1 Corinto 4

Ya manga imo-unun na manga apostolés aw manga pigti-isan nilan

1Yanagaw, anenganenga mayu na kami si Apolos aw si Pédro oloꞌ sugu-anen ni Kristu, aw pigtaliguwan kami na Tyumanem na magpa-edeꞌ adti kamayu sa manga pigtaguꞌ nan asini muna. 2Aw ya utaw na pigtaliguwan, ka-ilangan na pakitaꞌ nan adti kanan amu na kasaligan sakanan. 3Manang diliꞌ aku mallek kun unu ya anenganeng mayu kanak, pangkay kun dala͡en aku mayu adti asdangan na mag-ukumay. Aw diliꞌ aku uman maka-ukum sa kanak pagka-utawun. 4Kay walaꞌ ya kya-ede-an ku na un pagsalaꞌ kanak, manang diliꞌ aku makapaglong na walaꞌ ya kanak salaꞌ. Ya kanaten Matas na Pangulu, yan oloꞌ ya mag-ukum kanak. 5Yanagaw, sa walaꞌ pa dateng ya allaw na pigpamalliꞌ da na Tyumanem, diliꞌ kamu mag-ukum sa eped mayu. Tagadi mayu baling ya paglikuꞌ na kanaten Matas na Pangulu. Aw dun da nan bukasi ya kadég na pigtaguꞌ dun ni anenganeng na manga utaw. Aw dun ni allaw yan, ya tagsambuksambuk na utaw un sayaꞌ na Tyumanem sa umbaꞌ kanan.

6Sa pagpalna-u ku yeiy, kay manga inulug, pigpundinganan ku ya kanak pagka-utawun aw si Apolos, pada kapalna-uwan kamu na diliꞌ mayu pagdugangan ya pigpasulat na Tyumanem. Daluga mayu ya pigpasulat nan, pada diliꞌ mayu palibantug ya sambuk na to-o sakanan matas kay sa eped. 7Singalan ya miglong kamayu na madyaw pa kamu sa kamayu eped? Unu kaꞌ ya awun ni kamayu na walaꞌ lekat adti Tyumanem? Aw kun alag yan lekat adti kanan, anangaꞌ kamu magpalibantug kasiling na kamu ya tagtun?

8Iman mayu aw nyatagtun da mayu ya kadég kay mayaman da kamu aw iman mu aw hariꞌ da kamu! Manang kami na manga apostolés, pig-ayawan da mayu baling na walaꞌ da ya dengeg. Na! Pagkahariꞌ da kamu pada maka-iyeped da kami kamayu magdumala! 9Kay adi kanak anenganeng, kami na manga apostolés pigbetang na Tyumanem adti moli na kadég. Kasiling kami na manga utaw na patayenen da na pigpaketleg adti asdangan na kadég na utaw. Aw pigbantayan na manga anghil ya kadég yeiy. 10Asuntu na si Kristu ya kanami pigpalna-u, maglong ya madég na utaw na walaꞌ kunu ya katadeng nami. Manang kamu mig-anenganeng na to-o kamu matadeng kay nyakasambuk da kamu kan Kristu. Aw maglong uman ya manga utaw na tagbiꞌ kunu ya kanami katundanan. Manang kamu mig-anenganeng na dakulaꞌ ya kamayu katundanan! Aw pigbasa͡an kamu na manga utaw, manang ya kanami, walaꞌ kami baling nilan basabasayi. 11Pangkay adun, nyagetem kami aw pigtalaynem, aw to-o la dadan ya kadégkadég nami. Byadasan kami na sumbag, aw walaꞌ ya balay na un nami kabantukan. 12Migtibagseg kami migtalabahu pada awun pagkamangan nami. Aw sa pagsupla kanami na manga utaw, pigpakadyaw nami ya kanami pagtubag kanilan. Aw pigti-is nami uman ya pagpamulayam nilan kanami. 13Pangkay pigtanemtaneman kami na malat, tyubag nami silan na madyaw. Aw mendaꞌ adun, adti anenganeng na manga utaw na walaꞌ pangintu-u, walaꞌ ya ma-untung kanami, aw kasiling kami na daget na to-o malipaꞌ na pigsalabel da.

Si Pablo kasiling na ama na manga mangintu-uway

14Na, walaꞌ aku pagsulat kamayu pada mulamula͡en ta kamu. Bekeꞌ yan na tud ku. Manang kaliman ku na kapalna-uwan kamu, kay pigsiling ku kamu na kanak mangayseꞌ na pigginawa͡an. 15Kay pangkay pa pilammalalan ya magpalna-uway kamayu, manang aku ya nya-imoꞌ kasiling na ama mayu kay magi kanak nyakadengeg kamu sa Madyaw na Ubat-ubat kan Kristu. Aw ya pagpalna-u ku kamayu kasiling na pagpalna-u na ama adti iseꞌ nan. 16Yanagaw nyanginayuꞌ aku kamayu na silingan aku mayu. 17Yeiy ya du-an na pigpakawun ku si Timotiyo dun ni kamayu. Si Timotiyo ya palangad iseꞌ ku na pigginawa͡an asuntu sa pagpangintu-u nami sa Matas na Pangulu tadun, aw kasaligan sakanan. Pa-anenganeng nan kamayu kun pig-unu ku ya pagdalug kan Kristu, kay pigpalna-u ku adti kadég na manga mangintu-uway pangkay ayin na banwa na silingan nilan ya pagdalug ku kan Kristu.

18Na, awun eped dun ni kamayu na migpalibantug kay iman nilan aw diliꞌ da aku makakawun dun ni kamayu na un magsagda kanilan. 19Manang kun tumbay na kanaten Matas na Pangulu, maksay aku mawun. Aw tanawun ku kun tengteng na matinaw na awun ni kanilan ya katulus na Tyumanem aw kun oloꞌ silan baling migpalibantug. 20Kay kun tengteng na nyaka-akup da kitadun adti Kasakupan na Pighari-an na Tyumanem, ka-ede-an yeiy diliꞌ oloꞌ dun ni tingeg tadun, manang pagkita-en adti kanaten ya katulus na Tyumanem. 21Na, unu ya kaliman mayu? Kun diliꞌ mayu umanen ya anenganeng mayu, kawunan ta kamu aw pa-emel-emelen. Manang kun ma-uman ya anenganeng mayu, pakadyawun ta kamu aw pakitaꞌ ku kamayu na to-o ta kamu pigginawa͡an.

Currently Selected:

1 Corinto 4: klgv

Highlight

Copy

Compare