إنجیل مَرقُس 9
9
1هَم گِلهُم: «بِالحَق، أگِلکُم، بَعَض أهنا مُوگفین وَ لِوَکت إلْلي ما یِشوفون یِیِّت مَلَکوت الْإلَه بي قُوّه، ما راح یِذوگون المُوت.»
تَغییر لُون وَیِه عیسیٰ
2مِن بَعَد سِت أیَّام، عیسیٰ راد پِطرُس وَ یَعقوب وَ یُوحَنَّا وَ خِذاهُم وَیَّاه عَلَیٰ فِرِد یِبَل مُرتَفع خاطِر یِضُلّون لِوَحدهُم. أهناک، بي حُضورهُم، إتْغَیَّر لُون وَیهه. 3هِدمَه ضَل یِلمَع وَ صار چثیر أبیَض، بي شِکل إلْلي وَلا شي بي الْعالَم یِگدَر یِسُوّي الْهِدِم هِیچ أبیَض. 4بي ذاک الْوَکِت، نَبي إیلیَاء وَ مُوسیٰ ظُهرَوا جِدَّام أعیونهُم وَ گامُوا یِتکَلِّمون مَعَ عیسیٰ. 5پِطرُس گال لِعیسیٰ: «یا مُعَلِّم، زِین إلْلی إحنَا مُوجودین أهنا. چا خِلّي نِنصُب ثِلِث مَظَلّات، وَحده ألَک، وَحده لِمُوسیٰ وَ وَحده هَم لِإیلیَاء.» 6پِطرُس ما چان یِدري شِنهي ایگول، لِأن چِثیر چانُوا خایفین. 7فَجأةً غِیمه صارَت عَلِیهُم وَ وُصَل نِداء مِن الْغِیم إلْلي، «هَذا هُوَّ ابني الْمَحبوب، أسِمعوا لَه.» 8فَجأةً، مِن باوِعَوا حَوالِیهُم، ما شافُوا وَلا أحَد حَوالیهُم، غِیر عیسیٰ وَ بِس.
9وَکت إلْلي چانُوا یِنِزلون مِن الْیِبَل، عیسیٰ أمَرهُم إلْلي شي إلْلي شایفینه لا یِسولفونه لِأحَد لِوَکت إلْلي ابن الْإنسان ایگوم مِن بِین الْأموات. 10ذاکول حِفظُوا هَي السَّالفه بِیناتهُم، أمَّن چانُوا یِسألون بَعَضهُم، ”الگُومَه مِن بِین الْأموات“ شِنهی إیکون مَعناتها. 11بَعدِین سِألُوا مِن عیسیٰ: «لِیش مُعَلِّمین التُّورات ایگولون أوَّل کون ایّي نَبي إیلیَاء؟» 12عیسیٰ جاوَب: «طَبعاً إلْلي أوَّل ایّي نَبي إیلیَاء خاطِر یِصَلِّح کِل شي. أمَّن لِیش عَن ابن الْإنسان مِکْتوب إلْلي کون یِتعَذَّب چِثیر وَ یِنحُقُر؟ 13أمَّن أنا أگِلکُم، إیلیَاء مِثِل ما مِکْتوب عَنَّه، ایّه وَ ذاکول کِل شي إلْلي رادُوا عِملُوا وَیَّاه.»
