1 Tesalonika 4
4
Na toa sa vaqerai na Tamasa
1Ego ko na roroqu vinabebeto sa api, ka visa tavitimei. Qu tei gigalainia tu agou tamigei sa isa muna toa vei ko muna vaqerai sa na Tamasa, ko na toa vevei tugu isa sa qu korapa toania agou. Ko kopira qe tepa vivitigigou beto qe paranga vaneqigou pana isongona na Bangara i Jisu sagou ko mu pugele nyonyoania gu sa na toa vei isa. 2Ura qu tei gigilaimiu tu agou sa ira na vavanau qe vanigou pana neqi tana Bangara i Jisu. 3Ura na nyorogua tana Tamasa sa agou mu toania na toa liosona, mu ukunia na toa lulasana, 4mu tavagigalania ai muna kopu mule venia na tinimiu mekamiu, beto mu isongia pana toa madina beto na toa pangagana, 5muke toania na nyonyorogua roiti valulasa qai vevei ira na tinoni karovodi qaike gigilai na Tamasa. 6Pana uana rereko na marene sa kepore kai tinoni mi roitinia na sela babi ngangangulia sa kai tavitina, ura qe tei ule vanigou tu beto qe tei poja vaneneqinigou tu sa na Bangara mina vakilasaria sira qai roroiti vevei aipira. 7Ura na Tamasa sake kukugita sa gita ko tana toania na toa lulasana, goto vei ko ta toania sa na toa liosona sau. 8Ko sa vei isa sa, na tinoni sa kilu palenia na vavanau api sa nake tinoni sa sa kilu palenia isa goto na Tamasa tu isa sa vanigou na ona Gagala Tabuna.
9Goto na vavanauna na vairoqu turamiu sa agei meneke kilu kuti lao vanigou sagou, ura agou mekamiu sa tei vagigalaigou tu na Tamasa ko mu toania na toa mekarai vairoqu sau. 10Ko agou qu tei korapa tu toania tadira doru tavitimiu pa doru ia pa Masidonia sa na uana vei api. Ko agei qe paranga vaneqigou ko mu pugele nyonyoania gu sa na toa vei isa. 11Mu uanania na suvere vaiketai, mu jujunonia na miu roiti mekamiu beto mu varoitiria na limamiu mekamiu, isa tugu vei qe tei garunu vaneneqingou tu perangana, 12ko mai pangaganigou ira na tinoni pa peguruna beto agou ba munake toa pa limadi na goto tinoni tugu vei.
Na Mule Lame tana Bangara
13Ka visa tavitimei, agei qeke nyoroguanigou ko bu suvere pupuguniria agou sira na tinoni qai tei mate tu, ko muke suvere takulanga vei ira sa keporeniria na vera ngangalina na toa vuka risa. 14Ura taqe vasosotoaoda gita sa i Jisu sa mate beto sa turu mule, ko taqe vasosotoa tugu vei gita sa na Tamasa kode mina toni mule tavitinia i Jisu sa ira na tinoni qai rangea isa beto qai tei mate tu. 15Ura na vaivagigalai tana Bangara sa qe korapa ule vanigou alepi: gita taqe korapa toaoda tonai mina mule lame na Bangara sa tanake lao momoeniria sira qai tei mate tu. 16Tonai sa mina tanongoro sa na kuku lavata, na ovovelena na bangaradi ira na mateana, na vaqorona na kuvili tana Tamasa, beto sa na Bangara mekana mina lagere vei pa noka beto ira na tinoni qai vasosotoa na Karisito ba qai tei mate tu sa mai turu mule momoe. 17Beto poni sa gita taqe korapa toaoda ko taqe korapa suvere sa tana tasaputu sae tavitiria ira pa vavagalo eqa ko tana gosoria gita sa na Bangara. Ko doru totoso tana mekarai suvere tavitia gita sa na Bangara. 18Ko sa vei sa, mu mekarai vaiparanga vaneqiniria sa na paranga aipira.
Currently Selected:
1 Tesalonika 4: LGA
Highlight
Copy
Compare
Share
Want to have your highlights saved across all your devices? Sign up or sign in
© 2024, Islands Bible Ministries. All rights reserved.
