1 Corinto 11

1Yanagaw daluga mayu ya kanak palna-u aw ya pig-imoꞌ ku kasiling uman na pigdalug ku si Kristu.

Ya umbaꞌ imo-un na manga eseg aw manga ka͡ubayan adti pagsimba sa Tyumanem

2Na, to-o aku migleya asuntu na gayed aku mayu kya-anenganengan aw kenneꞌ mayu pigdalug ya manga pigpalna-u ku kamayu. 3Manang kaliman ku na ka-ede-an mayu na si Kristu yan ya ulu sa kadég na eseg, aw ya eseg yan ya ulu sa ka͡ubayan nan, aw ya Tyumanem yan ya ulu ni Kristu. 4Aw dun ni pagkatipun mayu na un manimba, kamu na manga eseg, sa pagpanawagtawag mayu aw sa pag-ubat-ubat mayu sa un pa-edeꞌ na Tyumanem, diliꞌ mayu pagtampengen ya kamayu ulu. Kay kun tampengen na eseg ya kanan ulu, pigmulamula nan baling si Kristu na yan ya kanan ulu.#11:4 Si Pablo, Judiyu sakanan, aw asini muna pigsuguꞌ na Tyumanem ya manga Judiyu na eseg na magtulung silan dun ni kanilan pagsimba. Manang ya manga Héntil, awun uman katanem nilan na pagtampengen ya ulu aw gya adti pagsimba sa kanilan manga tyumanem. Yanagaw, asini sulat ni Pablo, pigpalna-uwan nan ya manga Héntil na eseg na nyangintu-u la, na diliꞌ da silan magtulung aw magtampeng sa gya dun ni pagsimba nilan, pagaw anenganengen na eped na kenneꞌ pa nilan pigsimba ya manga tyumanem na galuꞌ. 5Manang kamu na manga ka͡ubayan, kun manawagtawag kamu adti katipun aw mag-ubat-ubat sa manga tingeg na lekat adti Tyumanem, pagtulung kamu. Kay kun awun ka͡ubayan na diliꞌ magtulung, pigmulamula nan ya kanan eseg na yan ya kanan ulu, aw kasiling na pigkigidan nan ya kanan ulu.#11:5 Dun ni manga allaw yan adti Corinto, kun awun ka͡ubayan na migpanawpanaw na walaꞌ pagtulung, ya anenganeng na manga eped, ya ka͡ubayan yan malatay ya dengeg nan. 6Kun awun ka͡ubayan na diliꞌ malim magtulung sa ulu nan, madyaw pa na pakigid da nan ya lugay nan. Manang asuntu na makamulamula sa ka͡ubayan na walaꞌ da ya lugay, na, madyaw pa na magtulung sakanan.

7Kamu na manga eseg, dun ni pagkatipun mayu manimba, diliꞌ mayu pagtampengen ya kamayu ulu. Kay dun ni eseg kita-a ya gya na Tyumanem aw ya kanan dengeg. Manang ya ka͡ubayan pig-imoꞌ pada sa dengeg na eseg nan. 8Kay dun ni pag-imoꞌ na Tyumanem sa utaw, ya eseg walaꞌ lekat adti ka͡ubayan manang lyumekat baling ya ka͡ubayan adti eseg. 9Aw walaꞌ imo-a ya eseg pada sa ka͡ubayan manang pig-imoꞌ ya ka͡ubayan pada sa eseg. 10Yeiy ya du-an na dun ni kamayu pagkatipun, ka-ilangan na awun tatulung adti ulu na ka͡ubayan kay yan ya pangilala na migpasakup sakanan sa eseg nan, asuntu na gayed migbantay ya manga anghil. 11Kaliman ku na ka-ede-an mayu na dun ni kasakupan na manga mangintu-uway kan Kristu, ka-ilangan magtatabangay alag ya eseg aw ka͡ubayan. 12Kay ya tagnaꞌ na ka͡ubayan lyumekat adti lawas na eseg, aw pagkatigkas yan, nya͡utaw ya kadég na manga eseg adti manga ka͡ubayan. Aw ya Tyumanem, yan ya lyekatan sa kadég.

13Yanagaw anenganenga mayu: Adti kamayu pagkatipun manimba, umbaꞌ kaꞌ sa ka͡ubayan ya manawagtawag adti Tyumanem na diliꞌ magtulung? 14Endaꞌ, makamulamula͡ay saba sa eseg ya magpatas sa lugay nan. 15Manang kun malawig ya lugay na ka͡ubayan, yan ya kanenggeya͡an nan. Kay pig-atagan sakanan na Tyumanem na malawig na lugay na un pagtampeng sa ulu nan. 16Aw kun awun utaw na mag-ayil sa piglong ku yeiy, pa-ede-en mayu sakanan na yan ya katanem na pigpalna-u nami. Aw maynan uman ya pigdalug na manga mangintu-uway pangkay ayin na banwa.

