إنجیل مَرقُس 5
5
شَفاء زِلْمه الْمِتلَبِّس روح شَیطانيّه
1بَعدِین بي ذاک صُوب الْبَحَر، راحُوا لِمَنطقة جِراسیان. 2وَکت إلْلي عیسیٰ نِزَل مِن الْبَلَم، زِلْمه إلْلي چان مِتلَبِّس روح خَبیثه، طَلَع مِن الْمَگبَره وَ لاگَه. 3ذاک الْزِلمه چان ساکِن بي الْإگبور وَ وَلا أحَد چان یِگدَر یِضُبطه حَتَّیٰ بي سَناسِل. 4لِأن چِم مَرَّه چانُوا رابْطینه بي الْقِيود وَ الْسَناسِل، أمَّن چان گاطِع الْسَناسِل وَ کاسِر الْقِيودَ. وُلا أحَد چان یِگدَر یِضُبطه. 5لِیل وَ نَهار، بِین الْگُبور وَ عَل حِدَّات چان یِصَیِّح وَ بي صَخَر یِجرَح نَفسه. 6وَکت إلْلي شاف عیسیٰ مِن بِعید، بي إرکاض إیّه وَ سِجَد جِدَّامه، 7بي صُوت عالي صاح: «یا عیسیٰ، یا ابِن إلَه الْعَلِيِّ، شِنهو شُغلَک وَیَّاي؟ أحَلْفَک بي الْإلَه إلْلي لا تْعَذِّبني!» 8لِأن عیسیٰ چان گایِل ألها: «یا روح الْخَبیثه، أطُلْعي مِن هَذا الْزِلمه!» 9بَعدِین عیسیٰ سِأَل مِنها: «شِسْمِچ؟» جاوُبَت: «أسمي جِیش؛ لأن إحنَا چِثیرات.» 10وَ چِثیر دَخُلَت مِن عیسیٰ إلْلي لا یِخَرِجْهِن مِن ذیچ الْمَنطَقه. 11عَلَیٰ حِدَّات یِبَل ذیچ الْمَنطَقه، چان قَطیع چِبیر مِن الْخَنازیر إلْلي چانِن یِرعَن. 12أرواح الْخَبیثه إترَجَّن عیسیٰ وَ گالَن: «وُدّینا بي الْخَنازیر؛ خِلّینا إنْدِش بیهِن.» 13عیسیٰ سِمَح ألهِن. چا طُلعَن وَ دِشَّن بي الْخَنازیر. قَطیع الْخَنازیر إلْلي عَدَده چان حَوالي ألفَین، مِن عَلَیٰ الْحِدَّه هِجَم بي الْبَحَر وَ غُرگ بي الْماي.
14رُعاء الْخَنازیر شِردُوا وَ سُولِفُوا هَي السَّالفه بي الْمَدینه وَ الْقَريه، بي شِکل إلْلي النَّاس طُلعَوا خاطِر یِشوفون شي إلْلي چان صایِر. 15ذاکول إیَّوا عِند عیسیٰ وَ مِن شافُوا ذاک زِلمه الْمِتلَبِّس روح شَیطانيّه إلْلی گَبُلها چان مِتْوَرِّط بي الْجِیش، لابِس أهدوم وَ بي سَلامة عَگلَه گاعِد أهناک، إختِلْسُوا. 16أشخاص إلْلي چانُوا شایفین السَّالفه بيعیونهُم، سُولِفُوا لِلنَّاس شي إلْلي جَرَیٰ عَلَیٰ زِلمه الْمِتلَبِّس روح شَیطانيّه وَ الْخَنازیر. 17بَعدِین النَّاس إتْرَجُّوا مِن عیسیٰ یِترِک أرِضْهُم.
18وَکت إلْلي عیسیٰ چان یِرکَب بي الْبَلَم، زِلْمه إلْلي گَبُل چان مِتلَبِّس روح شَیطانيّه، إتْرَجَّیٰ مِنَّه ایروح مَعَه. 19أمَّن عیسیٰ ما سِمَح لِه وَ گال: «روح لِلْبَیت، لعِند گَرایبَک وَ گِلهُم الرَّب إشْ عِمَل لَک وَ إشلون رَحَمَک.» 20چا ذاک الْزِلمه راح وَ بي أرض دِکاپولیس، أبتِدَء بي أعلان کِل شي إلْلي عیسیٰ چان عامِل لِه، وَ النَّاس کِلها چانَت تِتْعَجَّب.
