Roma 15

Upotulutulungimo tee Witinaimiu Saʼiimani

15:1-13

1Ingkita momakaana tabeana tatanggo kakurangana mia momalute, tee bholi tapeelo kasanaata karota. 2Maka bhari-bharikita tabeana tapasanaa ngangarandana manga witinaita to kalapena manga incia, mamudhaakana opea iyaakinina ahanda amatangka. 3#Zab. 69:10.Roonamo Al Masi uka inda apeelo kasanaana karona, maka mboomo mopadhana motoburi i nuncana Kitabi Momangkilo, "Bhari-bharia kahinana manga mia mohinako akangkanaimo karoku." 4Bhari-bharia giu motoburina i zamani mangenge atoburi i nuncana Kitabi Momangkilo to amembaliaka kaadhari to ingkita mamudhaakana tapotibhaaka kaharapu minaaka i kasabara tee kahiburu modhaangiana i nuncana Kitabi Momangkilo sumai.

5Maasangia o Aulataʼala adhawuakakomiu kasabara tee kahiburu, tee abarakatikomiu mamudhaakana udhadhi sainca safikiri uose kapeeluana Isa Al Masi, 6sabutuna ingkomiu usainca safikiri tee upobhawa-bhawa umuliangi Aulataʼala, Amana Oputa Momalanga, Isa Al Masi.

7Jadi rampaakanamo Al Masi padhamo atarimakomiu umembali uumatina, sumaimo ingkomiu tabeana upotaritarimamo uka podho-podho ingkomiu, mamudhaakana o Aulataʼala atomuliangi. 8Iaku kupogau mboo sumai roonamo Al Masi amembalimo bhatuana mia mototandaki to asusuaka kabanarana Aulataʼala tee apekatangkaaka opea mopadhana ijanjiakana to manga incia. Tee mboo sumai, Al Masi padhamo abukutiiakea ande bhari-bharia pojanjiana Aulataʼala to manga opu-opuana miana Yahudi sumai abanara, 9#2Sam. 22:50; Zab. 18:50.tee mamudhaakana manga mia inda motolentuna miana Yahudi uka amembali amuliangi Aulataʼala rampaakanamo kaasina incana to manga incia, mboomo mopadhana motoburi i nuncana Kitabi Mangkilo:

"Rampaakanamo sumai, iaku bhekumuliangiko i tanga-tangana manga lipu inda motolentuna miana Yahudi,

tee kulaguaka lagu kapujia to saromu."

10 # Kap. 32:43. Dhaangia uka i aeati mosagaanana motoburina mboo sii:

"E manga mia inda motolentuna miana Yahudi, kaunde-undemo tee uumati mopadhana ipilina Aulataʼala."

11 # Zab. 117:1. Tee dhaangia uka o firimanina Aulataʼala mopogauna mboo sii:

"E bhari-bharia manga mia inda motolentuna miana Yahudi, pujimo Kawasana Opu,

taroakamo bhari-bharia lipu apujiaka Incia."

12 # Yes. 11:10. Nabii Yesaya uka apogau,

"Bheadhaangia o siwulu moumbana minaaka i Isai,#15:12 siwulu moumbana minaaka i Isai: Maʼanana apatujuakea to Isa Al Masi mominaakana i siwuluna Raja Daud anana Isai.

Incia bheaumba to aparinta bhari-bharia lipu.

Tee manga mia inda motolentuna miana Yahudi bheaharapu tee Incia."

13Maasangia o Aulataʼala momembalina iharaputa sumai, adhawuakakomiu sagala giuna kasanaa tee dhadhi momalape i nuncana iimanimiu, mamudhaakana tee kuasana Rohina Aulataʼala Momangkilo ingkomiu ahanda uparacaea ande o Aulataʼala atotuu-totuu apewaua o janjina.

Paul Apetulatulaaka Opea Mopadhana Ipewauna tee Manga Mia Inda Motolentuna Miana Yahudi

15:14-21

14E manga witinaiku, iaku kuyaakini mpuu ande abhari o giu momalape modhaangiana i karomiu. Ingkomiu uka abhari o giu imataumiu sabutuna amembali uponaasenaasehati podho-podho ingkomiu. 15Maka moomini mboo sumai, iaku tee kabaraniku padhamo kuburiakakomiu pia angu giu i nuncana sura incia sii to kuudhaniakakomiu pendua rampaakanamo rahumati mopadhana idhawuakana Aulataʼala to karoku, 16siitumo iaku kumembali bhatuana Isa Al Masi to manga mia inda motolentuna miana Yahudi. Tee iaku kukarajaa opea momembalina tugasina imamu to kupakoleleaka Lele Malape minaaka i Aulataʼala, mamudhaakana manga mia inda motolentuna miana Yahudi atarimaia Aulataʼala amembali saangu pasombaa imaasiakana Aulataʼala tee ipekangkilona Rohina Aulataʼala.