Ya manga puluglima dun ni manga mangintu-uway adti Corinto

17Na, awun kaliman ku paglongun kamayu, aw asini kanak paglongun diliꞌ ta kamu sayaꞌ kay dyengeg ku na diliꞌ madyaw ya syampetan na pagkatipun mayu. 18Ya muna dyengeg ku na awun kunu pagkatenga-tengaꞌ na manga mangintu-uway dun ni kamayu pagkatipun nyanimba. Aw pangkay diliꞌ aku malim mangintu-u sa dyengeg ku, manang pagaw awun katinawan dun. 19Manang ka-ilangan na ma-imoꞌ ya maynan pada kilala͡en kun singalan ya tengteng nyakatutuk sa Tyumanem. 20Kay dun ni pagkatipun mayu kyuman pada tumanen ya suguꞌ ni Jisu-Kristu, kyalakadan mayu baling ya suguꞌ nan, kay walaꞌ mayu basabasayi ya tud na pangiyambung yeiy na un anenganengen ya pagkamatay nan. 21Kay dun ni kamayu pagkan, walaꞌ mayu tagadi ya kamayu eped pada magdengan kamu kuman aw yanagaw awun manga eped kamayu na walaꞌ baling pakakan, aw ya manga eped to-o nyaka-inem mendaꞌ na nyalangulangu silan. 22Yanagaw anangaꞌ walaꞌ kamu una kan aw inem adti manga balay mayu? Pagaw kaliman mayu kalaten ya dengeg na kadég na manga mangintu-uway aw mulamula͡en ya manga utaw na walaꞌ ya pagkamangan. Unu kaꞌ, sayaꞌ ta kamu sa pigpan-imoꞌ mayu yeiy? Diliꞌ saba!

Ya palna-u sa pangiyambung na pigsuguꞌ ni Jisu-Kristu

23Na, ini ya pigpalna-u ni Jisu-Kristu na kanaten Matas na Pangulu, aw ini uman ya pigpalna-u ku kamayu. Idtu na gabi na piglubidan sakanan, migkamang sakanan sa pan 24aw sa abus da nan pasalamati adti Tyumanem, pigtenga-tengaꞌ nan ya pan na un nilan kanen, aw law nan, “Yeiy ya kanak lawas na pig-atag kamayu. Imo-a mayu ya maynini kay yeiy ya magpa-anenganeng kamayu kanak.” 25Pagkatigkas nilan mangiyambung, pig-awidan nan uman ya tabuꞌ na pigseledan sa bino aw law nan, “Yeiy ya kanak duguꞌ, aw magi sa duguꞌ ku matuman ya bagu na pakang na Tyumanem na dayaw mag-iganget. Sa kada inem mayu seiy, ka-anenganengan aku mayu.” 26Yanagaw sa kada pagkan mayu sa maynini na pan aw pag-inem mayu sa tagbiꞌ na bino dun ni tabuꞌ, dun da mayu kabekkal adti eped na manga utaw ya pagkamatay ni Jisu-Kristu mendaꞌ na paglikuꞌ nan.

27Yanagaw pangkay singalan ya sumambuk kuman na walaꞌ pakatagilan ya kanan anenganeng, aw minem lekat adti tabuꞌ na kanaten Matas na Pangulu na si Jisus, makasalaꞌ saba sakanan adti lawas aw duguꞌ ni Jisus. 28Yan ya du-an na ka-ilangan na tagsambuksambuk kamayu na tagilanen nan una ya kanan anenganeng sa diliꞌ pa sakanan kuman sa pan yeiy aw minem sa bino dun ni tabuꞌ. 29Kay pangkay singalan ya kuman sa pan aw minem sa bino yeiy na walaꞌ nan anenganenga ya tengteng kakawasan, aw walaꞌ nan basabasayi ya lawas na Matas na Pangulu tadun, liwan na pigsekat nan baling ya pa-emel-emel na Tyumanem. 30Yeiy ya du-an na madég kamayu ya mangkalumay aw pyangkedelan, aw ya eped kamayu nyangkamatay. 31Kun tagilanen tadun ya kanaten anenganeng sa diliꞌ pa kuman, diliꞌ kitadun pa-emel-emelen na Tyumanem. 32Manang kun pitulun kitadun na kanaten Matas na Pangulu, yan ya palangad pagsagda nan kanaten pada diliꞌ kitadun pa-emel-emelen adti kamoliyan na allaw eped na manga utaw na walaꞌ ya pagpangintu-u kanan.

33Yanagaw, kay manga inulug ku, pangkay kinunu kamu pagkatipun na un kuman, tagadi mayu ya pagdateng na manga eped aw tigkas yan pagdengan kamu kuman. 34Kun awun utaw na nyagetem, madyaw pa na dadan sakanan kuman adti balay nan pada diliꞌ sumampet ya kamayu katipun adti pa-emel-emel na Tyumanem. Aw sa manga eped pa na puluglima mayu, balawbalawan tadun sa pagdateng ku dun ni kamayu.

Currently Selected:

1 Corinto 11: klgv

Highlight

Copy

Compare