Zaburu 119
119
Amasanaamo Mia Moosena Hukumuna KAWASANA OPU#119:1 Zaburu 119 akoantoaka manga kapujia to Hukumuna Aulataʼala idhawuakana to miana Israel alaloi Nabii Musa. Zaburu 119 apake modele akrostik (apokana tee Zaburu 9-10, 25, 34, 37, 111, 112). Polanciringana pogau akrostik asusuaka modelena kabhanti mopakena horofu Ibrani atosau-sau malape i auwalina saasaangu aeati. Jadi, walu aeati i nuncana weta bhaa-bhaana i nuncana Zaburu 119 apepuungia tee horofu Ibrani, alef; walu aeati i nuncana weta i ruaanguna apepuungia tee horofu i ruaanguna oni Ibrani, bet; walu aeati i nuncana weta i taluanguna apepuungia tee horofu i taluanguna oni Ibrani, gimel; tee mosagaanana uka. #119:1 Zaburu 119 apogauakea ande manga hukumu ipakawaakana i Musa, siitumo o Taurati, giu incia sumai aminaaka i Aulataʼala, mencuana minaaka i maanusia. Kawasana Opu mokarajaaia tee mopatotapua.
119:1-176
1Amasanaamo mia modhadhina inda tee kasalahana,
tee adhadhi aose hukumuna KAWASANA OPU.
2Amasanaamo mia moosena manga tuturana,
mopeeloa tee mpuu-mpuuna incana,
3tee inda apewau kadhaki,
maka adhadhi aose manga dhalana.
4Manga kasameamu padhamo upatotapuakea,
mamudhaakana atokeniaka mpuu-mpuu.
5Maasangia o bhengkalaku amatangka
mamudhaakana kuosea mpuu-mpuu manga katotapumu!
6Sumaimo, iaku inda bhekupotibhaaka kaea
ande iaku kuperangoi bhari-bharia parintamu.
7Iaku bhekusukuru i Ingkoo tee kakatena totona incaku
wakutuuna kupengkaadhariaka manga tuturamu mobanara
8Iaku bhekukeniakea mpuu-mpuu manga katotapumu,
bholi sampeampearo ubholiaku.
9Tee opea o mia mangura ajagani pemingkuina mamudhaakana sadhaadhaa amangkilo?
Ajagania alaloi pemingkuina apokana tee firimanimu.
10Iaku kupeeloko tee mpuu-mpuuna incaku;
bholi utaroakaaku kusaladhala minaaka i parintamu.
11Firimanimu kudhikaia i nuncana ngangarandaku
mamudhaakana inda kukodosa tee Ingkoo.
12Bhari-bharia kapujia to Ingkoo, e KAWASANA OPU!
Adhariakaaku manga katotapumu.
13Tee bhiwiku kupetulatulaaka
bhari-bharia tutura ibhoasakamu.
14Iaku kukaunde-unde kuose manga tuturamu,
mboomo mokopewauaakana sagala giuna harataa.
15Iaku bhekufikiria mpuu-mpuu manga kasameamu,
tee bhekukamatea manga dhalamu.
16Iaku bhekukaunde-unde roonamo manga katotapumu,
tee inda bhekumalinguakea o firimanimu.
17Pewaumo giu malape i bhatuamu mamudhaakana sadhaadhaa kudhadhi,
tee bhekukeniakea mpuu-mpuu o firimanimu.
18Bungkalea o mataku mamudhaakana bhekukamata
manga giu inda momentela minaaka i hukumumu.
19Iaku samia dhaga i dunia sii,
bholi ubuniakea o parintamu minaaka i karoku.
20Incaku amapii roonamo sadia kupemeliliaka manga tuturamu.
21Ingkoo ugorampangi manga mia mosombo, siitumo manga mia mototunda,
mosaladhalana minaaka i parintamu.
22Pekaridhoakaaku minaaka i kaele-ele tee kahinana manga incia,
roonamo kuose manga tuturamu.
