Ezekiyeli 36

Israheli ashubiyûbakwa

1Nâwe wâni mwene omuntu, oderhe ebinwa by’obulêbi biyêrekîre entondo z’Israheli, onazibwîre, erhi: Ewani ntondo z’Israheli muyumve akanwa ka Nyamubâho: 2Ntyâla kwo adesire Nyakasane Nyamubâho, erhi: Ebwa kubà omushombanyi akuderhîre erhi: «Hee! hee! entondo za mîra zikola zibà kashambala kîrhu!» 3Okwôla kwârhuma wâderha ebîra binwa by’obulêbi, erhi: Ntya kwo adesire Nyakasane Nyamubâho: Ebwa kubà wahagwîrwe hoshi wanahindulwa katulo, kuhika wâbà kashambala k’agandi mashanja wanahivululwa n’endimi z’obulyâlya n’orhunwanwa rhw’abantu bengehusi, 4okwôla kwo kwârhuma, wâni ntondo z’Israheli, muyumve akanwa ka Nyakasane Nyamubâho: Ntyâla kwo Nyakasane Nyamubâho abwîzire entondo n’orhurhondo, emisima n’orhubanda, ebigûkà byâhagwîrwe n’engo zikola zibà bwâmwa, ezanyagûzîbwe zinakola zibà masheka g’agandi mashanja g’abalungu; 5okwôla kwarhuma, ntyo kw’adesire Nyakasane Nyamubâho: omu bukali bw’obushîbirizi bwâni mwo nderhîre ebîra binwa oku mashanja na kuli Edomu yêshi, bo bàderhaga mpu bamâcîhà akâbo kashambala, co cihugo câni, boshi omurhima gwâbo gwashagaluka barhaderhaga mpu barhînya okumalîramwo abantu n’okucihagula.

6Okwôla kwo kwârhuma wâderha ebinwa by’obulêbi biyêrekîre ecihugo c’Israheli, obwîre entondo n’orhurhondo, emisima n’orhubanda erhi ntya kwo adesire Nyakasane Nyamubâho, alà oku ndesire omu bukali bw’olûji n’omu bukunizi bwâni, mbwîne oku mwalembîre ebijâci by’amashanja. 7Co cirhumire amâderha ntya Nyakasane Nyamubâho: Nâni namâlengeza okuboko kwâni! Nêci amashanja gamuzongolosire nago gakolaga galembera ebijâci.

8Ninyu wâni ntondo z’Israheli, mwashabuka munaleheke mulîse olubaga lwâni Israheli; bulya bali hôfi bayishe. 9Nêci lolà oku nyishire n’oku nkola nyêrekîre emunda muli: mwâhingwa munarhwêrwe. 10Nâluza abantu muli mwe, omulala gw’Israheli gwoshi gwâluga, engo zashub’ijibwâmwo n’abantu, n’ebigûkà biyûbakwe. 11Nâluza muli mwe abantu n’ensimba byaluga bibè mwandu; nâjira mushubiyûbakwamwo n’abantu nk’amango ga mîra, nânamuha obuhirhi bulushire obu mwâli mugwêrhe aha murhondêro; ntyo mwanamanya oku nie na ndi Nyamubâho. 12Nayisha mudwîrhîre abantu, lwo lubaga lwâni lw’Israheli, bâkujira akashambala kâbo, wâbà hantu hâbo, orhakanaciyîrha abâna bâbo.

13Ntyâla kwo adesire Nyakasane Nyamubâho, erhi: Ebwa kubà banakaz’ikubwîra mpu: Wamalîre abantu wanayîma ishanja abâna bâlyo. 14Okwôla kwârhuma orhakacimalîra abantu, orhanakaciyima ishanja lyâwe abâna bâlyo, kwo adesire Nyakasane Nyamubâho. 15Ntakaciziga wâjâcirwa n’amashanja, orhakanacibà masheka g’embaga na ntyo ishanja lyâwe lirhakacihuligana, kwo adesire Nyakasane Nyamubâho.

