2 Samoela Sava lalana
Sava lalana
–Tamin’ny voalohany ity boky ity sy ny teo aloha dia nitambatra ho boky tokana ihany, izay fantatra tamin’ny anaran’ilay olona malaza indrindra voalaza ao, dia ny mpaminany Samoela izany. Amin’ny fizarany ho boky roa ankehitriny, ny 2 Samoela dia mitantara ny nanjakàn’i Davida, ilay mpanjaka voalohany sy lehibe indrindra tamin’i Israely manontolo.
Ny boky dia manomboka amin’ny tononkalo fisaonana izay nataon’i Davida rehefa nandre ny nahafatesan’i Saoly sy i Jônatàna zanany izy; dia ambarany avy eo ny nahatonga an’i Davida ho mpanjakan’i Joda (toko 1–4). Nisy zanakalahin’i Saoly natao hoe Isbôseta nanjaka tapany tamin’ny foko avaratra; ka rehefa maty izy, dia nanaraka an’i Davida ireo foko ireo ary nifidy azy ho mpanjaka. Koa hatramin’izay dia nanjaka feno tamin’ny foko 12 i Davida (toko 5–20). Ny toko 21 ka hatramin’ny 24 dia fitantarana samihafa momba ny nanjakàn’i Davida, saingy tsy hita kosa tany amin’ireo toko teo aloha.
Aseho amintsika araka izay tena maha izy azy i Davida mpanjaka. Ny 2 Samoela dia mampiseho ny fahalehibiazany sy ny heriny, kanefa dia tsy manafina ihany koa ireo fahalemeny ary tsy misalasala milaza ireo toe-javatra nampalahelo izay nanamaloka ny fiainam-pianakaviany. Hita ny tena naha olombelona an’i Davida, saingy maneho herimpo goavana koa izy rehefa miaiky ny fahadisoany sy mangata-pamelana amin’Andriamanitra.
Tatỳ aoriana, indrindra tamin’ireo fotoan-tsarotra ho an’i Israely dia i Davida no ho tonga ohatr’ilay mpanjaka mpamonjy izay nampanantenain’Andriamanitra fa halefany ho an’ny vahoakany. Hotsaroan’i Israely tsara ny teny fampanantenàn’Andriamanitra nampitondrainy an’i Davida tamin’ny alalan’i Natàna mpaminany hoe: hisy anankiray amin’ny taranakao hanjaka handimby anao (toko 7). Izany matetika no antony anondroana an’i Jesoa, ilay mpamonjy nirahin’Andriamanitra, ho ny «Zanak’i Davida» ao amin’ny Testamenta Vaovao (jereo Mt 20.29-34; 21.9).
Currently Selected:
2 Samoela Sava lalana: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.