23Moomini manga kaogesa apomufakati to aewangiaku,
bhatuamu sii bheafikiria mpuu-mpuu manga katotapumu.
24Manga tuturamu amembali kapeeluku
tee amembali monaasehatiaku.
25Inyawaku apika tee ngawu roonamo kumatalo;
padhadhiaku apokana tee firimanimu.
26Iaku padhamo kupetulatulaaka dhalana dhadiku, Ingkoo ulawaniaku;
adhariakaaku manga katotapumu.
27Tulungiaku mamudhaakana kumembali kumaʼanaia manga kasameamu,
sumaimo iaku bhekufikiria mpuu-mpuu manga pewaumu inda momentela sumai.
28Inyawaku atangi roonamo kaporona inca,
pekatangkaaku apokana mboomo firimanimu.
29Pekaridhoakaaku minaaka i dhala inda mobanara,
tee roonamo kalapena incamu, uadhariakaakumo o hukumumu.
30Iaku kupili dhala mobanara;
manga tuturamu padhamo kudhikaia i aroaku.
31Iaku padhamo kukeniaka bhari-bharia o tuturamu, e KAWASANA OPU;
bholi utaroakaaku kupotibhaaka kaea.
32Iaku kuose manga parinta isusuakamu
roonamo Ingkoo mopekalalesana ngangarandaku.
33E KAWASANA OPU, adhariakaaku manga katotapumu
sumaimo bhekuosea sakawana kumate.
34Pamembaliaku kumaʼanaia hukumumu mamudhaakana kutaʼatia,
tee kukeniakea pekatangka tee mpuu-mpuuna incaku.
35Tondaakumo mamudhaakana kudhadhi kuose manga parintamu,
roonamo giumo incia sumai ipeeluku.
36Pamembalia o ngangarandaku to aose manga tuturamu,
mencuana kupeelo laba.
37Pekaridhoakaaku o mataku minaaka i manga giu mosia-sia,
padhadhiaku i nuncana manga dhalamu.
38Pekatangkea o janjimu i bhatuamu,
idhawuakamu to mia momaekako.
39Pekaridhoakaaku o kahina imaekaku sumai
roonamo manga tuturamu amalape.
40Satotuuna kupemeliliaka manga kasameamu;
padhadhiaku i nuncana kabanaramu.
41E KAWASANA OPU, maasangia o kaasimu molagina aumbatiaku,
tee o kasalaamatimu apokana tee janjimu.
42Tee mboo sumai, amembali kulawani manga mia mohinaaku
roonamo kuparacaea i Firimanimu.
43Bholi sampeampearo ualea pendua manga firimanimu mobanara minaaka i ngangaku,
roonamo kuparacaea tee tuturamu.
44Iaku bhekutorotorosu kukeniakea pekatangka o hukumumu
to saʼumurua.
45Iaku bhekudhadhi i nuncana kalalesa
roonamo kupeelo manga kasameamu.
46Iaku uka bhekupogauaka manga tuturamu i aroana manga raja,
tee iaku inda bhekumaea.
47Iaku kumasanaa roonamo manga parintamu
imaasiakaku sumai.
48Iaku bhekuangka limaku to kumuliangiaka manga parintamu imaasiakaku sumai,
tee bhekufikiria mpuu-mpuu manga katotapumu.
49Udhania o firimani ipakawaakamu to bhatuamu
roonamo firimanimu sumai mopamembaliaku dhaangia tee iharapuku.
50Siimo mohiburuaku i nuncana kanarakaaku
ande o janjimu sumai mopadhadhiaku.
51Mia mosombo ahinaaku mpuu,
maka iaku inda kusaladhala minaaka i hukumumu.
52Wakutuuna kuudhani manga tuturamu modhaangiana minaaka i piamo itu,
sumaimo atohiburumo incaku, e KAWASANA OPU.
53Amasodho o ngangarandaku roonamo mia madhaki
tee mia inda moosena hukumumu.
54Kangengena dhadhiku momampodho i alamu sii,
katotapumu kupamembalia manga lagu kapujiaku.
