Zaburu 89
89
Pojanjiana Kawasana Opu tee Raja Daud
89:1-53
1Lagu kaadharina Etan, miana Ezrahi.#89:1 Etan, miana Ezrahi: Sifatu aarifuna Etan tee Heman atomatau mpuu, ruamiaia o miana Ezrahi (kamata 88:1). Manga ahalii Kitabi Momangkilo aabhia ande o Etan miana Ezrahi sii satotuuna o saro mosagaanana to asarongiaka Yedutun, sala samia minaaka i talu mia (Asaf, Heman, tee Yedutun) ipatugasina Nabii Daud to akapalai lagu wakutuuna asambahea i Baitulla.
2Iaku bhekulaguaka lagu kaasina KAWASANA OPU molagina saʼumurua,
tee ngangaku bhekupakoleleaka pojanjiamu inda amabhotu saʼumurua zamani.
3Iaku kupogau, "Kaasimu molagina amatangka saʼumurua,
tee pojanjiamu inda momabhotu upatotapua i laiana."
4 #
2Sam. 7:12-16; 1Taw. 17:11-14; Zab. 132:11-12; Tul. 2:30. Kawasana Opu apogau, "Iaku padhamo kubhoke pojanjia tee mia ipiliku,
Iaku padhamo kupotunda tee Daud, bhatuaku,
5'Iaku bhekupatotapuaka manga siwulumu saʼumurua,
tee kubhangu kauncuramakamu to siwulumu naile itu.' " Sela
6E KAWASANA OPU, taroakamo manga mahalukuna sorogaa apuji manga giu inda momentela ipewaumu,
tee pojanjiamu inda momabhotu i tanga-tangana rombongana malaaʼekati mangkilo.
7Incema buaka i laiana momembalina mopodhimbana tee KAWASANA OPU?
Incema buaka modhaangiana i tanga-tangana mahalukuna sorogaa momembalina motopapokana tee KAWASANA OPU?
8Incia o Aulataʼala motohoromati i nuncana majilisina malaaʼekati momangkilo,
amaoge tee atomaeka alabhi minaaka i bhari-bharia modhaangiana i saripina.
9E KAWASANA OPU, Aulataʼalana saangua alamu,
incema buaka mopokanana tee ingkoo? Ingkoo umakaa, e KAWASANA OPU,
tee sadia ubukeaka pojanjia inda momabhotu.
10Ingkoo mokuasaina ewona tawo;
ande o ewo amalanga, Ingkoo mopekalinoa.
11Ingkoo mopahancuruna Rahab#89:11 Rahab: Mahaluku seetani. mboomo maeati;
Ingkoo mopapogaa-gaana manga musumu tee kakaamu.
12Laiana o pewauamu tee o alamu o pewauamu uka.
Ingkoo mopadhaangiana dunia tee bhari-bharia antona.
13Napa tee salata, Ingkoo mopadhaangiaia;
Gunu Tabor tee Hermon uka asambo-sambo roonamo saromu.
14Limamu amaoge,
lima kaanamu atopekalanga tee kakaana momulia.
15Kabanara tee kaʼadili amembali o fondasina kauncuramakamu,
kaasi molagina tee pojanjiamu inda momabhotu atokamata i nuncana bhari-bharia pewaumu.
16Amasanaamo o lipu mosambo-sambona mopujiko,
modhadhina i nuncana caheana roumu, e KAWASANA OPU!
17Roonamo saromu manga incia akaunde-unde saeoa,
tee roonamo kabanaramu manga incia apujiko.
18Ingkoo o kamuliana kakaana manga incia,
tee roonamo kalapemu, ingkami tahandamo tamakaa.
19Katangkesimami o pewauana KAWASANA OPU,
siitumo o rajamami pewauana Aulataʼala Momangkilo isombana miana Israel.
20I piamo itu, i nuncana pokamataana mia Ingkoo ufirimani
i manga mia motaʼatiko, mboosii,
"Iaku padhamo kutulungi samia o mia mobarani,
Iaku padhamo kupekalanga samia ipiliku minaaka i lipu sumai.
21 #
1Sam. 13:14; 16:12; Tul. 13:32. Iaku padhamo kupokawaaka Daud, o bhatuaku,
tee padhamo kulantia tee mina hususuku momangkilo.
22Limaku sadhaadhaa bheajagania,
sampemo limaku uka bhekupekatangkaakea.
