1 Corinto 12

Ya manga pigpan-atag na Ispiritu Santo adti manga mangintu-uway

1Kay manga inulug ku dun ni kan Jisu-Kristu, kaliman ku na kalabetan mayu ya manga pig-atag kanaten na Ispiritu Santo. 2Idtu muna kamu na manga Héntil, piggawayan kamu aw nyagagad adti pagsimba sa manga inutaw na diliꞌ magpakapaglong. 3Yanagaw paglongun ta kamu: Ya utaw na piggagad da na Ispiritu Santo, diliꞌ sakanan makapaglong sa malatay adti kan Jisus. Aw ya utaw na walaꞌ ya Ispiritu Santo dun ni kanan, diliꞌ sakanan makapaglong na si Jisus ya Matas na Pangulu.

4Na, ya Ispiritu Santo, yan ya lyekatan sa madég na punganan na katadeng na pig-atped-atped adti kadég na manga mangintu-uway. Manang walaꞌ pag-unawa ya pig-atag nan adti tagsambuksambuk kanaten. 5Aw awun madég na punganan na imo-unun na pigtaligu na Tyumanem adti manga mangintu-uway. Manang si Kristu saba ya migtawag sa kadég tadun adti manga imo-unun nan. 6Aw awun madég na punganan na pigpa-imoꞌ kanaten na Tyumanem. Manang sambuk da ya Tyumanem na mig-imoꞌ sa kadég yeiy. 7Na, pagkita-en ya pigpan-imoꞌ na Ispiritu Santo dun ni pig-atag nan na katadeng adti tagsambuksambuk kanaten. Aw pig-atag nan yeiy kamayu pada ka-untungan ya kadég. 8Ya sambuk, pig-atagan na Ispiritu na mabatug nan ubat-ubat ya kakawasan na katadeng na lekat adti Tyumanem. Aw ya sambuk uman, pig-atagan na mabatug nan maglong adti manga eped sa pigpa-edeꞌ kanan na Ispiritu. 9Aw ya sambuk, pig-atagan na Ispiritu na madég ya ma-imoꞌ nan asuntu na dakulaꞌ ya pagpangintu-u nan. Aw adti sambuk, pig-atagan na katulus na un magpaguliꞌ sa manga utaw na kyedelan. 10Aw ya sambuk, pig-atagan na Ispiritu na katulus sa pag-imoꞌ sa manga milagru. Aw adti sambuk uman, pig-atag ya katadeng mag-ubat-ubat sa un pa-edeꞌ na Tyumanem. Aw adti sambuk, pig-atag ya katadeng kun ayin lekat ya piglong na eped na utaw, kun lekat adti Ispiritu Santo aw kun lekat adti manga busaw aw kun lekat oloꞌ adti anenganeng na utaw. Aw adti sambuk uman, pig-atag ya paglong sa sangkapungan na tingeg na walaꞌ pa nan lemena paglongan. Aw pig-atag uman na Ispiritu Santo adti eped ya katadeng mag-ubad sa kakawasan na tingeg na piglong na utaw yan. 11Manang sambuk da ya Ispiritu na nyatag sa kadég yeiy. Aw yan ya mig-atped-atped adti tagsambuksambuk kanaten magi sa kanan pagbayaꞌ.

12Dun ni sambuk na lawas awun madég na punganan. Aw ya tagsambuksambuk yeiy awun imo-unun manang walaꞌ pag-unawa. Maynan uman kitadun na manga mangintu-uway. Ya tagsambuksambuk kanaten awun imo-unun dun ni lawas ni Kristu. 13Kay adti pagba͡utismu kanaten dun ni Ispiritu Santo, migkasambuk da ya kadég tadun aw nya-imoꞌ lawas ni Kristu, pangkay Judiyu kitadun aw pangkay Héntil, pangkay allang aw bekeꞌ na allang. Sambuk da ya Ispiritu Santo na pigdawat na kadég tadun.