شَفاء وُلِد الْمِتلَبِّس روح شَیطانیّه
14وَکت إلْلي وَصلَوا عِند باجي التِّلامیذ، شافُوا جَمعیَّه چِثیره حَوالِیهُم مُوگفین وَ مَعَلِّمین التُّورات هَم یِتباحِثون مَعَهُم. 15الْجَمعیَّه مِن شافُوا عیسیٰ، کِلهُم إتْحَیِّرُوا وَ بي أرکاض إیَّوا وَ سِلِّمُوا عَلِیه. 16عیسیٰ سِأَل: «عَن شِنهو تِتْباحِثون مَعَهُم؟» 17زِلْمه مِن بِین الْجَمعیَّه جاوَب: «یا مُعَلِّم، یایِب ابني عِندَک. لِأن بی روح إلْلي سالبَه مِنَّه قُدرَة الْتَکَلُّم. 18مِن إتْکُضَّه، إتْطَّیحَه عَل گاع، بي شِکِل إلْلي حَلگه یِوَقُّف وَ أضروسه یِنعَسرَن وَ جِسمه ایِّبَس. مِن تِلامیذَک رِدِت یِخَرجون مِنَّه ذیچ الرّوح، أمَّن ما گِدْرُوا. 19عیسیٰ بي الْجَواب گال: «یا جیل إلْلي بِلا إیمان، لِحَد یِمتَّه أکون وَیَّاکُم وَ أتحَمِّلکُم؟ یِبوه یِمّي.» 20چا جابُوه. الرّوح مِن شافَت عیسیٰ، بي لَحظَتها جِعلَت الْوَلِد یتْشَنَّج بي شِکل إلْلي طاح عَلَیٰ الْأرض وَ بي حال إلْلي حَلگه چان إمزبّد، گام یِتْمَرغَل عَلَیٰ التَّراب. 21عیسیٰ سِأَل مِن أبوه: «چِم وَکِت مُصاب بي هِل حال؟» جاوُب: «مِن الطُّفوله. 22هَي الرّوح چانَت وایِد إتْذِبّه بي الْماي وَ النَّار خاطِر تِهِلْکه. لُو تِگدَر أشفَق عَلِینا وَ ساعِدنا.» 23عیسیٰ گال: «لُو تِگدَر؟ لِشَخُص إلْلي عِندَه إیمان، کِل شي مُمکِن.» 24أبو ذاک الْوَلِد بي وَکِتها بي صُوت عالي گال: «عِندي إیمان؛ ساعِدني خاطِر أفوز عَلَیٰ عَدَم إیماني!» 25وَکت إلْلي عیسیٰ شاف جَمعیَّه بي أرکاض إیّون هَذا الصُّوب، عاتَب روح الْخَبیثه وَ گال: «یا روح الْطَرشه وَ الْخَرسه، أنا أؤمرِچ تِخِرجین مِنَّه وَ أبَد بَعَد لا تِدُخلین بيه!» 26الرّوح صَرخَت وَ حیل هِزِّت الْوَلِد وَ خِرجَت مِنَّه. الْوَلِد صار مِثِل جَسَد بِدون روح، بي شِکل إلْلي چِثیرین گالُوا: «مِیِّت.» 27أمَّن عیسیٰ کَض إید الْوَلِد، گَوَّمه، وَ الْوَلِد وَگَف عَلَیٰ ریلِیه. 28وَکت إلْلي عیسیٰ راح لِلْبَیت، التِّلامیذ عَلَیٰ أنفراد سِألُوا مِنَّه: «لِیش إحنَا ما گِدَرنا نِخرَج ذیچ الرّوح؟» 29جاوَب: «هَذا النُّوع غِیر بي الدُّعاء، ما یِخرَج.»
30ذاکول تِرکَوا ذاک الْمَحَل وَ عُبْرَوا مِن بِین مَنطَقة الْجَلیل. عیسیٰ ما راد أحَد یُعرُف هُوَّ وَین، 31لِأن چان یِعَلِّم تِلامیذه وَ یِحاچیهُم عَن هَي إلْلي: «ابن الْإنسان راح یِتْسِلَّم بي إید النَّاس وَ یِقِتلونه. أمَّن ثِلِث تِیَّام مِن بَعد الْقِتِل، راح ایگوم.» 32أمَّن ما دِرکُوا مَنظوره وَ چانُوا یِخافون یِسِألون مِنَّه.
