رؤیا یوحَنّا 2
2
رِسالَة الْمَسیح إلَیٰ کَلیسة أفِسُس
1«إکتِب إلَیٰ مَلاک الْکَلیسه بي أفِسُس:
«ذاک إلْلي بي إیده الْیِمنه سِبِع نُجوم وَ یِمشي بِین سِبِع مَنائِر ذَهَب، هِیچ ایگول: 2أعرُف أعمالک وَ عارِف سَعي وَ صَبرَک. أدري إلْلي ما تِگدَر تِتْحَمِل الْأشرار وَ أشخاص الَّذي یِدعون نِفِسهُم رُسُل أمَّن ماهوم رُسُل، أنتَ إمتَحَنِتهُم وَ إکتَشَفِتهُم چَذَّاذبه. 3أعرُف إلْلي قاوَمِت وَ تَحَمَلِت صُعوبات لِکَرامَة أسمي وَ ما تَعَبِت.
4أمَّن عِندي هَي ضِدِّک إلْلي تَرَکِت مَحَبّه إلْلي چانِت عِندِک مِن الْبِدایه. 5إتذَکَّر إلْلي مِن وَین سُقَطِت. چا توب وَ إعمِل أعمال إلْلي چِنِت تِعمِلهِن بي الْبَدایَه. لِأن لو ما تْتُوب، أنا راح أیّي وَ أخِذ مَنارتِک مِن مَکان إلْلي موجوده. 6أمَّن بیک هَذا الْحُسن إلْلي تِکرَه أعمال فِرقَة الْنیکولائیین، مِثِل ما أنا هَم أکرَه.
7«ذاک إلْلي عِندَه أذَن خِل یِسمَع إلْلي الرّوح شي ایگول لِلْکَلیسات. کِلمَن یِفوز، راح أوَهِّب لِه نِعمَة الْأکِل مِن شِجرَة الْحَیَاة إلْلي إتکون بي جِنَة الْإلَه.
رِسالَة الْمَسیح إلَیٰ کَلیسة إسمیرنا
8«إکتِب إلَیٰ مَلاک الْکَلیسه بي إسمیرنا:
«ذاک الْأوَّل وَ ذاک الْآخَر ذاک إلْلي مات وَ ذاک إلْلي إستَحیَّه، هِیچ ایگول: 9أنا عارِف صُعوبات وَ فَقرَک، مَعَ کِل هِذِن إتکون غَني! عارِف تُهُم ذاکول إلْلي یِدعون نِفِسهُم یَهُود وَ ماهوم یَهُود، بِل هُمّا مَحَل عِبادَة الشَّیطان. 10لا تْخاف مِن عَذاب إلْلي عَن قَریب یِنتَظرِک. شوف، عَن قَریب الْإبلیس راح یِذِب بَعَض مِنکُم بي الْسِجِن خاطِر تِتجَرَّبون وَ عَشُر تَیَّام راح تِتْعَذِّبون. ضُل وافي لِحَد الْمُوت إلْلي أنا راح أوَهِّب لِک تاج الْحَیَاة.
11«ذاک إلْلي عِندَه أذَن خِل یِسمَع إلْلي الرّوح شي ایگول لِلْکَلیسات. کِلمَن یِفوز، ما راح یِنْضَر مِن مُوت الثَّاني.
رِسالَة الْمَسیح إلَیٰ کَلیسة پرگاموم
12«إکتِب إلَیٰ مَلاک الْکَلیسه بي پرگاموم:
«ذاک إلْلي عِندَه سَیف باشُط ذِي الْحَدَّین، هِیچ ایگول: 13أعرُف وَین تِسکِن، أهناک إلْلي إتکون عاصِمَة الشَّیطان. مَعَ کِل هِذِن ضُلِّیت وافي بي أسمي وَ ما نِکُرِت إیمانَک بیِه حَتَّیٰ بی أیَّام آنتیپاس، ذاک شاهِد الْأمین الَّذي إنقِتَل بي مَدینَتکُم، إلْلي هیَّه إتکون مَسکَن الشَّیطان.
