1 Corinto 14
14
Ya paglong sa tingeg na walaꞌ lemena paglongan aw ya pag-ubat-ubat sa pigpa-edeꞌ na Tyumanem
1Yanagaw tibagsegi mayu ya paggaginawa͡ay, aw pagbetangan uman sa ginawa ya paggamit sa manga punganan na katadeng na pig-atag na Ispiritu Santo, labi la ya pag-ubat-ubat sa un pa-edeꞌ na Tyumanem.
2Na, kun awun utaw na nyakapaglong sa sangkapungan na tingeg na walaꞌ nan lemena paglongan, Tyumanem oloꞌ ya piglongan nan kay diliꞌ kalabetan na manga utaw. Magi saba sa Ispiritu Santo na awun ni kanan, nyakapaglong ya utaw yan sa tingeg na kyalabetan oloꞌ na Tyumanem. 3Manang ya utaw na mig-ubat-ubat sa pigpa-edeꞌ na Tyumanem, yan ya piglongan nan ya manga mangintu-uway pada pakasaligen ya pagpangintu-u nilan, aw pakabagsegen ya kanilan ginawa, aw magleya silan. 4Ya utaw uman na miglong sa sangkapungan na tingeg na walaꞌ pa nan lemena paglongan, yan oloꞌ ya pigpakabagseg nan ya kanan pagpangintu-u. Manang ya utaw na mig-ubat-ubat sa pigpa-edeꞌ na Tyumanem, pigpakabagseg nan ya pagpangintu-u na manga eped nan na mangintu-uway. 5Yanagaw kaliman ku galu na alag kamu makapaglong sa sangkapungan na tingeg na walaꞌ pa mayu lemena paglongan, manang to-o pa madyaw kun mag-ubat-ubat kamu sa pigpa-edeꞌ na Tyumanem. Kay dakulaꞌ pa dun ya ma-untung na manga mangintu-uway kay sa tingeg na walaꞌ kalabeti, kantaw awun sambuk dun na matadeng mag-ubad sa kakawasan adti asdangan na manga mangintu-uway, pada pakasaligen uman ya pagpangintu-u na kadég nilan.
6Pagaw makakawun aku dun ni kamayu, kay manga inulug, aw maglong aku sa sangkapungan na tingeg na walaꞌ ku lemena paglongan, unu ya un mayu ma-untung adti paglong ku? Walaꞌ saba! Yan baling ya awun ma-untung mayu kun maglong aku kamayu sa pigbukasan na Tyumanem, aw ya un mayu ka-ede-an, aw ya pag-ubat-ubat sa pigpa-edeꞌ nan, aw ya palna-u sa unu ya madyaw imo-un. 7Pangkay ya manga pagtugtugun kasiling na plawta, kun diliꞌ madyaw ya pagka-eyep, diliꞌ madyaw ya uni. Aw ya kitada, kun diliꞌ madyaw ya pagka-angay, diliꞌ madyaw pakanyegan ya uni. 8Aw pangkay ya trumpita, kun diliꞌ mabangal ya kakawasan na uni nan, unun na manga sundalu ya pagpaka-edeꞌ pada makatagilan silan sa tanam? 9Maynan uman kamu. Kun maglong kamu sa tingeg na walaꞌ kalabeti, unun na manga utaw ya pagpaka-edeꞌ sa piglong mu? Kasiling kaw oloꞌ na miglong adti samet.
10Awun saba madég na punganan na tingeg asini tas na lupaꞌ na piglong na manga tribu na manga utaw. Aw dun ni tagsambuksambuk na tribu, kyalabetan nilan ya kanilan tingeg. 11Manang kun walaꞌ ku ka-ede-i ya piglong na sambuk na utaw, kasiling aku adti kanan na dumadayu lekat adti mawat na banwa, aw ya utaw yan kasiling uman na dumadayu adi kanak. 12Maynan uman dun ni kamayu. Asuntu na gayed mayu pigtibagsegan ya paggamit sa katadeng na pig-atag na Ispiritu Santo, yan ya to-o pa mayu tibagsegi ya pagpakabagseg sa eped mayu na manga mangintu-uway.
