mayu na walaꞌ lekat adti utaw manang tengteng saba lyumekat adti Tyumanem. Aw ya kanan tingeg yan ya mag-uman sa anenganeng mayu na nyangintu-u la. 14Aw dyengeg nami, kay manga inulug, na asuntu sa pagpangintu-u mayu pigpamulayaman kamu baling na manga eped mayu dun ni kamayu banwa. Aw yanagaw, nyasiling kamu na manga mangintu-uway sa Tyumanem adti probinsiya na Judiya na nyakasambuk da kan Jisu-Kristu, kay pyamulayaman silan uman na manga eped nilan na Judiyu. 15Ya manga utaw na Judiyu, silan ya migpatay sa manga propita, aw pangkay si Jisus na kanaten Matas na Pangulu, pigpapatay nilan uman. Aw ya eped kanilan mig-alilin kanami adti syudad mayu. Walaꞌ silan pakatutuk sa Tyumanem, aw kasiling silan na po-on na kadég na utaw, 16kay gayed nilan pig-ampangan ya pagpa-edeꞌ nami adti manga Héntil sa Madyaw na Ubat-ubat kan Kristu na yan ya makapaluwaꞌ kanilan. Aw magi sa kanilan pigpan-imoꞌ, gayed baling nilan pigdugangan ya manga salaꞌ nilan adti Tyumanem. Aw pig-ukuman da nan silan na pa-emel-emelen kagaya adti kamoliyan na allaw.
Ya kalim ni Pablo lumikuꞌ adti syudad na Tésalonika
17Na, kay manga inulug, pangkay bagu pa kami lekat adti kamayu, manang kaliman nami na magkakita͡ay kitadun uman salut. Mig-iyawat kitadun manang kenneꞌ mayu awun ni anenganeng nami. Aw pigtibagsegan nami ya makalikuꞌ adti kamayu. 18Yan galu ya kaliman nami, manang gayed ni Satanas pig-ampangan ya palpa nami. Labi la aku si Pablo, kay malikit da aku migtagilan sa paglikuꞌ ku adti sayid mayu. 19Aw yan ya du-an na lumikuꞌ kami dun, kay kamu ya magpakabagseg sa pag-iman nami, aw to-o dakulaꞌ ya kanami pagleya. Aw adti moli na allaw sa paglikuꞌ ni Jisus na kanaten Matas na Pangulu, kamu ya palibantug nami adti asdangan nan. 20Kay kamu saba ya kanami pagleya͡an aw ya du-an na makapalibantug kami.
Currently Selected:
1 Tésalonika 2: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