Nyakasane ashûbûza Israheli

16Akanwa ka Nyamubâho kanacinatindakwo muli ebîra binwa: 17Ewani mwene omuntu, amango omulala gwa bene Israheli gwaliguciyûbasire omu cihugo câbo, gwacihemula n’olugendo n’ebijiro byâbo bibî, olugendu lwâbo lwàli lunshologosire nk’obugalugalu bw’omukazi oli omu cirhambo. 18Ntyo nabavangulirakwo obukunizi bwâni erhi omukò bakazâg’isheshera omu cihugo gurhuma kuguma n’abazimu bâbo bali bacîhemwîremwo. 19Nanacibashandabaganya omu karhî k’amashanja balumîra ecihugo; nabahana nk’oku olugendo n’ebijiro byâbo byanali. 20Erhi bakola bali emwa agôla mashanja, bashubihemula izîno lyâni litagatîfu, bulya bamâkaz’ibaderhera mpu: «Lwo lubàga lwa Nyamubâho olu, n’omu cihugo câge lwarhenga». 21Ntyo nayumva obwonjo bw’izîno lyâni litagatîfu, eri omulala gwa bene Israheli gwahemulaga omu karhî k’agôla mashanja gwàli gujire. 22Co carhuma wâbwîra omulala gwa bene Israheli, erhi: Ntya kwo adesire Nyakasane Nyamubâho: Arhali we orhumire najira aga minjà ntya, wâni mulala gw’Israheli, ci izîno lyâni litagatîfu lirhumire eri wahemuliraga mw’agâla mashanja walijire emwâbo. 23Nâkuza izîno lyâni ly’irenge eri wahemuliraga emwa amashanja, emunda wajag’ilihemulira wênene, na ntyo amashanja gâmanya oku nie na ndi Nyakasane Nyamubâho, hano bâbona oku nâcîkuza muli we embere zâbo. 24Nâkurhenza omu mashanja, nâkushûbûza kurhenga omu bihugo byoshi nkushubize omu cihugo câwe. 25Nâkukangûla n’amîshi minjà, ntyo wânabà mwinjà; nâkurhenza kwo ngasi izinga ly’amabî gâwe n’erya abazimu bâwe boshi. 26Nâkuhà omurhima muhyâhya, nankuhiremwo omûka muhyâhya; nâkûla omu mubiri gwâgwe omurhima guli nk’ibuye, nkuhè omurhima gw’obunya-muntu. 27Nâkuhiramwo omûka gwâni#36, 27 Mûka gwa Nyakasane alema ebiremwa byoshi, abiha obuzîne (Murh 1, 2; 2, 7). Mûka gwa Nyakasane anayandagalîre abantu. Anahè omuntu emisî erhalusire eyi ayôrha ajira. Amango gw’obucunguzi, Nyamuzinda anâyandagalize kwâgo-kwâgo omûka gwâge oku bantu boshi (Ebj 2, 16-21; Yer 31, 31). , nankuhè emisî y’okushimba engeso zâni, ey’okulanga amarhegeko gâni n’okugashimba. 28Mwajiyûbaka ecihugo nahâga basho, mwajiba lubaga lwâni, nâni mbè nie Nyamuzinda winyu. 29Namurhenzakwo amabî ginyu goshi, nâmulerhera engano nanjire eluge bwenêne, ntyo ntakacimurhumira ishali. 30Nâluza amalehe g’oku mirhi n’emburho z’omu mashwa, ntyo murhacikabone enshonyi z’ecizombo omu karhî k’amashanja. 31Mwâkaz’ikcengêra enjira zinyu mbî, n’ebijiro binyu bigalugalu mushologorhwe erhi bubî bwinyu burhuma n’amagalugalu ginyu. 32Arhali mwe mwarhuma najira agôla minjà, kwo adesire Nyakasane Nyamubâho, mumanye bwinjà, mufe nshonyi, mugwârhwe n’enshonyi wâni mulala gw’Israheli.

33Ntyâla kwo adesire Nyakasane Nyamubâho, erhi: Olusiku nâbà namâkurhenzakwo amabî gâwe goshi, nânayunjuza engo zâwe bantu, n’ebigûkà byâwe bishibiyûbakwamwo. 34Ecihugo cahagulagwa cashubihingwa, n’obwo càli ci kola cibonekana bwâmwa oku bagera. 35Bakaz’iderha mpu: Ecihugo càli cikola bwâmwa lêro cikola nka busâne bw’e Edeni, mpu n’engo zàli zamâshabûlwa zananyagwa n’okuhenangulwa, lêro zikola hantu hayûbake. 36Ntyo amashanja gasigîre eburhambi bwinyu gâmanya oku niene nie Nyamubâho nie nshubiyûbaka ebyahongosire, nie nshubirhwêra ahâli hamâhagulwa. Niene Nyamubâho nie nkudesire, nie nanakujira!

37Ntyâla kwo adesire Nyakasane Nyamubâho, erhi: Alaga okundi nâshubigujirira, nayêmêrera omulala gwa bene Israheli guje gwânonza: nâguluza nka kula baluza obusò. 38Nka masô ganterekîrwe, na nk’engabo eri aha Yeruzalemu oku nsiku nkulu, ntyo kwo engabo y’abantu yabumba engo zàli zikola zibà bwâmwa; bânamanya oku nie na ndi Nyamubâho.

Currently Selected:

Ezekiyeli 36: MKB

Highlight

Compare

Copy