Ezekiyeli 24

Okurhêrwa kwa Yeruzalemu

1Omu mwâka gwa kali mwenda omu mwêzi gwa kal’ikumi, omu nsiku ikumi z’omwêzi, akanwa ka Nyamubâho kanacintindakwo muli ebîra binwa, erhi: 2Mwene omuntu, oyandike olusiku lw’ene, ebwa kubà omwâmi w’e Babiloni amârhêra Yeruzalemu oku lusiku lw’ene.

3Oderhage ecinwa c’obulêbi kuli ogwôla murhwe gw’abagoma. Oyishibabwîra: Ntyâla kwo adesire Nyakasane Nyamubâho: Ohire enyungu oku cîko, oyihirekwo onabulagiremwo amîshi. 4Oyushulemwo ebihimbi by’enyama, birya binali bihimbi binjinjà, by’oluziha n’eby’entugorhugè. Oyiyunjuze n’amavuha minjinjà. 5Ocîshoge omu busô, ecibuzi cinjà-cinjà, ocizunguluse enshâli otwânirekwo omuliro. Oyende bwinjà bidogome, ciru n’orhuvuha rhuli muli eyo nyungu narho rhuhye.

6Bulyâla ntyâla kwo adesire Nyakasane Nyamubâho, erhi: Buhanya bw’olugo lushesha omukò, nyungu ya ngisha, eyi engisha zirhankacirhenga! Oyikulage ebirimwo, cihimbi oku cindi buzira kulondôla#24, 6 Kuli kuderha oku olugo luli lubî bwenêne, ciru n’obuhane burharhenze amabî gâbwo (ngisha ziri mbî bwenêne, kuhunyire bazikûle); kukwânîne olwo lugo luherêrekere, nabo abalimwo barharhangwe n’olukûta ciru n’oluguma, bâkwêbwa embuga.. 7Bulya omukò gwâyo guli ekarhî kâyo, yaguhizire oku ibuye liri bwâmwa erhaguhizire omu budaka lyo gubwîkirwa n’akatulo. 8Lyo mbulaga oburhè bwâni, lyo ncihôla, nahizire omukò gwâge oku ibuye liri bwâmwa, buzira kugubwîkira. 9Co cirhumire, ntyâla kwo adesire Nyakasane Nyamubâho, erhi: Buhanya bw’olugo lushesha omukò! Nâni nkolaga naniga nnanigûze. 10Olundikage enshâli, oyâse omuliro, oyende enyama yoshi ehondôke, ohebemwo enungo, orhuvuha rhusingônoke. 11Kandi odêkereze enyungu erhalimwo cici oku masese, ly’omulinga gwâyo gudukumbuka, ly’izinga lirimwo lijonga, lyo n’engisha zisingônoka.

12Ci ensinga y’engisha erhârhenge n’omuliro. 13Nalonzagya okukushuka kwo eryo izinga ly’amabî gâwe, ci orhayêmîre washukwa eryo izinga. Kuziga orhâce kuhika oburhè bwâni bukuhwêrekwo. 14Niono nie Nyamubâho namâderha, okôla ndesire kwâbà, nâkujira buzira kushubira nyuma, ntâbabalire, ntâbe na bwonjo. Oku olugendo lwâwe luli n’oku ebijiro byâwe biri kwo bânakutwîra olubanja, kwo adesire Nyakasane Nyamubâho.

Omulêbi Yehezekiyeli arhangulwa

15Akanwa ka Nyamubâho kanacintindakwo muli ebîra binwa, erhi: 16Mwene omuntu, alà oku nkola narhenza caligumizà obushagaluke#24, 16 Obushagaluke bw’amasù gâwe, kwo kuderha: mukâwe. omu masù gâwe. Ci kônene orhacîdudumaga, orhahîra okarhoza emirenge. 17Olakire emurhima, orhahîra okajà omu mishîbo y’abafîre, ofundikire ecitambara câwe omu irhwe, ohire enkwêrho zâwe emagulu, orhabwîkiraga obwânwa bwâwe, orhanalyâga omugati abalungu bakakulerhera#24, 17 Ntyo gwo gàli marhegeko gw’okujà omu mishîbo e Buyahudi. Nyamuzinda abwîra omulêbi oku arhashimbaga agwo marhegeko, ci mpu ayêreke Abayahudi oku hano obuhane bubayishira, bâyishiyâbirwa okushimba agwo marhegeko, bulya obuhanya bwâyisha caligumizà.. 18Naganîrira oluhaga sêzi, erhi kubà bijingo, mukânie anacifà. Nanacijira nk’oku nanarhegekagwa. 19Okubundi olubaga lwanacimbwîra, erhi: «Kawakarhubwîra bwinjà kwo kuderha kuerhi okûla odwîrhe wajira?» 20Nanacibabwîra, nti: «Akanwa ka Nyamubâho kampisirekwo muli ebîra binwa, erhi: 21“Ojibwira omulala gw’Israheli ebîra binwa: kwo Nyakasane Nyamubâho adesire ntyâla: Loli oku nkola nagendizinza aka-Nyamuzinda kâni, ho hantu mulimbira, gwo mwishingo gw’amasù ginyu, go masîma g’emirhima yinyu. Bagala binyu na bâli binyu mwasigaga bakola bajifa n’engôrho”. 22“Mwayishijira nk’oku njizire: Murhayishibwîke amânwa ginyu, murhanayishilye omugati bankamulerhera”. 23“Mwabêra n’ebitambara binyu omu irhwe n’enkwêrho zinyu emagulu, murhajamîraga, murhanalakaga. Mwaherêrekera erhi mabî ginyu garhuma, na ngasi muguma abandire owâbo endûlù”. 24“Yehezekiyeli abà cimanyîso kuli mwe. Mwayishijira nk’oku anajiraga. Na hano okwôla kubà lyo mwâmanya oku nie Nyamubâho”».

25«Nâwe mwene omuntu, k’arhali okunali kwo byanabà ntyôla olusiku narhenza ebi basimikiragakwo, ebi balimbira, ebyabâga mwishingo gw’amasù gâbo, ebyabâga masîma g’omurhima gwâbo, bagala bâbo na bâli bâbo. 26“Olwôla lusiku, owafulumusire âyisha emwâwe alimanyîsa omwanzi”. 27“Olwôla lusiku akanwa kâwe kayîguka kadese oyôla wafulumusire, wânashambâla orhânacishubibe kaduma; kuli bo wâbà cimanyîso na ntyôla bânamanya oku nie Nyamubâho”».

Currently Selected:

Ezekiyeli 24: MKB

Highlight

Compare

Copy