14«مَعَ هَذ، عِندي چِم شي ضِدِّک. أهناک عِندَک أشخاص إلْلي یِتِبعون تَعلیم بَلعام؛ ذاک إلْلي عَلَّم بالاق یِهَیُّض بَني إسرائیل الَّذي یَأکلون مِن طَعام إلْلي یِتْقَدَّم لِلْأصنام وَ یِلَطخون إیدهُم بي الْفِساد. 15غَیر هَي، عِندَک أشخاص هَم إلْلي یِتِبعون تَعلیم الْنیکولائیین. 16چا تُوب، مامِش بي هِل گُرُب راح أیّي عِندَک وَ راح أحارِبهُم بي سِیف إلْلي بي حَلگي.
17«ذاک إلْلي عِندَه أذَن خِل یِسمَع إلْلي الرّوح شي ایگول لِلْکَلیسات. کِلمَن یِفوز، راح أنْطیه مِن ذاک ”مَنَّا“ الْخَفي. وَ هَم راح أوَهبَّه صَخرَه بَیضاء إلْلي مَحکوک عَلِیها أسِم یِدید، أسِم إلْلي أحَد ما یِعُرفه غِیر ذاک إلْلي یِحَصله.
رِسالَة الْمَسیح إلَیٰ کَلیسة تیاتیرا
18«إکتِب إلَیٰ مَلاک الْکَلیسه بي تیاتیرا:
«هِیچ ایگول ابن الْإلَه إلْلي عِندَه أعیون مِثِل لَهیب النَّار وَ ریلِین مِثِل صُفُر لامِع: 19أنا عارِف أعمالَک، مِن مَحَبتَک وَ وَفائَک وَ مِن خِدِمتَک وَ صَبرَک، وَ عارِف إلْلي أعمالَک هَسّه إیکونن أکثَر مِن گَبُل. 20أمَّن عِندي هَي ضِدِّک إلْلي تِتْساهِل مَعَ مَراء بي أسِم ایزابِل إلْلي تِنْدِعي بي نَفَسها نَبیَّه، ذیچ إلْلي بي تَعلیمها إتْغِش عِبّادي خاطِر یِلَطخون إیدِیهُم بي الْفِساد وَ یَأکلون مِن طَعام إلْلي یِتْقَدَّم لِلْأصنام. 21أنْطِیتها مُهلَه خاطِر إتْتُوب مِن الزَّناء، أمَّن ما عِندها رِغبه لِلْتُوبَّه. 22شوف، چا راح أذِبها بي إفراش الْمَرَض وَ راح أذِب ذاکول إلْلي یِزنون مَعَها بي مُصیبَه عَظیمه، إلّا أن یِتوبّون مِن أعمالها. 23وَ راح أهلِک أولادها. بي ذاک الْوَکِت کِل الْکَلیسات راح یِعُرفَن إلْلي أنا فَحّاص الْگُلوب وَ الْأفکار وَ راح أعَوُّض لِأي واحَد مِنکُم حَسَب أعماله. 24أمَّن عَن باقیکُم بي تیاتیرا، أنتُم إلْلي مو تابعین هِل تَعلیم وَ ما تِعَلِمتوا إلْلي بَعَض یِسمونَه ”أسرّار الشَّیطان الْعَمیقه“، أگِلکُم هَي إلْلي ما راح أحُط حِمِل أکثَر مِن ذاک إلْلي عَلَیٰ أچتافکُم. 25بِس أسعُوا بي الْحِراسَه مِن شي إلْلي عِندکُم لِمَّن أیّي.
26«کِلمَن یِفوز وَ یِعمِل أعمالي لِلْنَهایه، راح أنطيه أقتدار خاطِر یِحکُم عَلَیٰ الْأُمَم،
27«”راح یِحکُم عَلِیهُم بي عَصاء مِن حَدید؛
وَ راح یِکسُرهُم کَإمدانَة طین،“
مِثِل ما أنا حَصَّلِت أقتدار مِن أبوي. 28وَ راح أوَهِّب لِه نَجمَة الْصُبُح. 29ذاک إلْلي عِندَه أذَن خِل یِسمَع إلْلي الرّوح شي ایگول لِلْکَلیسات.
Currently Selected:
رؤیا یوحَنّا 2: ACM
Highlight
Share
Compare
Copy
Want to have your highlights saved across all your devices? Sign up or sign in
©️2024 Korpu Company
