Zaburu 72
72
Doʼa Iharapuaka to Raja
72:1-20
1Zaburuna Sulaiman.#72:1 Sulaiman o anana Raja Daud momembalina rajana Israel sapadhana Daud.
E Kawasana Opu, dhawuakea o kaʼadilimu to raja,
tee udhawuakea o kabanaramu to anana raja.
2Maasangia incia aʼadili uumatimu tee kabanara,
tee aʼadili apewau mia motopisaki.
3Maasangia manga gunu aumbaaka kasanaa to raʼeati,
tee manga kabumbu ahasiliaka kabanara.
4Maasangia incia bheaewaaka parakarana
manga mia motopisaki i tanga-tangana raʼeati,
apasalaamati manga mia misikini
tee apahancuru manga pande pisaki.
5Maasangia manga incia bheamaeka i Ingkoo
kangengena dhaangia tee matanaeo
tee kangengena dhaangia tee bula,
saʼumurua.
6Maasangia raja incia sumai mboomo uwena wao mosapona
i bhawona rumpu mopadhana motoweli,
tee mboomo wao maranca mobubusina dunia.
7Maasangia o kabanara sadhaadhaa aniʼimatia raʼeati kangengena raja dhaangiapo adhadhi,
tee o kasanaa ataralabhi-labhi sakawana bula indamo dhaangia.
8Incia bheakokuasa minaaka i tawo sakawana i tawo,
minaaka i Umala Efrat sakawana i tapana dunia.
9Manga mia momboorena i tana matuu
bheatungku i aroana,
tee manga musuna adhelapi ngawuna tana.
10Maasangia manga raja minaaka i Tarsis tee manga raja minaaka i pulo-pulo mosagaanana
bheabhawaakea hadia.
Maasangia manga raja minaaka i Syeba tee Seba
abhawa pasombaa to incia.
11Maasangia bhari-bharia raja bheasuju i aroana,
tee bhari-bharia lipu apabhatua karona i incia.
12Roonamo incia bhearambasaka mia misikini mogorana i incia,
tee atolosi mia motopisaki tee mia inda mototulungi.
13Incia bheamaasiaka mia misikini tee mia monarakaa,
tee apasalaamati inyawana mia inda mokokadhaangia.
14Tee bheatolosi dhadhina manga incia minaaka i mia masega tee mopisakina manga incia,
sababuna o dhadhina manga incia akoharagaa mpuu i matana.
15Maasangia amarambe o umuruna!
Maasangia o bulawa minaaka i Syeba atopasombaaka to incia.
Maasangia incia sadia atodoʼaaka,
tee saeoa o mia aemaniakea barakati.
16Maasangia o gandum ataralabhi-labhi i saangua lipu,
akawea i lolona gunu.
Maasangia o hasilina tanana asuburu mboomo i Libanon,
tee o raʼeatina kotana ajulu o kabharina mboomo rumpu i tana lapa.
17Maasangia o sarona raja atoudhani saʼumurua,
maasangia sahandana abhari o mia momatauna sarona, kangengena dhaangiapo tee matanaeo.
Maasangia bhari-bharia lipu bheapotibhaaka barakati roonamo incia,
tee bhari-bharia lipu asarongiakea amasanaa.
18Atopujimo KAWASANA OPU, siitumo Aulataʼala isombana miana Israel,
mopewauna manga giu inda momentela samia-miana!
19Atopujimo sarona momuliana saʼumurua!
Maasangia saangua alamu abukeaka tee kamuliangina.
Aamin, aamin!
20Mboo siimo kapadhaana doʼana Daud bin Isai.
Currently Selected:
Zaburu 72: KMW
Highlight
Copy
Compare
Share
Want to have your highlights saved across all your devices? Sign up or sign in
Ongoing © Wycliffe Bible Translators, Inc
