Romans 6
6
Ngarey rangma tik, Khristo o tong
1Irimal ang ajo hiqtang chamta raaq ni? Ráng manchan daqhan cham ang aa ta hiqtang aa ngarey som chey ro eq i? 2Baluk o tho ang moq! Hiqtang ngarey rangma utik sey ang ti jo, chamal eq ngarey som eq wey tong chey ni? 3Hiqtang bara Khristo Jesu o junglam ti, hiqtang utik jamoq urum ang ti ta nim aa sam min i? 4Eshirangma junglam tungkang o hiqtang piq jamoq bing taphi, etho utik o rum ti, irimal ang eq Khristo wa phun amun tungkang o utik wang wey thajey ta shimal hiqtang tho anal rollung o tong ni.
5Hiqtang utik sho piq jamoq rum tungkang o piq wey jey ta thimal hiqtang wey jey eq tho piq jamoq rum ni. 6Hiqtang aking ngarey hanphung sha Khristo jamoq bólq o botchak ta ta hiqtang usam eq i, irimal ang eq hiqtang rollung na ngarey tarong màngti ta etho hiqtang ngarey qha ang eq wey tong mi sey angni. 7Chammatakoi utang utik ang ajo piq ngarey wang aqhap sey. 8Etho hiqtang Khristo jamoq utik ang ti jo piq jamoq tho utong ang ni ta hiqtang aa uhan eq i. 9Chammatakoi Khristo utik wang weyjey angta etho wey ti moq sey angna ta hiqtang aa usam eq i. Thang wang utik eq piq tha jaktáng o shing moq sey angna. 10Etho piq tita tho ngarey rangma jukshey dang tita; etharin piq Shkewa rangma atharang ang eq tong aa. 11Eshimal hun nim tho nim ni nim ngarey rangma amàng, etharin Shkewa rangma Khristo Jesu o atharang ta tathin inn.
12Nim aa ngarey hanphung ngikjuk sha phan ma ngarey eq nim hanphung shi jaktáng o shing ma nak kot inn. 13Nim hanphung uking uphak shi aja jaksom rangma ngarey ma nak kot inn. Etharin nim ni nim utik wang weyjey ang ti ta sam eq Shkewa ma kot inn etho nim ni nim hanphung iking uphak shi asing jaksom rangma Shkewa ma kot inn. 14Ngarey sha nim tangteywa ang ching ang moq, chammatakoi nim thong jaktáng na ang min etharin ráng manchan jaktáng na.
Asing qha
15Irimal ang ajo chamlang aa? Hiqtang thong jaktáng na ang hunga ráng manchan jaktáng na ta ngarey sha somlo i? Baluk otho ang moq! 16Nim aa chamtey miq raaq tat rangma nim ni nim sha qha mal kot inn jo, nim sha piq qha ta nim aa sam min i? Nim ngarey qha ma jin ang inn bara utik náng thu aa, ang moq ang jo Shkewa raaq jin tat eq aa bara asing náng thu aa. 17Etharin Shkewa ma kechu ajong cham ang aa! Chammatakoi phang tho nim ngarey qha ang tin jo tho, thanga tin wang nim aa kap tin eshi tatal sha tat inn. 18Nim ngarey wang aqhap sey etho asing qha sey. 19Nim miq ang eq usam eq ma anung rangma nga salwet raaqtathak bat phang. Phang tho nim aa nim ni nim sha anaan etho aja qha ang eq kot tin shimal, thanga nim ni nim shi asang rangma asing qha ang eq kot inn.
20Nim ngarey qha ang tin tho, asing kowang aqhap ang tin. 21Bari raaq wang thanga nim rakri ang inn, ning wang eshi rangham tho nim aa chamlang kap tin? Chammatakoi eshi tang ma uthun sha utik. 22Etharin thanga ngarey wang nim aqhap sey etho Shkewa qha sey. Thanga nim aa asang rollung kap inn etho eshi uthun sha pattuk rollung. 23Chammatakoi ngarey jakthang sha utik, etharin Shkewa jakkot sha hiqtang Teyhungwa Khristo Jesu o pattuk rollung.
Currently Selected:
Romans 6: Muklom
Highlight
Share
Compare
Copy
Want to have your highlights saved across all your devices? Sign up or sign in
CC BY-NC-ND 4.0