13Yanagaw ya utaw na nyakapaglong sa sangkapungan na tingeg na walaꞌ nan lemena paglongan, ka-ilangan magsekat sakanan adti Tyumanem sa katadeng mag-ubad sa kadég na pigpapaglong kanan. 14Kay kun manawagtawag aku magi sa tingeg na walaꞌ ku lemena paglongan, nyanawagtawag saba aku dun ni kanak paglong aw dun ni kanak uman ginawa. Manang walaꞌ ku kalabeti ya piglong ku.
15Yanagaw unu ya umbaꞌ ku imo-un? Yeiy saba ya imo-un ku: Manawagtawag aku magi sa tingeg na diliꞌ kalabetan na manga utaw aw manawagtawag aku uman magi sa tingeg na kalabetan nilan. Maynan uman, magdalangan aku magi sa tingeg na diliꞌ kalabetan na manga utaw aw magdalangan aku uman na kalabetan nilan. 16Alimbawaꞌ, kun migpasalamat kaw adti Tyumanem magi dun ni tingeg na walaꞌ kalabeti na eped, na, unun nilan ya paglong sa “Amén” kun walaꞌ nilan kalabeti ya piglong mu? 17Pangkay madyaw ya pagpasalamat mu adti Tyumanem, manang kun diliꞌ kalabetan na manga eped, na, walaꞌ ya ma-untung nilan dun.
18Pigpasalamatan ku ya Tyumanem kay pig-atag nan kanak ya paglong sa sangkapungan na manga tingeg na walaꞌ ku lemena paglongan, aw madég pa ya kanak piglong kay sa kamayu. 19Manang dun ni pagkatipun na manga mangintu-uway na un manimba, madyaw pa na maglong aku sa lima oloꞌ ya tingeg na kalabetan na kadég pada kapalna-uwan ku silan, kay sa maglong aku sa pilammalalan ya tingeg na diliꞌ nilan kalabetan.
20Kay manga inulug, diliꞌ kamu mag-anenganeng kasiling na pag-anenganeng na tagbiꞌ na iseꞌ. Yan oloꞌ ya silingan mayu adti kanilan na walaꞌ silan pag-anenganeng sa malatay. Manang dun ni pagpakalabet mayu, pakita͡an na unud da ya kamayu anenganeng. 21Awun pigpasulat na Tyumanem asini muna, law nan,
“Magi sa eped na punganan na manga tingeg,
aw magi sa manga dilaꞌ na manga dumadayu,
un ku paglongun ya manga utaw yeiy,
manang diliꞌ silan magpakanyeg kanakeꞌ.”
Yeiy ya piglong na Tyumanem kanilan.#14:21 Mabasa adti Isayas 28:11-12.
22Yanagaw kun makapaglong ya mangintu-uway sa sangkapungan na manga tingeg na walaꞌ nilan lemena paglongan, yeiy ya pangilala na walaꞌ ya ma-untung dun na manga utaw na walaꞌ pangintu-u. Manang ya pag-ubat-ubat sa pigpa-edeꞌ na Tyumanem, yeiy uman ya pangilala na makagagad sa manga utaw pada mangintu-u silan. 23Alimbawaꞌ, kun magkatipun kamu na manga mangintu-uway na un manimba sa Tyumanem, aw kun makapaglong ya kadég mayu sa sangkapungan na manga tingeg na walaꞌ pa mayu lemena paglongan, aw kun awun makaseled dun na utaw na walaꞌ pangintu-u aw walaꞌ paka-edeꞌ sa unu ya pigpan-imoꞌ mayu, pagaw makapaglong baling sakanan, “Ya manga utaw yeiy migpangkameneng da silan!” 24Manang kun makaseled dun sakanan aw yan ya dengegen nan ya pig-ubat-ubat mayu na lekat adti Tyumanem na kyalabetan nan, na, kelegan da ya ginawa nan 25kay kabukasan ya manga salaꞌ na pigtaguꞌ dun ni anenganeng nan. Aw to-o sakanan magselsel aw mangillupung aw simba͡en nan ya Tyumanem aw makapaglong sakanan, “Matinaw saba na awun ya Tyumanem ni kanilan!”
