Zaburu 74
74
Laguna Kaporona Inca roonamo Bhanua Momangkilo Atopahancuru
74:1-23
1Lagu kaadharina Asaf.
E Aulataʼala, pokia Ingkoo ubhanaka ingkami? Buaka ingkami tatomendeu saʼumurua?
Pokia pamurumu akarore-rore tee manga dumba igembalamu?
2Maasangia uudhania o uumatimu mopadhana ipotibhaakamu i piamo itu,
lipu mopadhana itolosimu amembali lipu tinaurakamu.
Udhania Gunu Sion,
tampa mopadhana iumbatimu to umbooresia.
3Paporopea bhengkalamu i tampa mohancuru saʼumurua sumai;
bhari-bharia bara i nuncana tampa momangkilo padhamo apahancurua musu.
4Manga bhalimu akakee-kee, "Takanamo!" i tampamu momangkilo,
tee apakaro manga tombi to tandana ande manga incia akana minaaka i ingkami.
5Atokamata mboomo mia moangkana ndamuna apekalanga-langea
to apale manga puuna kau i koo.
6Bhari-bharia bara ibheloki
andamua tee apalua.
7Manga incia atunu bhanua ibaadatimu sakawana arata tee tana,
tee apanaajisi tampana mbooresamu.#74:7 mbooresamu: I nuncana pogau Ibrani, "tampa mbooresana saromu;" sarona Aulataʼala apokana tee Aulataʼala karona.
8I nuncana ngangarandana manga incia apogau,
"Mai tapisakia bhari-bharia!"
Manga incia atunu bhari-bharia tampana ibaadati i lipu sii.
9Ingkami indamo uka takamata manga tanda inda momentela,
samia nabii uka inda dhaangia,
inda samia uka i tanga-tangamami momataua
sakawana naepia bhari-bharia sii amembali.
10E Aulataʼala, sakawana naepia manga bhali bheaele-eleko?
Buaka saʼumurua o musu bheahina saromu?
11Pokia Ingkoo uhelaia pendua o lima kaanamu?
Pokia Ingkoo soo usaku-saku limamu? Pepadhaimea manga incia!
12Maka o Aulataʼala o rajaku minaaka i piamo itu.
Incia mopasalaamatina ingkami i dunia.
13 #
Limb. 14:21. Tee kakaamu Ingkoo uweta tawo,
tee upasaki bhaana manga Lewiatan i tawo.
14 #
Ayb. 40:20; Zab. 104:26; Yes. 27:1. Ingkoo upekapuro manga bhaana Lewiatan,#74:14 Lewiatan: Mahalukuna tawo mboomo naga.
tee upamembalia kinandena manga binata momboorena i tana matuu.
15Ingkoo mobungkalena matana uwe tee umala;
sainamo manga umala mokouwena torotorosu, upekatuua.
16Ingkoomo mopadhaangiana eo tee malo,
Ingkoomo modhikana matanaeo tee bula.
17Ingkoo mopatotapuakana bhari-bharia tidhana alamu,
Ingkoo mopewauna bulaana paneeo tee bulaana wao.
18Udhania tuaapa o musumu aele-eleko, e KAWASANA OPU,
lipu mokaafiri ahina saromu.
19Bholi upasaraaka inyawana manu-manu jarajaramu i binata masega,
tee bholi umalinguakea to saʼumurua inyawana uumatimu motopisaki.
20Udhania o pojanjia ipewaumu tee ingkami,
roonamo manga tampa malalanda i dunia sii abukeaka tee manga mia mopewauna kasega.
21Bholi utaroakea o mia motopisaki ambuli atopekaea,
maka maasangia o mia monarakaa tee mia misikini bheapuji saromu.
22E Aulataʼala, bhangumo, ewaakea o parakaramu;
udhania ande manga mia mokaafiri ahinako saeoa.
23Bholi umalinguakea o suarana manga bhalimu,
tee o karobhona manga mia moewangiko apene torotorosu.
Currently Selected:
Zaburu 74: KMW
Highlight
Copy
Compare
Share
Want to have your highlights saved across all your devices? Sign up or sign in
Ongoing © Wycliffe Bible Translators, Inc
