1 Pédro 5

Ya palna-u adti manga maggagaday sa manga mangintu-uway

1Kamu na manga maggagaday sa manga mangintu-uway, awun palna-u ku kamayu asuntu na maggagaday aku uman sa manga mangintu-uway aw sambuk na kyumitaꞌ sa pagti-is ni Kristu aw makasambuk uman sa kadyawan na Tyumanem na un pa bukasan adti kamoliyan na allaw. 2Yanagaw nyanginayuꞌ aku adti kamayu na manga maggagaday na pakadyawun mayu ya pagdala sa manga mangintu-uway na pigtaligu kamayu na Tyumanem, kasiling na pagdiyaga na magdadiyaga͡ay sa manga karniro. Aw diliꞌ na kyalegesan kamu, manang pagleya kamu tumabang kanilan asuntu na yan ya pagkaliman na Tyumanem aw bekeꞌ oloꞌ na tyumagad kamu sa tandan kamayu. 3Aw diliꞌ kamu magpatastas adti manga mangintu-uway na pigtaligu kamayu. Ma-imoꞌ kamu baling madyaw na pundinganan adti kanilan. 4Yanagaw, sa pagdateng ni Jisu-Kristu na Matas na Magdadiyaga͡ay, madawat mayu ya korona na to-o madyaw na diliꞌ magkalanes aw diliꞌ maglubad.#5:4 Dun ni manga allaw ni Pédro, awun dakulaꞌ na pag-abay aw manga eped na danga͡enen na to-o dengganen. Aw yan ya palangad tandan sa utaw na nyanalu, ya manga dawun na pig-imoꞌ korona.

5Aw kamu uman na bagu pa ya ginawa, pagka͡agadan mayu ya kamayu manga maggagaday. Aw ya kadég mayu na nyangintu-u, magpadalem ya tagsambuksambuk adti eped mayu. Kay awun pigpasulat na Tyumanem: “Balabagan na Tyumanem ya utaw na magpatastas, manang kallatan nan ya utaw na magpadalem.”#5:5 Mabasa adti Probirbiyo 3:34 aw Santiago 4:6. 6Yanagaw pagpadalem kamu adti asdangan na Tyumanem na To-o Matulus. Kay kun imo-un mayu yeiy, dumateng ya allaw na patasen kamu nan. 7Tumbayan mayu adti kanan ya kadég na kamayu kakaypengan kay yan saba ya gayed migdiyaga kamayu.

8Magpakatadeng kamu. Aw magpakatanaw kamu kay gayed dyumaliket ya po-on mayu na si Satanas, kasiling na liyon na mig-agumu na nyaninaw sa un nan sakgawun. 9Manang diliꞌ mayu pagtumbay na degen kamu nan. Pakasaliga mayu baling ya kamayu pagpangintu-u kan Kristu. Aw diliꞌ mayu pagkalingawan na ya manga eped mayu na mangintu-uway adti kadakulaꞌ na banwa, nyaka-agi uman silan sa pagti-is kasiling na kya-agiyan mayu. 10Aw pagkatigkas na pagti-is mayu sa manga kalugan na nyaka-agi oloꞌ, pakadyawun kamu na Tyumanem. Lingeben nan ya kamayu pagpangintu-u, aw pakabagsegen kamu nan aw betang adti tullukanan na to-o masalig. Kay ya Tyumanem, yan ya lyekatan sa kadég na grasya, aw yan uman ya migtawag kamayu pada makasambuk kamu adti kan Kristu dun ni kadakulaꞌ na kadyawan na pagka Tyumanem nan na walaꞌ ya tyamanan. 11Kanan saba ya pagdumala sa kadég na walaꞌ ya tyamanan. Amén.

Ya pagpangumusta

12Ya sulat ini diliꞌ to-o matas, aw sa pagsulat ku seiy pigtabangan aku ni Silas na yan ya sambuk na inulug tadun na to-o kasaligan. Aw asini sulat ini, pigpakabagseg ta kamu pada magkasalig ya kamayu pagpangintu-u. Aw pigmatinaw ku ya grasya na Tyumanem adi kanaten. Yanagaw, tibagsegi mayu na diliꞌ mayu luwatan ya kanan kallat.

13Nyangumusta kamayu ya manga mangintu-uway na migpangkatipun asini syudad na pigtawag ku na Babiloniya.#5:13 Asini sulat ni Pédro, pigtawag nan ya syudad na Roma na “Babiloniya.” Pigpamalliꞌ saba silan uman na Tyumanem kasiling mayu. Aw nyangumusta uman kamayu si Markos na eped ku idi na pigsiling ku na tengteng kanak iseꞌ.

14Aw kamu uman na mangintu-uway, alag kamu pagpangumusta͡ay asuntu sa kamayu paggaginawa͡ay. Aw magad ya kalinaw dun ni kadég mayu na nyakasambuk da kan Kristu.

Currently Selected:

1 Pédro 5: klgv

Highlight

Copy

Compare