Ezekiyeli 37
37
Olwa amavuha gayumûsire
1Okuboko kwa Nyakasane kwanacimpikakwo, Nyamubâho anacimpulukana bunya-mûka agend’indêkereza omu kabanda: akôla kabà nda kali kayunjwîre madondolo ga mavuha. 2Anacingeza hôfi nago eburhambi yoshi, agôla mavuha gali manji bwenêne muli akola kabanda erhi ganayûmûsire bwenêne. 3Nyakasane anacimbwîra, erhi: «Wâni mwene omuntu, ka agâla mavuha gankacifûka galame?» Nanacishuza nti: «Yâgirwa Nyakasane wêne we omanyire». 4Anacimbwîra, erhi: Lêbera agâla mavuha! ogabwîre, erhi: Mwe mavuha gayumûsire, yumvi akanwa ka Nyamubâho. 5Ntya kwo Nyakasane Nyamubâho abwîzire agâla mavuha, erhi: Loli oku nkola namuhiramwo omûka mushub’ilama. 6Nâmushubiza emisî, nâmushubimuhirakwo n’eminyafu, nanyibwîkire kwo oluhù; nâmuhiramwo omûka mushubilama; ntyo mwânamanya oku nie na ndi Nyamubâho. 7Obwo nanacilêba nk’oku nanalintegesirwe. Oku nancidwîrhe nalêba ntya, hanacizûka olubî lunji lunji n’emibarangasanyo, galya mavuha gajà gayêgêrana ngasi maguma oku gâbo. 8Nakazilolêreza: nalola oku emisî n’eminyafu yamâgabwîkira n’oku oluhù lwamâlambûkira kuli go; ci konene ntà mûka gwàli muli gwo. 9Anacimbwîra, erhi: Obwîre Mûka ebinwa by’obulêbi, wâni mwene omuntu, obwîre mûka erhi: Ntya kwo adesire Nyakasane Nyamubâho, erhi: Oyîshe, we Mûka orhenge ebwa mpande inni z’igulu obûhire omûka muli abà bànizirwe lyo bashubilama. 10Nanacilêba nk’oku nanarhegekagwa, omûka gwanacija muli bo, bafûka, bayîmangira oku magulu gâbo, gwàli murhwe munene bwenêne gwa ngabo!
11Anacimbwîra, erhi: Mwene omuntu, agâla mavuha gw’omulala gwa bene Israheli boshi. Bulya banakaz’iderha mpu: Amavuha gîrhu gayumûsire. obulangâlire bwîrhu bwahwîre rhwahungumusire! 12Co cirhumire ojilêba obabwîre erhi: Ntya kwo adesire Nyakasane Nyamubâho: Loli oku nkola nafunula enshinda zinyu, nâshubimukûla muli ezôla nshinda zinyu, wâni lubaga lwâni, namushubiza omu cihugo c’Israheli. 13Ntyo mwamanya oku nie na ndi Nyamubâho hano mubona nafûnula enshinda zinyu, ngali namurhenza muli ezôla nshinda zinyu, yâga lubaga lwâni. 14Nâmuhiramwo omûka gwâni mushubilama, nanshubimushubiza omu cihugo cinyu, mwânamanya obwo oku nie Nyamubâho, nkudesire, kwo byânabà, kwo adesire Nyakasane Nyamubâho.
Nyakasane ashubijira oluhaga lw’Israheli lubè luguma!
15Akanwa ka Nyamubâho kanacintindakwo muli ebîra binwa, erhi: 16Nâwe, wâni mwene omuntu, yanka akarhi oyandike kuli ko erhi: «Kuli Yûda na kuli bene Israheli bacilunzire haguma naye». Yanka akandi karhî oyandike kuli ko erhi: «Kuli Yozefu: kali karhî ka Efrayimu na ngasi bandi ba omu mulala gwa bene Israheli bacilunzire haguma naye». 17Oshegeze orhwo rhurhi haguma lyo rhubà karhi kaguma, kanabè karhi kaguma kafumbasirwe omu nfune zâwe. 18N’erhi bene olubaga lwâwe bankakudôsa muli ebîra binwa mpu: K’orharhuhugûlire nîrhu bici walonza okumanyîsa kuli okwôla? Wânababwîra erhi: 19Ntya kwo adesire Nyakasane Nyamubâho erhi: Loli oku nâyanka akarhi ka Yozefu akali omu nfune za Efrayimu, na ntyo emilala ya bene Efrayimu n’eyindi ecilunzire haguma nayo nayilunga oku karhî ka Yûda, kabè karhî kaguma omu nfune zâni.
20Orhôle orhwo rhurhi oyandisire kwo orhufumbarhe bakaz’ibona. 21Onababwîre erhi ntya kwo adesire Nyakasane Nyamubâho erhi: Lolà oku nkola narhenza bene Israheli omu garhi k’amashanja erya munda bâli bajîre, nâbashûbûza kurhenga empande zoshi, nshubibahêka omu cihugo câbo. 22Nâbajira bene ishanja liguma omu cihugo, omu ntondo z’Israheli, na mwâmi muguma ye wâbà mwâmi wâbo boshi, barhâcibe mashanja abirhi, barhâcigabanyikanemwo mâmi abirhi. 23Barhâcikaz’icihemula n’abazimu bâbo, na galya mabî gâbo, na bulya bwîsi bwâbo. Nâbacungula, mbarhenzekwo obugoma bwarhumaga bàjira ecâha, nâbacêsa; lwâshuba lubaga lwâni nâni nâbà nie Nyamuzinda wâbo. 24Omurhumisi wâni Daudi âbà mwâmi wâbo, âbà yêne ye na lungere muguma wâbo boshi, bashimba engeso zâni, bâlanga amarhegeko gâni banagashimbe. 25Babere omu cihugo nahâga mwambali wâni Yakôbo, n’omu b’îshe wâbo bayûbakaga, babêramwo boshi n’abâna bâbo, ciru n’abâna bâbo ensiku zoshi na mwambali wâni Daudi âbà ye mwâmi ensiku zoshi. 26Nâjira endagâno y’omurhûla rhweshi nabo, yâbà ndagâno y’ensiku n’amango nâbadêkereza nambaluze, nampire endâro yâni ekarhî kâbo ensiku zoshi. 27Ecihando câni cabêra ekarhî kâbo, nâbà Nyamuzinda wâbo, nabo babè lubaga lwâni. 28Ntyo amashanja goshi gâmanya oku niene nie Nyamubâho nie ndwîrhe nayinjihya Israheli, hano bâbona ecihando câni cibêra emwâbo ensiku zoshi.
Currently Selected:
Ezekiyeli 37: MKB
Highlight
Share
Compare
Copy
Want to have your highlights saved across all your devices? Sign up or sign in
Mashi Bible © BUKAVU Archdiocese of Bukavu, 2024.
