1 Corinto 3

Ya manga mangintu-uway na walaꞌ pa kagagad na Ispiritu Santo

1Kay manga inulug, idtu na muna sa adtu pa aku ni tampid mayu, walaꞌ ku paglongan kamayu ya malalem na kakawasan kasiling na piglong ku adti manga utaw na gayed piggagad na Ispiritu Santo. Manang pigpalna-uwan ta kamu baling kasiling na manga utaw na kenneꞌ pa dyumalug sa manga asini tas na lupaꞌ. Kay dun ni kamayu pagpangintu-u kan Kristu, kasiling kamu na manga tagbiꞌ na iseꞌ 2na magsusu pa na pigpatulin oloꞌ na gatas kay diliꞌ pa nilan mabatug kanen ya mabagseg. Yan ya du-an na migpalna-u aku kamayu sa molas mayu kalabetan, kay idtu na manga allaw yan walaꞌ pa katagilan ya kamayu anenganeng. Aw pangkay adun kenneꞌ pa na walaꞌ mayu kalabeti. 3Ya kamayu anenganeng gayed pa nyagagad na pagkaliman na pagka-utawun mayu, kay awun pa ni kamayu ya pag-inga-inga-ay aw ya pag-ayil. Anangaꞌ kenneꞌ pa mayu pigdalug ya imo-unun na manga utaw na walaꞌ pangintu-u? 4Awun dyengeg ku dun ni kamayu na maglong, “Ya kanak pigdalug ya kan Pablo.” Aw ya eped uman miglong, “Ya kanak pigdalug ya kan Apolos.”#3:4 Mabasa adti Manga Pigpan-imoꞌ na Manga Apostolés 18:24-28 kun singalan si Apolos. Kun maynan ya anenganeng mayu, nyasiling da kamu na manga utaw na walaꞌ pangintu-u.

5Na, awun manga usip ku kamayu: Unu kaꞌ adti kamayu si Apolos? Aw unu kaꞌ uman si Pablo? Anangaꞌ mayu kami ayilan? Oloꞌ saba kami sugu-anen na Tyumanem pada dumala adti kamayu sa Madyaw na Ubat-ubat, aw magi sa palna-u nami nyangintu-u kamu. Ya tagsambuksambuk kanami pig-imoꞌ nami oloꞌ ya pigtaligu nan kanami. 6Kasiling na biniꞌ, aku ya migtanem aw si Apolos ya migtubig, manang ya Tyumanem yan ya migpatulin. 7Yanagaw diliꞌ tadun pagbetang sa ginawa ya migtanem aw ya migtubig, manang yan baling ya pagbetang tadun sa ginawa ya Tyumanem na yan ya migpatulin. 8Kasiling uman na maynan, ya utaw na migpa-edeꞌ sa Madyaw na Ubat-ubat aw ya utaw na migpalna-u sa kakawasan, sambuk da ya tud nilan. Aw ya tagsambuksambuk kanilan awun madawat nilan adti Tyumanem umbaꞌ sa pigpan-imoꞌ nilan. 9Kay kami na manga magpalna-uway, alag kami magtalabahuway dun ni imo-unun na Tyumanem. Aw kasiling kamu na pawaꞌ na pigpatalabahu nan kanami. Kasiling kamu uman na balay na pigpa-indeg na Tyumanem.

Si Kristu ya tengteng tullukanan na to-o masalig

10Aw asuntu sa kadyawan na pig-atag nan kanak, nya-imoꞌ aku kasiling na panday na matadeng magtulluk. Nyabatug ku ya pagpaligenaꞌ sa madyaw na tullukanan na to-o masalig. Aw pigpadeleg da na manga eped ya pagtulluk. Yanagaw, ya tagsambuksambuk kanilan, pakadyawun nilan ya pagpadeleg sa pag-imoꞌ seiy. 11Kay sambuk da oloꞌ ya tullukanan na pigtagilan da, aw yeiy saba si Jisu-Kristu, aw walaꞌ da ya eped. 12Na, kun magpa-imoꞌ ya manga utaw sa balay dun ni tullukanan, diliꞌ mag-unawa ya paggamiten nilan. Awun miggamit sa diliꞌ magkasangab, kasiling na bulawan, aw bulawan na maputiꞌ, aw manga batu na dakulaꞌ ya alagaꞌ. Aw awun uman miggamit sa maksay magkasangab, kasiling na kawuy aw akus aw kugun. Maynan uman, walaꞌ pag-unawa ya pigpalna-u na manga magpalna-uway. 13Aw dun ni allaw na pag-ukum, tanda-en magi sa atulun ya pig-imoꞌ na tagsambuksambuk na utaw. 14Kun diliꞌ masangab ya pigtulluk nan, dun da ka-ede-i na tengteng matinaw ya pigpalna-u nan, aw awun saba madawat nan umbaꞌ sa kanan manga pigpan-imoꞌ. 15Manang kun masangab ya balay na pigtulluk nan, dun da ka-ede-i na bekeꞌ na tengteng matinaw ya palna-u nan aw dakulaꞌ ya malagak sa utaw yan, aw makaluwaꞌ oloꞌ ya kanan pagka-utawun dun ni laga na atulun.

16Unu, walaꞌ mayu ka-ede-i na témplo kamu na Tyumanem aw ya kanan Ispiritu nyeyaꞌ dun ni seled mayu? 17Yanagaw ya kadég tadun na mangintu-uway témplo saba na Tyumanem, aw pangkay singalan utawa ya magkalat sa pag-isambuk na manga mangintu-uway, kalaten sakanan uman na Tyumanem. Kay pigtani la kamu nan, aw kamu saba ya eya-anan nan.

18Diliꞌ mayu paggawayan ya kamayu pagka-utawun magi sa pagsalig mayu sa kamayu katadeng. Kun awun utaw dun ni kamayu na miglong na dakulaꞌ ya katadeng nan asini tas na lupaꞌ, ayawan da nan galu ya katadeng na maynan pada magkatadeng sakanan sa kana Tyumanem. 19Kay adti anenganeng na Tyumanem walaꞌ ya ma-untung na katadeng asini tas na lupaꞌ. Pigpasulat nan asini muna: “Ya manga utaw na awun kunu katadeng, pigkalitagan silan na Tyumanem magi sa kanilan katadeng.”#3:19 Mabasa adti Job 5:13. 20Aw awun pa uman pigpasulat nan asini muna: “Nya-edeꞌ ya Tyumanem sa manga utaw na awun kunu katadeng, aw kya-ede-an nan uman na walaꞌ ya ma-untung sa anenganeng nilan.”#3:20 Mabasa adti Salmo 94:11. 21Yanagaw diliꞌ mayu pagpalibantug ya katadeng na sambuk kanami, kay ya kadég pig-atag kamayu na Tyumanem pada sa kadyawan mayu, 22pangkay aku si Pablo aw pangkay si Apolos aw si Pédro. Pig-atag kamayu alag na Tyumanem pangkay ya kadakulaꞌ na banwa, aw ya kamayu ginawa, aw ya pagkamatay mayu, aw ya nya-imoꞌ adun aw ya un ma-imoꞌ adti manga allaw na dumadateng pa, alag yeiy pig-atag kamayu na Tyumanem. 23Yanagaw si Kristu oloꞌ ya umbaꞌ mayu palibantug, kay kamu awun da ni kan Kristu, aw si Kristu kana Tyumanem.

Currently Selected:

1 Corinto 3: klgv

Highlight

Copy

Compare