Wahiyuu 12

Bhawine tee Naga

12:1-6

1Kasiimpo atokamatamo saangu tanda momaoge i laiana: Samia bhawine apobhajuaka matana eo, tee o bula amembali polandakana aena, tee sapulu rua angu kalipopo amembali mahakota i bhaana. 2Bhawine incia sumai tangasaana abhawa-bhawa, tee roonamo akawamo wakutuuna to akoana incia apekee roonamo anamisi kapii.

3 # Dan. 7:7. Kasiimpo atokamatamo uka o tanda mosagaanana i laiana: Dhaangia sambaa o naga mokowaranaana maleʼi, bhaana pitu angu, tanduna sapulu angu. I bhawona bhaana dhaangia pitu angu o mahakotana. 4#Dan. 8:10. Lencina naga sumai asoro saidhepo talu pulu talu parasee kalipopo minaaka i manga kalipopo i laiana, kasiimpo atudhaakea i dunia. Naga sumai akakaro i aroana bhawine bhemokoanana sumai mamudhaakana amembali adhoku o anaana bhawine sumai wakutuuna anaana sumai alaahiri.

5 # Zab. 2:9; Yes. 66:7. Bhawine sumai apalaahiri samia ana umane bhemoparintangina bhari-bharia lipu tee katuko ase. Maka o anana sumai atoala madhei minaaka i bhawine sumai tee abhawea i Aulataʼala i aroana kauncuramakana. 6Sabutuna o bhawine sumai apalai i tana matuu, i tampa mopadhana ipasadiaakana Aulataʼala to incia. Iwe sumai incia atodhambaaka 1.260 eo kangengena.

Naga Atotalo

12:7-9

7 # Dan. 10:13; 10:21; 12:1; 9. Kasiimpo adhaangiamo potimbea i sorogaa. Mikhael tee manga malaaʼekatina apotimbe abhali naga sumai, tee o naga sumai uka apoose tee manga malaaʼekatina abhali Mikhael. 8Maka o naga tee manga malaaʼekatina ataloa Mikhael, sumaimo manga incia atopadhencu minaaka i sorogaa tee indamo amembali ambuli iwe sumai. 9#Bhaa. 3:1; Luk. 10:18. Naga maoge sumai siitumo o ulo#12:9 ulo modhaangiana minaaka i zamani momangenge: Ulo incia sii isarongiaka Ibilisi tee mowujuna Adamu tee Hawa i Inawuna Eden to apewauaka dosa. Kamata Bhaa. 3:1-6. modhaangiana minaaka i zamani momangenge mokosaroakana Ibilisi tee Seetani mopasaladhalana bhari-bharia miana dunia sumai atopadhencu tee atotudhaaka i dunia apoose tee manga malaaʼekatina.

Laguna Mokanana

12:10-12

10 # Ayb. 1:9-11; Zak. 3:1. Kasiimpo kurango uka suara momakaa i sorogaa mopogauna,

"Sii-sii akawamo kasalaamati, kuasa, tee pamarintana Aulataʼalata,

tee kuasana Al Masi mopadhana ilantina Aulataʼala to moparintana dunia sii.

Roonamo Ibilisi moraeakana manga witinaita

malo tee eo i aroana Aulataʼalata,

padhamo atudhaakea i sambalina sorogaa.

11Manga witinaita padhamo apekatalo Ibilisi

tee raana Anana Dumba

tee kasakusii mobanara ipakawaakana manga incia.

Sakawana amate uka

manga incia arela akurubaniaka inyawana.

12Rampaakanamo sumai ukaunde-undemo, e sorogaa

tee bhari-bharia momboorena i nuncana!

Maka ucilakamo ingkomiu, e alamu tee tawo,

roonamo Ibilisi asapoikikomiu!

Incia apamurumo mpuu,

roonamo incia amataumea ande o wakutuuna amakasumo."

Naga Apajere Bhawine Sumai

12:13-18

13Wakutuuna naga sumai amataua ande incia atobhanakamo i dunia, incia apepuumo apajere bhawine mopalaahirina ana umane sumai. 14#Dan. 7:25; 12:7. Maka roonamo bhawine sumai adhawua sapasa panina manu-manu, mboomo panina bunia momaoge, mamudhaakana incia amembali apolaka i tampana i tana matuu, to atodhambaaka kangengena talu tao satanga, tee amaridho minaaka i ulo sumai. 15Sabutuna o ulo sumai, siitumo o naga, apalimba uwe minaaka i ngangana, tee o uwe sumai asiwulu mboomo umala i totona bhawine sumai, mamudhaakana o bhawine sumai apaampe. 16Maka o tana aumba aago bhawine sumai. Tana aponganga kasiimpo adhoku uwe molimbana minaaka i ngangana naga sumai. 17Naga sumai aʼamaramo mpuu tee bhawine sumai, kasiimpo incia alingka ahumbuni bhilaana siwuluna bhawine sumai, siitumo bhari-bharia mia motaʼatina i parintana Aulataʼala, tee modhawuna kasakusiina to Isa. 18Kasiimpo naga sumai akabhale-bhale i bhiwina tawo.

Currently Selected:

Wahiyuu 12: KMW

Highlight

Copy

Compare