23Musu inda bheamembali ahumbunia,
tee inda bheapisakia mia madhaki.
24Iaku bhekupahancuru manga bhalina i aroana,
tee kupabinasa manga mia mobancia.
25Pojanjiaku inda bheamabhotu tee kaasiku molagina bheapobhawa tee incia,
tee roonamo saroku o bheajulu o kakaana.
26Iaku bhekupamembali limana akuasai tawo,
tee o lima kaanana akuasai manga umala.
27Incia bheagora i Iaku, 'Ingkoomo o Amaku,
Aulataʼalaku, tee gunu bhatu mopasalaamatiaku!'
28 #
Wah. 1:5. Iaku uka bhekuangkea to amembali ana tumpeku,
tee kupamembalia momalangana mpuu minaaka i bhari-bharia manga raja i dunia.
29To saʼumurua bhekudhambaakea o kaasiku molagina to incia,
tee o pojanjiaku tee incia bheasadhaadhaa amatangka.
30Bhekupewaua o siwuluna adhaangia saʼumurua,
tee o kauncuramakana bhekupotaangiakea kangengena laiana dhaangiapo i bhawona dunia.
31Ande manga anana inda ataʼati tee hukumuku,
tee o dhadhina inda aose tuturaku,
32tee ande manga incia inda aose opea mopadhana ipatotapuakaku,
tee inda aose manga parintaku,
33sumaimo bhekuhukumua manga incia tee kasambina lauro,
tee bhekubhebhea roonamo dosana manga incia.
34Maka Iaku inda bhekubhotukia o kaasiku molagina to incia,
tee inda bhekumalinguakea pojanjiaku inda momabhotu.
35Iaku sadhaadhaa kupamondo pojanjiaku,
tee opea mopadhana ifirimaniakaku inda bhekubhaliia.
36Sampearo to saʼumurua Iaku kusumpa to kangkilona saroku,
tee inda bhekugau-gau Daud.
37Siwuluna bheadhaangia to saʼumurua,
tee o kauncuramakana bheasadhaadhaa i aroaku mboomo matanaeo,
38bheasadhaadhaa saʼumurua mboomo bula,
mosakusiiakea minaaka i laiana." Sela
39Maka sii-sii Ingkoo umendeua tee ubholia;
Ingkoo upamuru tee mia mopadhana ilantimu.
40Ingkoo ubhotuki janjimu tee bhatuamu,
tee o mahakotana upekarombuakea tee ngawuna tana.
41Upatobhatea bhari-bharia manga rindina kotana,
tee upahancurua manga bentena.
42Bhari-bharia mia molalo amanako pewauana;
incia amembali giuna kaele-ele to manga sarimbanuana.
43Ingkoo upekalanga lima kaanana manga bhalina,
tee bhari-bharia musuna upewaua akaunde-unde.
44Ingkoo uka upamembali matana ewangana rajamami inda akoampadhea,
tee inda utulungia i nuncana potimbea.
45Upauntoa o kuasana momuliana,
tee o kauncuramakana utudhaakea i tana.
46Upekampodhoa o umuruna rajamami wakutuuna amangura,
tee usalibumbungiakea tee kaea. Sela
47Sakawana naepia uka e KAWASANA OPU? Buaka bheubuniaka karomu saʼumurua?
Sakawana naepia o pamurumu akarore-rore mboomo waa?
48Udhania, tapanamo kampodho o dhadhiku sii,
tapanamo sia-siana dhadhina bhari-bharia maanusia ipadhaangiamu!
49Incema buaka o maanusia momembalina modhadhina torosu tee inda amate?
Tee incema momembalina mopasalaamatina inyawana tee alapa minaaka i mate? Sela
50E Kawasana Opu, i iapai o kaasimu molagina i piamo itu
mopadhana ijanjiakamu to Daud tee katunda i nuncana pojanjiamu inda momabhotu?
51E Kawasana Opu, udhania tuaapa o bhatuamu sii atohina;
incaku atanggo kahinana bhari lipu.
52Manga musumu ahina raja mopadhana ilantimu, e KAWASANA OPU,
manga incia aele-elea iapaipo uka o lingkaana.
53Pujimo KAWASANA OPU to saʼumurua!
Aamin, ya aamin!
Currently Selected:
Zaburu 89: KMW
Highlight
Copy
Compare
Share
Want to have your highlights saved across all your devices? Sign up or sign in
Ongoing © Wycliffe Bible Translators, Inc
