Migani 15
15
Hali akanwa kinjà, hali n’akanwa kabî
1Okushuza kwinjà kunarhûze oburhè, ci okushuza kubî kunazûse embaka.
2Akanwa k’abarhimanya bishingânîne kaderha, ci akanwa k’ebingolo-ngolo bya bunganyi kaderha.
3Ngasi hoshi amasù ga Nyakasane gali, gali ebulâbi bw’abinja n’ababî.
4Olulimi lurhûliriza abandi: murhi gwa kalamo ci akalimi kabî kubabaza kababaza omurhima
5Muhwinja ogayaguza ihano ly’îshe ci oyêmêra bamuhakanya erhi mwenge.
6Enyumpa y’omushinganyanya eluza ebinja, ci ebi endyâlya efulusa biluza emmanja.
7Bumanye akanwa k’omurhimanya kamira, ci omurhima gw’omubwinjà, nanga.
8Kuli Nyakasane enterekêro y’enkola-maligo, bishwêka, ci omusengero gw’entagengwa bwenêne agurhonya.
9Kuli Nyakasane olugendo lubî bikabulirwa, ci okulikira obushinganyanya, ye rhona emund’ali.
10Omuntu ocîrhenza omu njira ali wa kukalihirwa bwenêne, omuntu orhumva ihano yêhe kufâ anafâ.
11Erhi abâga ekuzimu n’enyenga biri omu masù ga Nyakasane, (lêro) omurhima gw’ababurhwa n’abantu, gohe kurhi?
12Omugambanyi arhakwirirwa bamudûnde, arhanayêrekera ahâli abagula.
13Omurhima gushagalusire gushesa obusù, murhima ali burhè bikûbi abanda.
14Omurhima gw’oburhimanya gukûnda ihano, akanwa k’abahwinja kohe isirhe likanunira.
15Kàlibwîre arhajira lusiku lwinjà, kashagali yêhe ngasi lusiku erhi na lukulu.
Enkômedu nyinjà
16Ebinyi birikwo okurhînya Nyakasane, byo bikulu aha buhirhi bulikwo entanya.
17Ennambi y’ebishogo-shogo haguma n’obuzigire, yo nkulu aha mpanzi eshushagire enalikwo enshômbo.
18Omuntu osîma okukunira anazûse ennongwè, omuntu mwîrhonzi yêhe ayirhûze.
19Enjira y’omwolo ebà eyunjwîre mishûgi, enjira y’obushinganyanya gubâ mulimbwa mugali?
20Omwâna murhimanya ye mushagalusa w’îshe, muhwinja ogaya nnina.
21Isirhe, lyo omuhwinja asîma, oku omwenge ashûrha enjira yâge.
22Aharhali buhabûzi, emihigo kufananda efananda, ci ahâli abahabûzi banji, emihigo kuyunjula eyunjula.
23Omuntu asîma alîke akanwa kinjà, ci kandi bwenêne kulusha asîma akoze omu kushuza.
24Enjira y’akalamo enahise omwirhonzi enyanya, emuyâse enjira yâjà ekuzimu.
25Nyakasane kushâba ashâbira abagambanyi, ci olubibi lw’omukana kuyumanyanya aluyumanyanya.
26Nyakasane ashômba emihigo y’obulyâlya ci akanwa kinjà, kalya k’obukenge, kurhonya akarhonya.
27Osîma eby’obushambo anacîshâbire enyumpa, olahira okuhêmbwa yêhe kucira acira.
28Omurhima gw’abashinganyanya binjinjà gugerêreza, akanwa k’endyâlya kôhe kaluzagye ebigalu-galu.
29Nyakasane abà kuli n’endyâlya, abashinganyanya bôhe anayumve omusengero gwâbo.
30Okulolwa bwinjà kushagalula kushagalula omurhima, omwanzi mwinjà gunasêze amavuha haguma.
31Okurhwiri kuyumvîrhiza owakukalihira, kwanabêra ekarhî kabarhimanya.
32Owâleka ihano erhi kugaya acîgayire, oyumva owamukalihira anarhôle obwenge.
33Okurhînya Nyakasane, kunayigîrize oburhimanya, obwîrhôhye bubà bushokolîre irenge.
Mashi Bible © BUKAVU Archdiocese of Bukavu, 2024.