Ezekiyeli 23

Olwa Yeruzalemu na Samâriya omu nyiganyo

1Akanwa ka Nyamubâho kanacintindakwo muli ebîra binwa, erhi: 2Mwene omuntu, hali mango maguma bakazi babirhi, banyere ba nina muguma. 3Bakagishungulira e Mîsiri, bajaga bahulahula kurhenga baciri barhò. Eyôla munda yo bakazâgikagwârhira omu cifuba n’okuhuma oku nda yâbo y’obubikira. 4Alaga amazîno gâbo: Ohola lwo lubere, Oholiba ye mulumuna wâge. Banacibà bâni bakaziburha abânarhabana n’abânanyere. Amazîno gâbo gadesire oku Samâriya ye Ohola, Yeruzalemu ye Oholiba. 5Lêro Ohola anacihemuka n’obwôla ali akola abà wâni; arhonya bwenêne abasolomi bâge, abanya-Asûru, balungu bâge. 6Bakazâgiyambala eby’akaduku, bâli barhambo na ha cikono, boshi banali misole na bakuhangalaza omurhima, bâli balenga b’okugenda oku nfarasi. 7Anacihâna amasîma gâge omu murhwe gw’entwâli gw’abanya-Asûru n’emwa ngasi abanasimire boshi, ajà acîhemula n’abazimu bâbo. 8Arhacilekaga amahemusi gâge arhangiriraga e Mîsiri erhi bagwîshira boshi naye, kurhenga anaciri murhò, omu kukazigiriginya enda yâge y’obubikira lyo bamuyîsa n’amasîma gâbo. 9Lêro nanacimuhâna emwa abôla basôlomi bâge, emwa abanya-Asûru abôla anali asîmire. 10Banacimubwîkûla ayôrha bushugunu, banacirhôla abagala n’abâli bâge naye yênene banacimuyîrha n’engôrho. Anaciderhwa bwenêne omu bandi bakazi: bulya bamuhana okunashingânîne. 11Mulumuna wâge Oholiba ye wali muhamîrizi, ci naye iralà lyâge n’obuhemusi bwâge byàlushîsa, byasârhaza kulusha ebya mukulu wâge. 12Anacisîma abanya-Asûru, abàli barhambo, banya-cikono na balungu bâge, bâli bayambîrhe bwinjà bwinjà, bâli balenga b’okugenda n’enfarasi, boshi bâli misole ya kujejula n’okuhangalaza omurhima gw’owababwîne. 13Nanacibona oku naye amabîha, nanacibona oku bombi bâli bagwêrhe lugendo luguma. 14Ayûshûla obuhemusi bwâge: Erhi abona abantu bacapirwe oku lukûta, zàli nsanamu za banya-Kaldeya, ezali zicapirwe n’ibara ly’akaduku, 15Abàli bayambîrhe emikaba omu cibunu n’ensirha zàli oku irhwe lyâbo, abàli bagwêrhe boshi enshusho y’abarhwâli, bakazâgibonekana oku bali banya-Babiloni b’e Kaldeya - cihugo baburhiragwamwo - 16erhi ayûsibabona, abayumviza amîru mabî na ntyo abarhumakwo entumwa kuhika e Kaldeya. 17Abanya-Babiloni banaciyisha emunda ali mpu bashangire boshi naye encingo y’obuhya, bamuhemula n’amasîma gâbo. Erhi ayûsihemuka abaleka. 18Ci konene ajaga acîyêrekana oku enali mbaraga, ayêrekana obushugunu bwâge, lêro nanacimuleka nk’oku nanalekaga mukulu wâge. 19Ci abaraga kulusha olugero, omu kuyîbuka ebya eburhò bwâge, amango akazagihemukira e Mîsiri, 20amango àli acîshwêkîre omu bushungu bwâge; bushungu bwàli n’emisî eri nk’ey’endogomi n’obutwamba buli nka bwa nfarasi.

21Washubîrigalukira olugcndo lwâwe lubî, olwa galya mango Abanya-Mîsiri, bakazâgikugwârhira omu cifuba n’okukugiriginya amabêre g’obusole. 22Co cirhumire Oholiba, ntyâla kwo adesire Nyakasane Nyamubâho: Lolà oku nkola nakushombanyisa emwa abasolomi bâwe balyâla walekaga, nâyîsha mbadwîrhe bakurhabâlire kurhenga empande zoshi. 23Abanya-Babiloni, abanya-Kaldeya boshi abà e Pekodi, ab’e Showa n’ab’e Kowa, Abanya-Asûru haguma nabo, boshi misole ya kujejula na kubangalaza omurhima, boshi barhambo na ba cikono na balenga bakulu omu kugenda n’e nfarasi. 24Bakurhabâlira kurhenga olunda lw’emwênè omu ngâlè nnene n’ensungunu, bayisha barhambwîre engabo mwandu. Bâkuyêrekeza empenzi zaâbo ennene n’ensungunu haguma n’ensirha yâbo nzibu-nzibu. Nabahire obuhashe bw’okukutwîra olubanja, bakutwîra olubanja oku obuhashe bwâbo bunali. 25Nayêrekeza olûji lwâni emunda oli, bâkulibuza omu bukunizi, bâkukûla izulu n’amarhwîri na ngasi ebi ocisigaline byahenanguka n’engôrho; bagwârha bagala bâwe na bâli bâwe n’ebicisigire kuli we byafonfomerwa n’omuliro. 26Bâkuhogola emyambalo banakunyage n’enjuma zâwe, 27nâkuyukiza lula lugendo lubî n’obubaraga bwâwe warhangiriraga e Mîsiri. Orhakacibikabagana na Mîsiri omuyîbagire. 28Bulya ntyâla kwo adesire Nyakasane Nyamubâho. Lolà oku nkola nakukwêba omu maboko ga balya washombaga onabaleka. 29Bâkulibuza erhi mujina gurhuma, bâkunyaga ebi wakazagikolera bakuleke oli bushugunu. Ntyo enshonyi z’okuhemuka kwâwe zanabonekana. Obûmaguza n’olugendo lwâwe lubî 30lwo lukudwîrhîre agôla mazibu goshi bulya omu kucihemula n’amashanja, wacizinza n’abazimu bâbo. 31Wayîzire olugendo lwa mukulu wâwe, omanyage oku nâhira akabehe kâge omu maboko gâwe.

