1 Corinto 5

Ya pag-alilin sa mangintu-uway na mig-imoꞌ sa malatay

1Na, pig-ubatan aku na awun kunu sambuk na eseg adti kamayu na pig-ipidan nan ya kadwa na ka͡ubayan na ama nan. Ya pig-imoꞌ nan yeiy to-o malatay, aw pangkay ya manga Héntil na walaꞌ pangintu-u, walaꞌ nilan imo-a ya maynan! 2Aw migpalibantug kamu pangkay awun utaw na mig-imoꞌ sa maynan dun ni kamayu. Anangaꞌ diliꞌ magkalat ya ginawa mayu? Alilini mayu saba ya utaw yan lekat dun ni katipun mayu. 3Pangkay walaꞌ da aku dun ni kamayu adun, manang gayed ta kamu kya-anenganengan aw kasiling na awun aku ni sayid mayu na mig-ukum sa utaw yan. 4Yanagaw salut mayu magkatipun dun ni ngalan na kanaten Matas na Pangulu na si Jisu-Kristu, silinga mayu na awun aku ni sayid mayu eped na katulus nan, 5aw tumbayan da mayu adti kan Satanas ya utaw yan na un kalaten ya lawas nan, pada ya ispiritu na utaw yan paluwa-en na Tyumanem dun ni allaw na paglikuꞌ na Matas na Pangulu tadun.

6Diliꞌ saba madyaw na magpalibantug kamu. Unu, walaꞌ mayu ka-ede-i na kun pigdaliꞌ ya tagbiꞌ na patulinay adti harina, diliꞌ madugay tumulin ya kadakulaꞌ na harina na pigmasa? 7Yanagaw, ayawi mayu ya bet na malatay na kasiling na patulinay,#5:7-8 Adti pagtagilan na manga Judiyu sa Pista na Paglabay na Anghil na Tyumanem, pagkamangen nilan adti seled na balay ya kadakulaꞌ na patulinay aw to-o nilan paglinisan ya balay pada makamang da dun ya patulinay. Mabasa adti Éxudo 12:1-20. pada magkalinis kamu. Kun imo-un mayu yeiy, masiling kamu na bagu na pan na pig-imoꞌ na walaꞌ dali-i na patulinay. Kay pigdugsuꞌ saba si Kristu pada paluwa-en kitadun lekat adti pag-allang na salaꞌ, kasiling na manga nati na karniro na pigdugsuꞌ na manga Judiyu asini muna dun ni allaw na lyumabay ya anghil na Tyumanem. 8Dun ni Pista na Paglabay na Anghil na Tyumanem, pagka-anenganengan na manga Judiyu ya pagpaluwaꞌ kanilan na Tyumanem dun ni pag-allang kanilan adti banwa na Ihiptu. Maynan uman, naten anenganengen ya pagpaluwaꞌ na Tyumanem kanaten lekat adti pag-allang na salaꞌ, aw pagbetangan mayu sa ginawa na diliꞌ kamu katapunan na malatay. Imo-a mayu ya madyaw aw paglongan mayu ya matinaw.

9Dun ni sulat na pigpadala ku kamayu idtu muna, miglong aku na diliꞌ kamu magpa-iyeped sa manga utaw na migkasala-enen. 10Ya pigpalabet ku bekeꞌ na manga utaw na walaꞌ pangintu-u sa Tyumanem. Pigdalug pa nilan ya asini tas na lupaꞌ aw mig-imoꞌ sa malatay kasiling na magkasala-enen, aw magkaybeg sa pangkay unu na bekeꞌ na kanilan, aw matilimbungay sa manga eped, aw magdugsuꞌ adti manga tyumanem nilan na galuꞌ. Kun kaliman tadun silan aliwesen, ka-ilangan tadun indegan ya kadakulaꞌ na banwa. 11Manang ini baling ya kakawasan na pigsulat ku idtu: Yan ya diliꞌ mayu pag-iyepeden ya utaw na sallong kunu nyangintu-u la manang kenneꞌ nan mig-imoꞌ sa malatay kasiling na magkasala-enen, aw magkaybeg sa bekeꞌ na kanan, aw magsimba sa tyumanem na galuꞌ, aw maglong sa malatay adti eped na utaw, aw pala-inem sa magpakalangulangu, aw matilimbungay sa manga eped nan. Diliꞌ kamu magpa-iyeped sa manga utaw yeiy pangkay sa pagsalu kanilan kuman!

12-13Walaꞌ ya katundanan ku mag-ukum sa manga utaw na walaꞌ pangintu-u. Ya Tyumanem, yan oloꞌ ya mag-ukum kanilan. Manang kamu saba ya umbaꞌ mag-ukum sa manga eped mayu na mangintu-uway, kay awun pigpasulat na Tyumanem, “Alilini mayu lekat adti kamayu katipun ya utaw na gayed mag-imoꞌ sa malatay.”#5:12-13 Mabasa adti Déutéronomiyo 17:7.

Currently Selected:

1 Corinto 5: klgv

Highlight

Copy

Compare