Ennanga 2
2
Masiha ye Mwâmi w’e Siyoni n’ow’igulu lyoshi
1Kwo kurhi oku amashanja gakunire,
ganadwîrhe gahiga emihigo y’obusha?
2Abâmi b’igulu bamâhuluza engoma,
nabo abaluzi bamâja ihano
mpu bagomere Nnâmahanga n’omwîshogwa wâge.
3«Mpu: emigozi yâbo rhuyitwe,
rhunakabulire omuzigo gwâbo kuli nîrhu!»
4Omu bwâmi bwâge Nnâmahanga adwîrhe asinz’emalunga,
Nyakasane adwîrhe abashekera.
5Amâkunira amâbashuza,
omu bukunizi bwâge amâbayobohya.
6Erhi: «Niene nayimikaga Omwâmi wâni oku Siyoni»,
«Oku ntondo yâni ntagatîfu».
7Lekagi nâni mmubwîre akanwa ka Nnâmahanga; àmbwîzire, erhi:
«Oli mugala wâni, nie nkubusire ene».
8Ompûne eci wankalonza,
nâni nâkuhà ebihugo byoshi bibè hyâwe.
9«Wabamalîra n’engôrho yâwe»,
«onabavungunyule nka mubumbi wabera enyungu.»
10Lêro, mw’oyo bâmi, muyumve,
ninyu batwî b’emmanja b’igulu mumanye!
11Mukolere Nyamuzinda munamurhînye,
12mucîkwêbe aha magulu gâge n’obwôba;
buly’erhi ankakunira mwanahungumuka:
oburhè bwâge kwo buyâka caligumiza nka ngulumira.
Iragi lyâbo abamuyegemera!
Mashi Bible © BUKAVU Archdiocese of Bukavu, 2024.