Popular Bible Verses from 1 Pédro 4

Share

Aw yan ya to-o mayu tibagsegi ya paggaginawa͡ay. Kay kun to-o tadun pigginawa͡an ya kanaten manga eped, pasinsiya͡an tadun sa pig-imoꞌ nilan kanaten na malatay.

Anenganenga na ya tagsambuksambuk kanaten pig-atagan da na Tyumanem sa katadeng magi sa kallat nan. Gamiten tadun ya pig-atag nan pada ka-untungan ya kanaten eped aw dun kita-a na kasaligan kitadun.

Kun pig-atag na Tyumanem kanmu ya pag-ubat-ubat dun ni katipun mayu, yan ya ubat-ubatan ya kanan tengteng tingeg. Kun ya pig-atag nan kanmu ya pagtabang sa manga eped, tabangi silan magi sa kadakulaꞌ na kabagseg na pig-atag na Tyumanem kanmu. Ya kadég yeiy imo-a mayu pada madeyen ya Tyumanem magi kan Jisu-Kristu. Dun ni kanan ya katulus aw pagdumala na walaꞌ ya tyamanan. Amén.

Manang kun pyamulayaman kamu asuntu sa pagpangintu-u mayu kan Kristu, diliꞌ mayu yan pagkamulamula͡an manang deyenan aw pasalamati mayu baling ya Tyumanem asuntu na ya ngalan ni Kristu awun da ni kamayu.

Na, malapit da ya katigkasan na kadakulaꞌ. Yanagaw pakadyawa ya pagdala mayu sa kamayu anenganeng, pada matibulluk ya kamayu pagpanawagtawag adti kanan.

Kay manga inulug ku na kanak pigginawa͡an, diliꞌ kamu magkegaꞌ kun awun manga pagpamulayam na dumateng kamayu, kay tanda-en saba ya kamayu pagpangintu-u. Diliꞌ kamu maglong, “Anangaꞌ yeiy ma-imoꞌ kanakeꞌ?” Manang pagleya kamu baling kay nyakasambuk da kamu sa manga pagti-is ni Kristu pada dakulaꞌ pa ya pagleya mayu adti allaw na bukasan da ya kadyawan na pagka Tyumanem nan.

Aw pagbabasa͡ay kamu na walaꞌ ya pagkele.

Yanagaw kun migti-is kamu adun asuntu na mig-imoꞌ kamu sa makatutuk sa Tyumanem, padelega mayu ya pag-imoꞌ sa pagkaliman nan. Aw tumbayan mayu adti kanan ya kamayu pagka-utawun, kay yan ya mig-imoꞌ kamayu, aw diliꞌ kamu nan pabaya-an.

Asuntu na migti-is si Kristu dun ni kanan lawas, yanagaw tagilana uman ya kamayu pagka-utawun sa pangkay unu na pagti-is na dumateng kamayu. Kay ya utaw na migti-is asuntu na pigdalug nan ya Tyumanem, tyumeneng da sakanan sa pagpakasalaꞌ. Yanagaw talana pa nan asini tas na lupaꞌ, diliꞌ da nan pagdalugun ya pagkaliman na pagka-utawun nan, manang yan baling ya dalugun nan ya pagkaliman na Tyumanem.

Kun mulamula͡en kamu aw kalaten ya kamayu dengeg asuntu sa pagpangintu-u mayu kan Kristu, madyaw ya kamayu kay nyeyaꞌ dun ni seled mayu ya Ispiritu Santo na to-o matulus.