55Wakutuuna amalo kuudhanimo saromu, e KAWASANA OPU,
tee kukeniakea pekatangka o hukumumu.
56Barakatimo incia sii momembalina dhawuku
roonamo padhamo kuose manga kasameamu.
57KAWASANA OPU o dhawuku,
iaku padhamo kupojanji to kukeniakea pekatangka o firimanimu.
58Iaku kuemani kaasina incamu tee mpuu-mpuuna incaku,
maasiakaaku apokana tee janjimu.
59Iaku kufikiri dhalana dhadhiku,
tee kubhotukiakea to kumbuli kuose manga tuturamu;
60kupekadhei tee inda kupekanoe-noe
to kukeniakea pekatangka manga parintamu.
61Mia madhaki ataakaaku katapu,
maka iaku inda kumalinguaka hukumumu.
62Pontanga malo iaku bhekubhangu to kupujiko,
roonamo manga tuturamu mobanara.
63Iaku kuposabhangka tee bhari-bharia mia momaekako,
tee mokenina pekatangka manga kasameamu.
64E KAWASANA OPU, alamu sii abukeaka tee kaasimu molagina;
adhariakaaku manga katotapumu.
65Ingkoo padhamo upewau kalape i bhatuamu,
apokana tee firimanimu, e KAWASANA OPU.
66Dhawuakaaku hikimati tee ilimuu,
roonamo kuparacaea tee manga parintamu.
67Wakutuuna indapo uhukumuaku, iaku kusaladhala,
maka sii-sii kukeniakea pekatangka o firimanimu.
68Ingkoo umalape tee upewau kalape;
adhariakaaku manga katotapumu.
69Mia mosombo afitanaaku,
maka iaku kuose manga kasameamu tee mpuu-mpuuna incaku.
70Incana manga incia amakapa mboomo tabha sabutuna inda anamisi opeopea,
maka iaku kumaasiaka hukumumu.
71Amalape uka to iaku ande kutopisaki
mamudhaakana kumembali kupengkaadhariaka manga katotapumu.
72Hukumu ibhoasakamu alabhi o kalapena to iaku
minaaka i rewuna tibhana bulawa tee pera.
73Limamumo mopamembaliaku tee mopebhanguiaku;
dhawuaku katau mamudhaakana kumembali kupengkaadhariaka manga parintamu.
74Manga mia momaekako bheakamataaku tee akaunde-unde
roonamo kuharapu i firimanimu.
75E KAWASANA OPU, iaku kumataua ande o tuturamu abanara,
tee moomini padhamo upanarakaaku, Ingkoo sadhaadhaa umembali utoparacaea.
76Taroakamo kaasimu molagina mohiburuaku,
apokana tee janjimu i bhatuamu.
77Taroakamo rahumatimu aumba i iaku mamudhaakana kudhadhi,
roonamo hukumumu satotuuna ipeeluku.
78Taroakamo mia mosombo amaea,
roonamo manga incia afitanaaku inda tee sababuna,
maka iaku bhekufikiria mpuu-mpuu manga kasameamu.
79Taroakamo manga mia momaekako aumbatiaku,
siitumo manga incia momatauna manga tuturamu.
80Maasangia o ngangarandaku inda alimba minaaka i manga katotapumu
mamudhaakana iaku inda kupotibhaaka kaea.
81Ngangarandaku apemeliliaka kasalaamati minaaka i Ingkoo,
iaku kuharapu i firimanimu.
82Mataku amarea roonamo kupemeliliaka janjimu;
iaku kupogau, "Naepia buaka Ingkoo bheuhiburuaku?"
83Moomini iaku mboomo saangu kadhuna angguru momalusa,
iaku inda kumalinguakea manga katotapumu.
84Sakawana naepia buaka o bhatuamu tabeana bheaantagiko?
Naepia buaka Ingkoo bheuhukumu manga mia mopajereaku?
85Manga mia mosombo padhamo aseli kabhalongko to karoku,
siitumo manga mia inda motaʼatina tee hukumumu.