الْعَظَمه بي شِنهي؟
33بَعدِین إجُوا لِمَدینة کَفَرناحوم. وَکت إلْلي چانُوا بي الْبَیت، عیسیٰ سِأَل مِن التِّلامیذ: «بي الطَّریق عَلَیٰ شِنهو چِنْتوا تِتْباحِثون؟» 34ذاکول ضَلَّوا ساکتین، لِأن بي الطَّریق چانُوا یِحچون عَن هَي إلْلي یاهو مِنهُم أعْظَم. 35عیسیٰ گَعَد وَ راد ذاکول الْأثنَعَش شَخُص وَ گال: «کِلمَن یِرید إیکون الأوَّل، کون یِصیر الْآخَر وَ خادِم الْجَمیع.» 36بَعدِین کَضلَه طُفِل، حَطّاه بِیناتهُم وَ حِضَنَه، گِلهُم: 37«کِلمَن یِقبَل هِیچ طُفِل بي أسمي، قابِلني؛ وَ کِلمَن یِقبِلني، مو أنا، بَل قابِل الْإموَدّیني هَم.»
کِلمَن مو ضِدنا، مَعَنا
38یُوحَنَّا گال: «یا مُعَلِّم، شِفنا شَخُص إلْلي بي أسمَک چان یِطَلِّع روح شَیطانیّه، أمَّن مِنَعنا لِأن ما چان مِن عِندنا.» 39عیسیٰ گال: «لا تِمِنعونه، لِأن أحَد ما یِگدَر یِعمِل مُعجِزه بي أسمي وَ إشوَیّه بَعَد، یِحچي غَلَط عَنّي. 40لِأن کِلمَن مو ضِدنا، مَعَنا. 41بِالحَق، أگِلکُم، کِلمَن بي أسمي یِسقیکُم کَأس ماي بي سَبَب هَي إلْلي أنتُم مَلَک مَسیح الْمُوعود، مِن دون شَک ما تضُل بِدون أجُر.
تَعلیم عَن الْوُسوُسه وَ الْعَثَر
42«وَ کِلمَن ایصیر سَبَب إلْلي واحَد مِن هِذول الْأضغار إلْلي مُؤمِنین بیه یِعثَر، أحسَن چان لِه یِعَلگون صَخرَة رَحّه بي رُگُبته وَ یِذَبّونه بي الْبَحَر! 43لُو إیدَک إتْصیر سَبَب عَثِرتَک، أگطَعها. لِأن أحسَن لَک عَلیل تِدخُل الْحَیَاة مِن هَي إلْلي بي إثْنَین إیدِین إتْروح الْجَهَنَّم، بي نار إلْلي أبَد ما تِنْطُفي. 44مَکان إلْلي ذِراعه ما یِموت وَ ناره ما ینْطُفي. 45وَ لُو ریلِک إتْصیر سَبَب عَثِرتَک، أگطَعها. لِأن أحسَن لَک عَرَي تِدخُل الْحَیَاة مِن هَي إلْلي بي إثْنَین ریلِین تِنذَب بي جَهَنَّم. 46مَکان إلْلي ذِراعه ما یِموت وَ ناره ما ینْطُفي. 47وَ لُو عِینَک إتْصیر سَبَب عَثِرتَک، أطلَعها، لِأن أحسَن لَک بي فِرِد عِین تِدخُل مَلَکوت الْإلَه، مِن هَي إلْلي بي إثْنَین أعیون تِنذَب بي جَهَنَّم، 48مَکان إلْلي
«”ذِراعه ما یِموت
وَ ناره ما ینْطُفي.“
49«لِأن الْجَمیع بي النَّار راح یِتْمَلِّحون. 50الْمِلِح طَیِّب، أمَّن لُو یِفقِد خاصیته، إشلون ایصیر إتْمِلحَه؟ چا أنتُم هَم بي نَفِسکُم خِل إیکون عِندکُم مِلِح وَ مَعَ بَعَض تَعامِلوا بي سَلام.»
Currently Selected:
إنجیل مَرقُس 9: ACM
Highlight
Copy
Compare
Share
Want to have your highlights saved across all your devices? Sign up or sign in
©️2024 Korpu Company
