1 Pédro 4

Ya bagu na pagka-utawun

1Asuntu na migti-is si Kristu dun ni kanan lawas, yanagaw tagilana uman ya kamayu pagka-utawun sa pangkay unu na pagti-is na dumateng kamayu. Kay ya utaw na migti-is asuntu na pigdalug nan ya Tyumanem, tyumeneng da sakanan sa pagpakasalaꞌ. 2Yanagaw talana pa nan asini tas na lupaꞌ, diliꞌ da nan pagdalugun ya pagkaliman na pagka-utawun nan, manang yan baling ya dalugun nan ya pagkaliman na Tyumanem. 3Umbaꞌ da ya manga allaw idtu na mig-imoꞌ kamu sa kasiling na pigpan-imoꞌ na manga utaw na walaꞌ pangintu-u sa Tyumanem. Idtu muna, pigdalug mayu ya to-o malatay na imo-unun, aw gayed mayu pigka͡agadan ya pagkaliman na pagka-utawun mayu, aw pala-inem kamu sa magpakalangulangu. Pigtipun mayu ya manga ubaybay aw pigpasungkuꞌ mayu ya nyinem aw kyuman. Migkasala-enen kamu adti pangkay singalan aw pig-imoꞌ mayu ya makamulamula͡ay kay pigsimba mayu ya manga tyumanem mayu na galuꞌ.

4Manang adun nyabelengbeleng ya manga pig-iyeped mayu idtu muna kay walaꞌ da kamu agad kanilan dun ni malat na pigpan-imoꞌ nilan. Aw yanagaw miglong silan sa malatay adti kamayu. 5Manang dakulaꞌ ya tubagenen nilan adti Tyumanem, kay yan ya mag-ukum sa kadég na utaw pangkay utaw pa aw ya nyangkamatay da. 6Sa walaꞌ pa kamatay ya manga utaw, pigpa-edeꞌ da dadan silan sa Madyaw na Ubat-ubat, pada pagkatigkas na pag-ukum sa manga utaw sa pig-imoꞌ nilan asini tas na lupaꞌ, ya kalaluwa nilan meyaꞌ adti sayid na Tyumanem.

7Na, malapit da ya katigkasan na kadakulaꞌ. Yanagaw pakadyawa ya pagdala mayu sa kamayu anenganeng, pada matibulluk ya kamayu pagpanawagtawag adti kanan. 8Aw yan ya to-o mayu tibagsegi ya paggaginawa͡ay. Kay kun to-o tadun pigginawa͡an ya kanaten manga eped, pasinsiya͡an tadun sa pig-imoꞌ nilan kanaten na malatay. 9Aw pagbabasa͡ay kamu na walaꞌ ya pagkele.

10Anenganenga na ya tagsambuksambuk kanaten pig-atagan da na Tyumanem sa katadeng magi sa kallat nan. Gamiten tadun ya pig-atag nan pada ka-untungan ya kanaten eped aw dun kita-a na kasaligan kitadun. 11Kun pig-atag na Tyumanem kanmu ya pag-ubat-ubat dun ni katipun mayu, yan ya ubat-ubatan ya kanan tengteng tingeg. Kun ya pig-atag nan kanmu ya pagtabang sa manga eped, tabangi silan magi sa kadakulaꞌ na kabagseg na pig-atag na Tyumanem kanmu. Ya kadég yeiy imo-a mayu pada madeyen ya Tyumanem magi kan Jisu-Kristu. Dun ni kanan ya katulus aw pagdumala na walaꞌ ya tyamanan. Amén.

Ya pagpamulayam asuntu sa pagpangintu-u kan Kristu

12Kay manga inulug ku na kanak pigginawa͡an, diliꞌ kamu magkegaꞌ kun awun manga pagpamulayam na dumateng kamayu, kay tanda-en saba ya kamayu pagpangintu-u. Diliꞌ kamu maglong, “Anangaꞌ yeiy ma-imoꞌ kanakeꞌ?” 13Manang pagleya kamu baling kay nyakasambuk da kamu sa manga pagti-is ni Kristu pada dakulaꞌ pa ya pagleya mayu adti allaw na bukasan da ya kadyawan na pagka Tyumanem nan. 14Kun mulamula͡en kamu aw kalaten ya kamayu dengeg asuntu sa pagpangintu-u mayu kan Kristu, madyaw ya kamayu kay nyeyaꞌ dun ni seled mayu ya Ispiritu Santo na to-o matulus. 15Aw kun pamulayaman kamu, bekeꞌ galu na asuntu na nyakapatay kamu sa utaw, aw bekeꞌ uman na tyumakaw, aw bekeꞌ uman na lyumakad sa bala-ud, aw bekeꞌ uman na nyangilabet kamu sa pag-eyaꞌ na eped na utaw. 16Manang kun pyamulayaman kamu asuntu sa pagpangintu-u mayu kan Kristu, diliꞌ mayu yan pagkamulamula͡an manang deyenan aw pasalamati mayu baling ya Tyumanem asuntu na ya ngalan ni Kristu awun da ni kamayu. 17Kay dyumateng da ya allaw na migpalekat da ya pag-ukum na Tyumanem, aw migpalekat adi kanaten na manga kasakupan nan. Aw kun migpalekat adi kanaten na kanan manga utaw, na, unu kaꞌ ya un datengan na manga utaw na walaꞌ dalug sa Madyaw na Ubat-ubat na lekat adti Tyumanem? 18Kasiling na pigpasulat nan: “Kun malug paluwa-en ya manga utaw na dyumalug sa pagkaliman na Tyumanem, unu pa kaꞌ ya un datengan na manga makasasalaꞌ aw ya walaꞌ dalug kanan?”#4:18 Mabasa adti Probirbiyo 11:31.

19Yanagaw kun migti-is kamu adun asuntu na mig-imoꞌ kamu sa makatutuk sa Tyumanem, padelega mayu ya pag-imoꞌ sa pagkaliman nan. Aw tumbayan mayu adti kanan ya kamayu pagka-utawun, kay yan ya mig-imoꞌ kamayu, aw diliꞌ kamu nan pabaya-an.

Currently Selected:

1 Pédro 4: klgv

Highlight

Copy

Compare