86Bhari-bharia parintamu atoparacaea.
Tulungiaku, roonamo manga incia apajereaku inda tee sababuna!
87Saidhepo manga incia apekamateaku,
maka iaku inda kubholia manga kasameamu.
88Padhadhiaku apokana tee kaasimu molagina
mamudhaakana kukeniakea mpuu-mpuu manga tutura ipakawaakamu.
89E KAWASANA OPU, firimanimu amatangka
saʼumurua i sorogaa.
90Ingkoo amembali utoparacaea saʼumurua zamani;
Ingkoo upekatangka alamu sabutuna asadhaadhaa adhaangia.
91Manga tuturamu asadhaadhaa sakawana sii-sii
roonamo bhari-bharia modhaangia o bhatuamu.
92Ande o hukumumu inda amembali giu imasanaakana incaku,
sumaimo dhaanamo kubinasa i nuncana kanarakaaku.
93Inda sampeampearo bhekumalinguakea manga kasameamu,
roonamo alaloi bhari-bharia giu incia sumai Ingkoo upadhadhiaku.
94Iaku sii o pewauamu; pasalaamatiaku,
roonamo iaku padhamo kupeeloa manga kasameamu.
95Manga mia madhaki aantagiaku to apabinasaaku,
maka iaku bhekufikiria mpuu-mpuu manga tuturamu.
96Bhari-bharia ikamataku dhaangia tee batasina, moomini o giu mosangka,
maka o parintamu amaewa mpuu.
97Tapanamo kumaasiakea o hukumumu!
Iaku kufikiria mpuu-mpuu saeoa.
98Manga parintamu apamembaliaku kuʼaarifu minaaka i manga musuku,
roonamo bhari-bharia giu incia sumai sadia adhaangia i karoku.
99Katauku alabhi o kabharina minaaka imatauna manga guruku,
roonamo kufikiria mpuu-mpuu manga tuturamu.
100Kumembali kumaʼanaia alabhi minaaka i manga mancuana,
roonamo iaku kuose manga kasameamu.
101Kutaangia o aeku minaaka i bhari-bharia pewau madhaki,
mamudhaakana kumembali kukenia mpuu-mpuu o firimanimu.
102Iaku inda kusaladhala minaaka i manga tuturamu,
roonamo Ingkoomo mopadhana moadhariaku.
103Tapanamo kameko o firimanimu,
alabhi o kamekona minaaka i golana uwani!
104Minaaka i manga kasameamu kupotibhaaka katau,
siitumo sababuna kubancia bhari-bharia dhala inda mobanara.
105Firimanimu mboomo kanturu mosuluwina bhengkalaku,
tee mopekainawana dhalaku.
106Iaku padhamo kuposumpa tee bhekupekatangkea pendua,
ande bhekukeniakea mpuu manga tuturamu mobanarana sumai.
107Iaku kunarakaa mpuu,
e KAWASANA OPU, padhadhiaku pendua apokana tee firimanimu.
108Maasangia utarimaia o pasombaana karelana incaku, siitumo manga kapujiaku, e KAWASANA OPU,
tee uadhariakaaku manga tuturamu.
109Iaku sadia kutaaka inyawaku,
maka iaku inda kumalinguakea o hukumumu.
110Manga mia madhaki ataa katapu to iaku,
maka iaku inda kusaladhala minaaka i manga kasameamu.
111Manga tuturamu kupamembalia dhawuku mobakaa,
roonamo bhari-bharia sumai satotuuna mopaunde-undena incaku.
112Iaku padhamo kubhawea o ngangarandaku to kupewauaka manga katotapumu
to saʼumurua, sakawana aahirina dhadhiku.
113Iaku kubancia manga mia inda mototona incana,
maka kumaasiakea o hukumumu.
114Ingkoomo tampana peulusaku tee katangkesi mojaganiaku;
iaku kuharapu i firimanimu.
115Pekaridhomo minaaka i iaku, e manga mia mopewauna madhaki,
mamudhaakana kumembali kuose manga parintana Aulataʼalaku.
