2 Pédro 1
1
1Aku si Simon Pédro na sugu-anen ni Jisu-Kristu aw kanan apostol.
Migsulat aku adti kadég mayu kasiling nami na awun da pagpangintu-u magi sa matinaw na pagbayaꞌ na kanaten Tyumanem aw Magpaluwa-ay na si Jisu-Kristu, kay walaꞌ saba ya pigkibang nan.
2To-o pa galu kadugangan adti kamayu ya kanan grasya aw kalinaw, asuntu sa pagka-edeꞌ mayu sa Tyumanem aw ya pagka-edeꞌ mayu uman kan Jisus na kanaten Matas na Pangulu.
Ya bet na utaw na nyakasambuk dun ni Tyumanem
3Umbaꞌ ya pig-atag kanaten na katulus na Tyumanem pada madalug tadun ya bet nan na walaꞌ ya pagsalaꞌ, magi dun ni pagka-edeꞌ tadun kanan. Pigtawag kitadun nan pada makasambuk dun ni kadyawan nan na walaꞌ ya maka-unawa. 4Aw magi sa kadég yeiy, awun manga pigpakang nan kanaten na dakulaꞌ ya alagaꞌ aw to-o madyaw. Aw asuntu sa manga pakang nan, nyakaluwaꞌ kitadun lekat adti pag-allang na manga salaꞌ aw pagkaliman na pagka-utawun tadun asini tas na lupaꞌ, aw makasambuk kitadun dun ni kadyaw na Tyumanem. 5Aw asuntu seiy, to-o mayu tibagsegi na kadugangan ya pagpangintu-u mayu sa madyaw na bet. Aw adti kamayu madyaw na bet, dugangan pa uman ya katadeng na lekat adti Tyumanem kun unu ya madyaw imo-un dun ni kanaten pag-eyaꞌ. 6Aw dugangan pa mayu uman ya pagtagen sa pagkaliman na pagka-utawun mayu. Aw dugangan pa mayu uman na mabatug mayu ti-isen ya manga kalugan. Aw dun ni kamayu pagti-is, dugangan mayu ya pagdalug sa bet na Tyumanem. 7Aw adti pagdalug mayu sa bet na Tyumanem, dugangan uman ya pagkallat sa manga eped, aw adti pagkallat kanilan dugangan pa mayu uman ya pagginawa sa kadég. 8Kay kun ya kadég yeiy awun alag ni kamayu aw to-o pa magkadakulaꞌ adti anenganeng mayu, yeiy alag ya magpakawat kamayu lekat adti pagkataka, aw mamunga la kamu asuntu na kya-ede-an da mayu ya kanaten Matas na Pangulu na si Jisu-Kristu. 9Manang pangkay singalan utawa na walaꞌ dun ni kanan ya kadég yeiy, kasiling sakanan na utaw na migdellaman ya pag-inunu nan. Kay kyalingawan nan na kyalinisan da sakanan na Tyumanem lekat adti manga salaꞌ nan idtu muna.
10Yanagaw, kay manga inulug ku na nyangintu-u kan Kristu, to-o mayu tibagsegi ya kadég yeiy pada ka-ede-an na pigtawag da kamu na Tyumanem aw pigpamalliꞌ da nan. Kun dalugun mayu ya palna-u yeiy, diliꞌ kamu makasuway. 11Aw dumateng ya allaw na dayaw kamayu uwangan ya tatakep adti tas na langit, aw dawaten kamu dun ni kasakupan na pighari-an na kanaten Matas na Pangulu na si Jisu-Kristu na yan ya Magpaluwa-ay tadun. Aw walaꞌ ya tyamanan na kanan pagdumala.
Ya pagpa-anenganeng ni Pédro kanilan sa pigpalna-u nan
12Yanagaw gayed ku pa-anenganeng kamayu ya kadég yeiy pangkay pigka-ede-an da mayu aw to-o la kamu dyumalid dun ni pagdalug sa matinaw. 13Adi kanak, madyaw pa kun pa-anenganeng ku kamayu talana na utaw pa aku. 14Kay kya-ede-an ku na diliꞌ da madugay ya pag-eyaꞌ ku asini tas na lupaꞌ. Pigpa-edeꞌ da kanaken dadan na Matas na Pangulu tadun na si Jisu-Kristu. 15Yanagaw to-o ku pigtibagsegan ya pagpa-edeꞌ kamayu, kay ya kaliman ku na kun dumateng ya allaw na walaꞌ da aku asini sayid mayu, gayed mayu ka-anenganengan ya kadég na pigpalna-u ku kamayu.
16Kami na manga apostolés migpa-edeꞌ kamayu sa katulus na Matas na Pangulu tadun na si Jisu-Kristu aw ya paglikuꞌ nan asini tas na lupaꞌ. Aw bekeꞌ yeiy na pig-imo-imoꞌ nami, kay kyinitaꞌ nami ya kadyawan na pagka Tyumanem nan. 17-18Nyaka-iyeped kami saba kanan adti tas na buntud na dun patasa na Tyumanem ya dengeg na Iseꞌ nan, aw pigpakitaꞌ kanami ya kalalamdag na katulus na pagka Tyumanem ni Jisus na to-o syumiga. Aw awun pigdengeg nami na tingeg lekat adti Ama na yan ya Tyumanem na To-o Matulus, law nan: “Ini ya kanak Iseꞌ na to-o ku pigginawa͡an aw kyatutukan aku kanan.”#1:17-18 Mabasa adti Matiyo 17:5.
19Aw asuntu seiy to-o pa kyadugangan ya kanami pagsalig na tengteng matinaw ya pigpalna-u na manga propita. Yanagaw dayaw mayu pakanyegi ya palna-u nilan. Ya manga pigsulat nilan kasiling na saleng na nyaka-ilaw sa mangitngit mendaꞌ sa pakallawunun na kita-en ya bitun na to-o nyinag. Aw dun ni allaw yan, ka-ilawan ya kamayu anenganeng kay un mayu kita-en ya kalalamdag na yan si Jisu-Kristu.
20Madyaw kun to-o mayu kalabetan ya ini: Ya kadég na pigsulat na manga propita walaꞌ lekat adti kanilan anenganeng. 21Kay bekeꞌ na kana utaw pagbayaꞌ ya piglong aw pigsulat nilan. Tyumanem saba ya miglong magi kanilan kay ya kanan Ispiritu yan ya miggagad sa piglong nilan.
Currently Selected:
2 Pédro 1: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