Ya umbaꞌ imo-un dun ni pagkatipun manimba
26Yanagaw, kay manga inulug, maynini ya umbaꞌ mayu imo-un dun ni kamayu pagkatipun: Ya eped magdalangan, aw ya eped magpalna-u. Aw ya eped mag-ubat-ubat sa bagu na pigpa-edeꞌ kanan na Tyumanem. Aw ya eped kamayu maglong sa sangkapungan na manga tingeg na walaꞌ nilan lemena paglongan, aw ya eped mag-ubad sa kakawasan. Aw ya kadég na un mayu imo-un, imo-a yeiy pada magkasalig ya kamayu pagpangintu-u.
27Kun awun adti kamayu na makapaglong sa manga tingeg na walaꞌ nan lemena paglongan, na, tumbay oloꞌ na duwa kun tulu ya maglong, manang diliꞌ silan magdengan. Aw ka-ilangan na awun utaw dun ni katipun mayu na awun katadeng lekat adti Ispiritu Santo mag-ubad sa kakawasan na piglong nilan. 28Manang kun walaꞌ ya maka-ubad sa piglong nilan, madyaw pa na diliꞌ da silan papaglongun, aw maglong da baling silan adti kanilan anenganeng aw adti Tyumanem.
29Aw kun awun adti kamayu na maka-ubat-ubat sa pigpa-edeꞌ na Tyumanem, tumbayan mayu oloꞌ na duwa aw kun tulu ya maglong. Aw ya manga eped magpakanyeg aw to-o nilan anenganengen kun matinaw ya pig-ubat-ubat aw diliꞌ. 30Manang kun awun sambuk na utaw na nyingkud dun na awun bagu pigpa-edeꞌ kanan na Tyumanem, madyaw pa na patenengen da ya nyaka-una miglong. 31Kun maynan ya imo-un mayu, madég kamayu ya magsayusayu mag-ubat-ubat sa un pa-edeꞌ na Tyumanem pada kapalna-uwan ya kadég aw magkabagseg ya kanilan ginawa. 32Aw ya manga utaw na maka-ubat-ubat sa un pa-edeꞌ na Tyumanem, magpakatagad silan aw tumbay nilan ya eped maglong. 33Kay ya Tyumanem diliꞌ paglekatan sa kasélék, manang yan baling ya paglekatan sa kalinaw. Awun galu kalinaw na kamayu pagkatipun kasiling na manga katipun na mangintu-uway adti kadakulaꞌ na banwa. 34Aw ya kadég na manga ka͡ubayan adti kamayu, diliꞌ magkasélék dun ni katipun mayu manang magpakanyeg baling silan sa pag-ubat-ubat. Kay awun pigpasulat dun ni Uldin na manga Judiyu na ka-ilangan ya manga ka͡ubayan na magpasakup silan. 35Kun awun kaliman na ka͡ubayan ka-ede-an, usipen da nan ya kanan eseg adti balay nilan. Kay diliꞌ madyaw sa manga ka͡ubayan na magkasélék dun ni katipun na manga mangintu-uway.
36Anenganenga mayu na bekeꞌ mayu ya piglekatan sa Madyaw na Ubat-ubat aw bekeꞌ mayu oloꞌ ya pigdatengan.
37Na, kun awun utaw na mig-anenganeng na awun katadeng nan mag-ubat-ubat sa un pa-edeꞌ na Tyumanem aw pangkay kun sambuk uman na punganan na katadeng na pig-atag na Ispiritu Santo, ka-ilangan nan kalabetan na ya katundanan ku migsulat seiy lekat saba adti kanaten Matas na Pangulu. 38Kun diliꞌ dalugun na utaw ya piglong ku yeiy, diliꞌ da mayu sakanan pagpakanyegan.
39Yanagaw, kay manga inulug, to-o betangan adti kamayu ginawa ya pag-ubat-ubat sa un pa-edeꞌ na Tyumanem. Manang ya-i mayu pagtageni ya utaw na makapaglong sa sangkapungan na tingeg na walaꞌ nan lemena paglongan. 40Manang imo-a mayu ya kadég yeiy na dayaw matapid ya kamayu pagsimba sa Tyumanem.
Currently Selected:
1 Corinto 14: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