116Pekakaaku apokana tee janjimu mamudhaakana kudhadhi,
tee bholi upekaeaaku i nuncana harapuku.
117Tukoaku mamudhaakana kutopasalaamati,
tee sadia bhekuhoromatia manga katotapumu.
118Ingkoo umendeu bhari-bharia mia mosaladhalana minaaka i manga katotapumu,
roonamo inda akoguna o katipuna manga incia.
119Ingkoo uabhia bhari-bharia mia madhaki i alamu mboomo karombuna pera;
siitumo sababuna kumaasiakea manga tuturamu.
120Badaku arengku roonamo kumeakako,
tee kumaeka tee manga tuturamu.
121Iaku padhamo kupewau kaʼadili tee kabanara,
bholi upasaraakaaku i manga mia mopisakiaku.
122Pojanjimo ande o bhatuamu bheamalape;
bholi utaroakaaku apisakiaku manga mia mosombo.
123Mataku amarea roonamo kuantaantagi kasalaamati minaaka i Ingkoo,
tee utolosia o janjimu mobanara sumai.
124Pewaumo to iaku apokana tee kaasimu molagina,
tee uadhariakaaku manga katotapumu.
125Iaku o bhatuamu; dhawuaku maʼana,
mamudhaakana kumataua manga tuturamu.
126Akawamo wakutuuna to KAWASANA OPU abhangu tee ahukumu manga incia,
roonamo manga incia inda ataʼati hukumumu.
127Siitumo sababuna, kumaasiaka manga parintamu
alabhi minaaka i bulawa, alabhi minaaka i bulawa asilii.
128Siitumo sababuna, kupekakate dhalaku to kuose bhari-bharia kasameamu;
tee kubancia bhari-bharia dhala inda mobanara.
129Manga tuturamu inda amentela;
sababuna sumai kuosea.
130Wakutuuna firimanimu sumai atopatinda, amembali adhawuaka kainawa
tee adhawuaka maʼana to mia inda momatauna opeopea.
131Iaku kubungkale ngangaku tee kukahaahaa,
roonamo kupemeliliaka manga parintamu.
132Tontoakumo tee umaasiakaakumo,
mboomo kananea ipewaumu to mia momaasiakana saromu.
133Pekatangkea o bhengkalaku tee firimanimu,
tee bholi utaroakaaku akuasaiaku kadhaki.
134Tolosiakumo minaaka i manga mia mopisakiaku
mamudhaakana kumembali kukeniakea mpuu-mpuu manga kasameamu.
135Taroakamo roumu akocahea i bhawona karoku,
tee uadhariakaaku manga katotapumu.
136Loluku asiwulu mboomo umala,
roonamo mia inda akeniakea mpuu-mpuu o hukumumu.
137E KAWASANA OPU, Ingkoo uʼadili
tee manga tuturamu uka abanara.
138Manga tuturamu padhamo upatotapuakea i nuncana kabanara
tee alaenga atoparacaea.
139Amaraku ahanda mpuu i nuncana karoku
roonamo manga musuku amalinguaka firimanimu.
140Janjimu atouji mpuu;
rampaakanamo sumai kumaasiakea.
141Iaku sii kumaidhiidhi tee kumembali mia mohina,
maka iaku inda kumalinguakea manga kasameamu.
142Kabanaramu atotuu saʼumurua,
tee o hukumumu atoparacaea.
143Kaseke tee kanarakaa akangkanaiaku,
maka manga parintamu apasanaa ngangarandaku.
144Manga tuturamu abanara saʼumurua;
dhawuaku katau mamudhaakana kudhadhi.
145Iaku kugora tee mpuu-mpuuna incaku; lawaniakumo, e KAWASANA OPU.
Iaku bhekuosea manga katotapumu.
146Iaku kugora i Ingkoo; pasalaamatiaku,
mamudhaakana bhekukenia mpuu-mpuu manga tuturamu.