17Jadi rampaakanamo sumai, iaku kumembali kubangga roonamo kuposaangu tee Isa Al Masi pokaiana tee bhari-bharia giu mopadhana ipewauku to Aulataʼala. 18Iaku inda kubarani kupogauaka manga giu mosagaanana, iaku tangkanamo soo kupogauaka opea mopadhana ipewauna Isa Al Masi alaloi karoku, sabutuna alaloi bhoasakaku tee pemingkuiku, iaku kumembali kutonda manga mia inda motolentuna miana Yahudi mamudhaakana ataʼati tee Aulataʼala. 19Tee manga incia amembali ataʼati Aulataʼala roonamo kupayaakiniakea tee manga muuzizati tee manga giu inda momentela, tee uka kuasana Rohina Aulataʼala. Tee mboo sumai, iaku padhamo kupakoleleaka Lele Malape pokaiana tee Isa Al Masi i bhari-bharia tampa mopadhana ileongiku, pepuu minaaka i Kota Yerusalem sakawana i Poropinsi Ilirikum.#15:19 Poropinsi Ilirikum: Sii-sii o poropinsi incia sii amembalimo lipuna Albania tee i lipu i saripina, siitumo i timbuna Italia. 20Iaku satotuuna gauku mpuu bhekupakoleleaka Lele Malape i tampana manga mia indapo morangona sarona Al Masi, roonamo iaku kumendeu kupabhangu saangu bhanua i bhawona fondasi mopadhana ikarajaana mia mosagaanana. 21#Yes. 52:15.Apokana tee motoburina i nuncana Kitabi Momangkilo,

"Manga mia indapo motarimana lelena bheakamatea,

tee manga mia indapo morangoa bheamaʼanaia."

Paul Ahaejati to Alingka i Kota Roma

15:22-33

22 # Rom. 1:13. Rampaakanamo sumai, iaku sadia inda tee kalalesaku to kuleongikomiu i Kota Roma. 23Maka sii-sii, aselesaimo tugasiku i manga lipu incia sii, tee dhaangiamo pia tao kangengena iaku gauku kuleongikomiu, 24sumaimo iaku kuharapu amembali kubutu i tampamiu tee tapokawa wakutuuna kulingka i Poropinsi Spanyol.#15:24 Poropinsi Spanyol: Saangu poropinsi mopesuana i pamarintana Roma modhaangiana mpuu i weta i bhara. Iaku uka kuharapu mamudhaakana ingkomiu uunda utulungiaku wakutuuna kupalausaka lingkaaku i Spanyol sapadhana kupobhawa-bhawa kuniʼimati wakutuuku sabantara tee ingkomiu. 25#1Kor. 16:1-4.Maka sii-sii, iaku tangasaana i nuncana lingkaaku i Yerusalem to kubhawa kahamba to manga mia mosaalihi iwe sumai. 26Roonamo manga miana Makedonia tee Akhaya#15:26 Makedonia tee Akhaya: Poropinsi-poropinsi modhaangiana i pamarintana Roma mopesuana i lipuna Makedonia tee Yunani sii-sii. padhamo apomambotu to adhawuaka kahambana to manga mia mosaalihi momisikinina modhaangiana i Yerusalem. 27#1Kor. 9:11.Miana Makedonia tee Akhaya akaunde-unde mpuu amambotuaka giu incia sumai, tee o giu incia sumai aabhia saangu giu iwaajibuakana to manga incia. Roonamo minaaka i miana Yahudi sumai manga mia inda motolentuna miana Yahudi padhamo apotibhaaka dhawu i nuncana kabarakatina rohina Aulataʼala. Jadi manga mia inda motolentuna miana Yahudi sumai awaajibu uka to alaiani manga miana Yahudi tee harataana manga incia. 28Jadi sapadhana kupaselesai tugasiku tee sapadhana kupasaraakaaka kahamba mopadhana imateraiku sii, iaku bhekubhose i lipuna Spanyol tee kusii i tampamiu. 29Iaku kuyaakini, ande kuumba i tampamiu, iaku bhekuumba tee kabarakatina Al Masi motaralabhi-labhi.

30E manga witinaiku, tee sarona Isa Al Masi, Oputa Momalanga, tee kaasi mominaakana i Rohina Aulataʼala, iaku kunaasehatiakakomiu mpuu to upobhawa-bhawaaka udoʼaakaaku tee kampuu-mpuuna incamiu 31mamudhaakana o Aulataʼala apasalaamatiaku minaaka i manga mia inda moparacaeaia modhaangiana i lipuna Yudea, tee mamudhaakana o kahamba ibhawaku i Yerusalem sii atarimaia pekalape manga mia mosaalihi modhaangiana iwe sumako. 32Tee uka, ande o Aulataʼala adhawuaku kalalesa, iaku bhekuumbatikomiu i Kota Roma tee ngangaranda mokaunde-unde, tee o namisiku bheatohiburu mpuu i tanga-tangamiu. 33Maasangia o Aulataʼala minaana dhadhi malape to maanusia sumai apoose tee ingkomiu bhari-bharikomiu. Aamin.

Currently Selected:

Roma 15: KMW

Highlight

Copy

Compare