32Ntya kwo adesire Nyakasane Nyamubâho, erhi: Wanywa akabehe ka mukulu wâwe, kabehe kagali na kalîrî, Wâbà wa kushesa n’okurhangâza erhi bunji bw’ebirimwo birhuma. 33Wâyunjula ndalwè n’amaganya, Kali kabehe ka kulaka n’okulakûla, akôla kabehe ka mukulu wâwe Samâriya. 34Wâkanywa okanûnûse, kandi bakabere rhunjonjo, kanakubera enda. Ebwakubà nkudesire niono Nyakasane Nyamubâho.

35Co cirhumire amâderha ntyâla Nyakasane Nyamubâho. Ebwakubà wanyibagîre, wanjadika enyuma zâwe, nâwe wêne ohekage enshonyi zâwe n’obuhemusi bwâwe.

36Nyamubâho anacimbwîra, erhi: Mwene omuntu, ka walonza okutwa olubanja lwa Ohola na Oholiba onabakalihire kuli agôla mabî gâbo magalugalu? 37Ebwakubà bacîbêrîre bagonyi, amaboko gâbo gakuyîrha, bajire omu bugonyi haguma n’ahazimu bâbo. Oku biyêrekîre abâna bàmburhiraga, bàbagezize omu muliro mpu lyo babasingônola. 38Kandi bàshubinjira ntyâla: Bahemwîre aka-Nyamuzinda kâni muli ezîra nsiku, n’ensiku zâni za Sabato barhazikengaga. 39Na, oku badwîrhe barherekêra abâna bâbo emwa abazimu bâbo, banabulikanya muli olwôla lusiku lônene bagendizinza aka-Nyamuzinda kâni. Obwînage ebi bàjizire omu nyumpa yâni mwonênè.

40Nakulusha ahôla, abôla bantu barhengaga omu bihugo b’ihanga, abàli bahamagîrwe n’entumwa, banaciyisha: wanagendicîshuka, wanacilabika obusù, wanaciyambaliza amagerha g’obulimbi erhi bo bàrhuma. 41Wanacitamala oku ncingo nyinjinjà, eyi bâli bahizire amêza embere, na kuli agôla mêza wali obikîrekwo enshangi yâni n’amavurha gâni. 42Eyôla munda bakaziyumva yo izù ly’abantu barhâcifufumukwa bici, ebwa kubà gwàli mwandu gwa bantu bàrhengaga omu irungu, bayambisize abakazi orhwishûgu omu maboko n’ecimanè cinjà-cinjà oku irhwe lyâbo. 43Ntyo nakazicidesa oku biyêrekîre oyu omukazi wakoyire n’obugonyi bwâge: kuhika buno kandi ye ciri wacîhemula 44Banakazija emunda ali nk’emwa omukazi muhemusi. Ntyôla kwo bajîre emwa Ohola n’emwa Oholiba abôla bakazi b’ebibolêreza. 45Bantu bashinganyanya bo batwîra olubanja nk’oku bankalutwîra abakazi bagonyi, balya bajà bashesha omukò ebwa kubà babà bagonyi n’amaboko gâbo gabà ga bwîsi.

46Ntyâla kwo adesire Nyakasane Nyamubâho. Balâlike embugânano lyo babahana, babagezemwo omusisi banabanyage. 47Kandi olubaga lw’e mbugânano lubabande amabuye lunabanigûze n’engôrho; bayîrhe bagala bâbo na bâli bâbo banadûlike omuliro oku nyumpa zâbo. 48Narhenza ishârha oku cihugo; kwâbà na kurhonda abandi bakazi baleke okuyîga lula lugendo lwinyu lubî. 49Bâmubarhuza obwôla bubî bwinyu, mwânabarhula ntyôla omuzigo gwa ebyâha binyu by’okuharâmya abazimu, mwânamanya ntyo oku nie Nyakasane Nyamubâho.

Currently Selected:

Ezekiyeli 23: MKB

Highlight

Compare

Copy