14Na, ya lawas na utaw madég saba ya punganan aw bekeꞌ oloꞌ na sambuk. 15Alimbawaꞌ, kun maglong ya siki, “Bekeꞌ aku na tulluꞌ aw yanagaw walaꞌ ya labet ku sa lawas,” unu kaꞌ, walaꞌ ya labet nan dun ni lawas? Awun saba labet nan! 16Aw maynan uman, kun maglong ya talinga, “Bekeꞌ aku na mata aw yanagaw walaꞌ ya labet ku sa lawas,” unu kaꞌ, walaꞌ ya labet nan dun ni lawas? Awun saba! 17Kun ya kadakulaꞌ na lawas mu alag mata, na, unun nan ya pagpakadengeg? Aw kun ya kadakulaꞌ uman na lawas mu alag da talinga aw walaꞌ ya ilung, na, unun nan ya pagpakaboꞌ? 18Manang bekeꞌ na maynan ya pag-imoꞌ na Tyumanem sa lawas tadun. Kay kanan pagbayaꞌ ya pagtapidtapid sa tagsambuksambuk na punganan dun ni kanaten lawas. 19Kun sambuk da oloꞌ ya punganan nan, bekeꞌ saba na lawas! 20Yanagaw, pangkay madég ya punganan nan manang nya-imoꞌ da silan sambuk na lawas.

21Diliꞌ makapaglong ya mata adti tulluꞌ, “Walaꞌ ya katukanan ku sa tulluꞌ,” aw diliꞌ uman makapaglong ya ulu adti siki, “Walaꞌ ya katukanan ku sa siki.” 22Bekeꞌ saba na maynan. Pagaw iman tadun aw tagbiꞌ ya ma-untung adti eped na manga punganan na lawas, manang dakulaꞌ saba ya katukanan kanilan. 23Awun manga punganan na lawas tadun na diliꞌ pagpakitaꞌ aw yeiy ya pigpakadyaw tadun aw pigtampeng, 24manang awun uman punganan na lawas na pagkita-en aw yeiy ya diliꞌ ka-ilangan pagtampengen. Maynan ya pagtapid na Tyumanem sa kanaten lawas pada sa kadyawan na eped na punganan na lawas na diliꞌ pagpakitaꞌ, pada ka-atagan silan alag na dengeg. 25Pig-imoꞌ yeiy na Tyumanem pada ya kadég tadun na awun ni sambuk na lawas diliꞌ matenga-tengaꞌ, manang mag-unawa baling ya pagdiyaga na tagsambuksambuk. 26Yanagaw kun awun sambuk na punganan na lawas na magti-is, ya kadég alag uman magti-is. Aw kun ya sambuk na punganan na lawas atagan na dengeg, ya kadég alag magleya.

27Na, kitadun saba na manga mangintu-uway ya palangad lawas ni Kristu, aw ya tagsambuksambuk kanaten nyakasambuk da dun ni lawas nan. 28Aw dun ni palangad lawas ni Kristu, awun manga utaw na pigpamalliꞌ na Tyumanem: Ya tagnaꞌ manga apostolés, aw ya kadwa manga propita, aw ya katlu manga magpalna-uway. Pagkatigkas yan, pigpamalliꞌ nan uman ya manga eped pada maka-imoꞌ sa milagru, aw ya manga eped uman magpaguliꞌ sa manga kyedelan, aw ya manga eped magtabang sa manga utaw, aw ya manga eped maggagaday, aw ya manga eped makapaglong sa sangkapungan na tingeg na walaꞌ pa nilan lemena paglongan. 29Na, bekeꞌ na kadég tadun alag apostolés, aw bekeꞌ uman na kadég tadun propita aw magpalna-uway, aw bekeꞌ na kadég tadun ya pig-atagan na maka-imoꞌ sa milagru. 30Aw bekeꞌ uman na kadég tadun pig-atagan na magpaguliꞌ sa kyedelan. Aw bekeꞌ uman na kadég tadun ya pig-atagan sa paglong sa sangkapungan na tingeg. Aw bekeꞌ uman na kadég tadun ya pig-atagan na katadeng sa pag-ubad sa piglong na utaw na nyakapaglong sa sangkapungan na tingeg. 31Yanagaw madyaw kun kaliman mayu na ka-atagan kamu na to-o madyaw na manga pig-atag na Ispiritu Santo. Manang awun pa to-o madyaw na pa-agi na un ku paglongun kamayu.

Currently Selected:

1 Corinto 12: klgv

Highlight

Copy

Compare