Migani 16
16
Emihigo y’omurhima yo ebà y’omuntu
1Emihigo y’omurhima yo y’omuntu, n’okushuza kwo kwa Nyakasane.
2Omu masù gw’omuntu enjira zâge zibà nka zishingânîne, ci kwône Nyakasane yêhe ye hombaganya emirhima.
3Oyâbuze Nyakasane emikolo yâwe, emihigo yâwe yâyunjula obwo.
4Nyakasane àjizire ngasi kantu erhi anamanyire ecirhumire, ciru n’enkola-maligo yâlemerwa olusiku luhanya.
5Bishwêka omu masù ga Nyakasane, omurhima gw’akagayo, owa bene oyo barhâmusige ciru.
6Olukogo lw’oburhabêsha bwo bulyûla ebyâha, okurhînya Nyakasane kwo omuntu ayâkamwo obubî.
7Nyakasane akarhonya obwôrhere bw’omuntu, anamuliranye ciru n’abashombanyi bâge.
8Ehinyi hy’omu budahemuka, hyo hikulu oku binji by’obungunganya.
9Omurhima gw’omuntu gwo gucîshoga enjira, ci kwône Nyakasane ye sêza amagulu g’omuntu omu njira?
Abâmi Nyamuzinda bagwâsa
10Omu kanwa ka mwâmi mwo murhenga akanwa, nk’atwa olubanja akanwa kâge karhahalabuka.
11Omunzâni n’ensahani z’obushinganyanya: bya Nyakasane, ciru n’obuzirho bwa sunzu: nabo mukolo gwâge.
12Ecishologosa abâmi: kukola amaligo, bulyâla obushinganyanya go makondo g’entebe.
13Kanwa ka bashinganyanya karhona ebwâmi, mwâmi asîma oderha ebishingânîne.
14Oburhè bwa mwâmi, ntumwa ya lufù, murhimanya oburhûza.
15Oyu obusù bwa mwâmi bwashekera erhi amâlama, n’olukogo lwâge kwo luyôrha nka nkuba ezinda nyuma.
16Aha omuntu ankarhôla amasholo ankarhôla oburhimanya, n’aha omuntu ankabona amarhale ankabona obwîrhonzi.
17Enjira y’abashinganyanya kunali kuyâka abagoma, omuntu ocîrhega-rhega ye langa akalamo kâge.
18Kagayo kashokolera okurhibuka, n’omuhîmbo gw’omuntu gwo gushokolera okuhunguluka.
19Aha omuntu ankashangîra omunyago n’abagayana, ankacîbêra mugunda omu banyînyi.
20Oyumvîrhiza bwinja ihano linamucize, n’ocîkubagira Nyakasane ali muny’iragi.
21Ow’omurhima mwîrhonzi ye baderha murhimanya, n’omutûdu omu binwa ye derha ebyayumvûbwa.
22Obwîrhonzi kuciza buciza nnabwo, isirhe ly’abahwinja bwo na buhane bwâbo.
23Murhima gwa mwîrhonzi gurhuma aderha akanwa kashingânîne, gwo gunarhuma aderha ebyayumvûbwa.
24Iderha linjà cigukulu ca bûci, linanune ekanwa licize n’omubiri.
25Hali enjira eboneka nnungêdu, ebulizinda erhi ekuzimu yahêka.
26Ishali ly’omukozi ye linakolera, bulyâla iralà akanwa kayumvîrhe lyanamusêza.
Nyamuzinda ye Lugaba
27Omuntu wa busha busha anazûse obuhanya, akanwa kâge kabâkwo oguli nka muliro batwânyire.
28Ow’endyâlya ntambala anatula, n’ow’omwanzi kukoza anakoza aha ayinjibîne.
29Ow’ebihalârhi anarhebe owâbo, amugeze omu njira erhali yo.
30Ozibire mpu lyo agerêreza obulyâlya, olumire amîno, akozire amaligo
31Okumera emvi, kuyambala ecimanè c’okukengwa, mwo ciboneka omu njira y’obushinganyanya.
32Omuntu orhûza ye mukulu oku ntwâli, n’ohira omurhima omu nda, ye mukulu hali cirimisi wanyaga ebihugo.
33Omu mubungo gw’omwambalo bahira obuhanya, obucîranuzi bubà bwa Nyamuzinda.
Mashi Bible © BUKAVU Archdiocese of Bukavu, 2024.