1 Tesalonika 5
5
1Goto na veveina na totoso beto na ngutidi na totoso sa, ka visa tavitimei, agei meneke kilu kuti vanigou na veveidi, 2ura agou mekamiu qu tei gigila vataleamiu tu sa na rane tana Bangara sa kode mina lame vasiboro vei na tinoni ikikona sa lame na bongi. 3Tonai mai paranga sira na tinoni, pira marigu, <<Na bule beto na vinasare!>> marigu, poni mina bola vasibororia na pipiara sira, mina vei na vivitigi sa kamu vasibororia na rereko bogatana, ko kepore sosoto sa kai tinoni mina boka legasania na pipiara. 4Ba, ka visa tavitimei, agou sa nake suveremiu pa rodomo ko na rane isa bi kole bola vasiboro veinigou na tinoni ikikona. 5Ura agou doru sa na tinoni tana kabere beto tana rane; gita sa nake tinoni tana bongi babi tana rodomo. 6Ko sa vei sa, gita take puta vei qai vei ira goto qaike vasosoto, goto ta suvere gegele beto ta suvere tavagigala tu. 7Ura ira na tinoni qai puta sa na bongi tu qai puta beto ira na tinoni qai bubuku sa na bongi tu qai bubuku. 8Goto gita sa na tinoni tana rane ko ta suvere tavagigala, ta popokonigita vei na poko suqutu sa na rarange beto na vairoqu, beto ta soba veinigita na tarapae vaipera sa na oda vera gegelena na inaalo tana tekua vuka risa. 9Ura na Tamasa sake udukunigita sa gita ko tana gosoria gita sa na ona kokora goto vei ko tana isongia tu gita sa na inaalo tana oda Bangara i Jisu Karisito, 10isa sa sa matenigita, ko vei tabe korapa suvere gegele babi tabe tei mate tu ba kode tana suvere tavitia sisa tonai mina mule lame. 11Ko sa vei isa sa, mu mekarai paranga vaivaneqi beto mu mekarai vaiovulu, vei tugu qu korapa roitinia kopira.
Na paranga vaivaneqi bebetona
12Ka visa tavitimei, agei qe tepa sagou ko mu doro gigalaria sira na tinoni qai pavu talenigou beto qai tolinigou pana tutina na Bangara beto qai ule vanigou na toa tavagigalana. 13Mu dogoro vaporeveveinaria pana vairoqu sira na tinoni vevei pira ura na roiti tadira sa sa poreveveina. Mu mekarai suvere vabubule. 14Ka visa tavitimei, qe paranga vaneqigou sagou ko mu paranga vatavagigalaria sira qai udapelu, mu vamanotoria sira qai munyala na roqudi, mu juka vamaururia sira qai munyala, beto mu paranga vamomosoria sira doru. 15Mu kopunia ko mi kepore kai tinoni mi beinia na ikerena sa na ikerena. Goto doru totoso mu nyaqo tutia na jongana ko mu roiti laonia tana goto tinoni beto tadira doru tinoni. 16Mu qeqera doru totoso, 17muke koroto vavara, 18bi ai tu totoso veveina sa bu gosoria ba mu paranga jongana gu. Ura na toa vei aipira sa sa nyoroguania na Tamasa tamugou pana tutina i Jisu Karisito. 19Muke vatakulangia na Gagala Tabuna, 20muke doro vakeporeria na nongoro lame veina tana Tamasa qarigunia, 21goto mu viloto vataleria tu sa doru paranga, ko mu aru tamania sa na jongana 22goto mu loa paleria sira doru kai sa ikikeredi.
23Mekana na Tamasa bule mi valiosogou pa dorudi na miu susuvere, beto mi kopu vatalenia doruna na gagalamiu, na miu toa, beto na tinimiu ko mu talegasaniria sira doru tinajutu tonai mina mule lame na oda Bangara i Jisu Karisito. 24Na Tamasa isa sa kukugou sa na tarangena, ko isa sa mina roitinia sapi.
Na Paranga Vinaokotona
25Ka visa tavitimei, agei ba mu vavara tokanigei tu.
26Mu paranga gogosororia sira na tinoni tana Karisito ketakoi.
27Qa maulu lao pa neqi tana Bangara sara ko mu tiroa agou tadira doru na tinoni tana Karisito sa na leta api.
28Na vairoqu vaialona tana oda Bangara i Jisu Karisito mi somana tamugou.
Currently Selected:
1 Tesalonika 5: LGA
Highlight
Copy
Compare
Share
Want to have your highlights saved across all your devices? Sign up or sign in
© 2024, Islands Bible Ministries. All rights reserved.