147Indapo raneeooge, kubhangumo tee kugora kuemani tulungi;
iaku kuharapu i firimanimu.
148Samaloa inda kukole
mamudhaakana amembali kufikiria mpuu-mpuu o firimanimu.
149Maasangia urangoa o doʼaku apokana tee kaasimu molagina.
E KAWASANA OPU, padhadhiaku apokana tee kaʼadilimu.
150Manga mia mopajereaku tee haejati madhaki amakasumo;
manga incia amaridho minaaka i hukumumu.
151Maka Ingkoo umakasu, e KAWASANA OPU,
tee bhari-bharia parintamu abanara.
152Minaaka i piamo itu kumataua minaaka i manga tuturamu
ande Ingkoo padhamo upatotapuakea to saʼumurua.
153Kamatamea o kanarakaaku tee upasalaamatiakumo,
roonamo inda kumalinguakea o hukumumu.
154Ewaakea o parakaraku tee upabebasiaku,
padhadhiaku apokana mboomo janjimu.
155Kasalaamatimu sumai amaridho minaaka i manga mia madhaki
roonamo manga incia inda apeelo katotapumu.
156Tapanamo kaoge o rahumatimu, e KAWASANA OPU!
Padhadhiaku apokana mboomo manga tuturamu.
157Abhari o mia mopajereaku tee momusuiaku,
maka inda kusaladhala minaaka i manga tuturamu.
158Iaku kumarikaia manga pande hiaanati sumai,
roonamo manga incia inda aose firimanimu.
159Kamatea tapanamo kaasiku tee manga kasameamu, e KAWASANA OPU!
Jagania o inyawaku apokana tee kaasimu molagina.
160Bhari-bharia ipogauakamu atotuu,
tee bhari-bharia tuturamu mobanara sumai abakaa saʼumurua.
161Manga kaogesa apajereaku inda tee sababuna,
maka tangkanamo firimanimu imaekaku.
162Janjimu apewauaku kukaunde-unde,
mboomo mia mopotibhaakana harataa mobhari minaaka i potimbea.
163Bhari-bharia kagau-gau kubancia,
maka o hukumumu kumaasiakea.
164Pitu mpearo saeo kupujiko,
roonamo tuturamu moʼadili.
165Mia momaasiakana hukumumu aʼamani tee amasanaa o dhadhina,
inda dhaangia giu momembalina imandawuakana manga incia.
166Iaku kuantagi kasalaamati minaaka i Ingkoo, e KAWASANA OPU,
tee manga parintamu kupewaua.
167Iaku kutaʼatia manga tuturamu,
tee kumaasiakea tee mpuu-mpuuna incaku.
168Iaku kutaʼati manga kasameamu tee tuturamu,
roonamo ukamatea sagala giu ipewauku.
169Maasangia o goraku akawa i Ingkoo, e KAWASANA OPU;
dhawuaku maʼana mopokanana tee janjimu.
170Taroakamo iemaniku akawa i Ingkoo;
pasalaamatiaku apokana tee janjimu.
171Taroakamo bhiwiku sadia apujiko,
roonamo padhamo uadhariakaaku manga katotapumu.
172Taroakamo o dhelaku alaguaka janjimu,
roonamo bhari-bharia parintamu abanara.
173Taroakamo limamu sadia atulungiaku,
roonamo iaku padhamo kupili manga kasameamu.
174Iaku kupemeliliaka kasalaamati minaaka i Ingkoo, e KAWASANA OPU,
tee o hukumumu apaunde-undeaku.
175Taroakamo kudhadhi, mamudhaakana kupujiko,
tee maasangia manga tuturamu atulungiaku.
176Iaku kusaladhala mboomo dumba momambuu;
sumaimo uumbamo tee upokawaaka bhatuamu,
roonamo inda kumalinguakea manga parintamu.
Currently Selected:
Zaburu 119: KMW
Highlight
Copy
Compare
Share
Want to have your highlights saved across all your devices? Sign up or sign in
Ongoing © Wycliffe Bible Translators, Inc