بَنت واحَد مِن الْرُؤَساء وَ الْمَراء الْمَریضه
21عیسیٰ مَرَّه أخرَیٰ بي الْبَلَم راح ذاک صُوب الْبَحَر. بي راگ الْبَحَر، جَمعیَّه چِثیره أجتِمعَوا یِمَّه. 22یایروس، واحَد مِن رُؤَساء مَحَل عِبادَة الْیَهُود هَم إیّه أهناک وَ مِن شاف عیسیٰ طاح عَلَیٰ ریلِیه 23وَ بي إدْخالا گال: «بِنتي الضِّغیره بي حالَة الْمُوت. أتْمَنَّیٰ تِیّي إتْحُط إیدَک عَلِیها خاطِر تِشفَیٰ وَ أتعیش.» 24چا عیسیٰ راح مَعَه.
جَمعیَّه چِثیره هَم مِشُوا وَراء عیسیٰ. ذاکول چانُوا إمْضایجینَه مِن کِل طَرَف. 25وَ أهناک چانَت مَراء إلْلي أثْنَعَش سِنَه مِبتَلیه بي نَزیف الدَّم. 26چانَت تَحَت عَلاج الْأطِبّاء، تَعبانه چِثیر وَ صارفَه کِل أموالها؛ أمَّن بِدَال ما إتْطیب، چانَت صایره أخَس. 27چا مِن سِمْعَت عَن عیسیٰ، مِن بِین الْجَمعیَّه إیِّت مِن وَراء وَ لِمْسَت عَبایته. 28لِأن چانَت گایله مَعَ نَفِسها: «حَتَّیٰ لُو ألمَس عَبایته أشفَیٰ.» 29بي لَحظَتها إنْگُطَع نَزیف دَمها وَ بي جِسِمها حَسِّت إلْلي شِفَت مِن ذاک الْبَلاء. 30عیسیٰ بي لَحظَتها عُرَف إلْلي صِدرَت قُوَّه مِنَّه. چا إلْتِفَت بِین الْجَمعیَّه وَ سِأَل: «یاهو لِمَس عَبایتي؟» 31تِلامیذه جاوُبُوا: «إتْشوف إلْلي النَّاس إمْضایجینَک؛ هِنّوب تِسأَل، ”یاهُو لِمَسني؟“» 32أمَّن عیسیٰ چان یِباوِع عَل أطراف خاطِر یِشوف یاهو عِمَل هِل شُغله. 33چا ذیچ الْمَراء إلْلي چانَت تُعرُف إشْ جَرَیٰ عَلِیها، خایفه وَ رایفه إیِّت، طاحَت عَلَیٰ ریل عیسیٰ وَ گِلِت لِه کِل الْحَقیقه. 34عیسیٰ گِلها: «یا بِنتي، إیمانِچ شِفاچ. روحي بي السَّلامه وَ إتشافي مِن هَذا الْبَلاء!»
35هُوَّ بَعدَه چان یِحچي إلْلي چِم شَخُص مِن بَیت یایروس، رَئیس مَحَل الْعِبادَه، إیَّوا وَ گالُوا: «بِنتَک ماتَت! بَعَد لِیش إتْزَاحِّم الْمُعَلِّم؟» 36عیسیٰ مِن سِمَع هَذا الْحَچي، گال لِرَئیس مَحَل الْعِبادَه: «لا تْخاف! بِس إیکون عِندَک إیمان.» 37وَ ما سِمَح لِأحَد یِمشي وَراه غِیر پِطرُس وَ یَعقوب وَ یُوحَنَّا أخو یَعقوب. 38وَکت إلْلي وُصلَوا لِبَیت رَئیس مَحَل الْعِبادَه، شاف ضَجَّه صایره وَ بَعَضْهُم بي صُوت عالي یِبچون وَ یِنحون. 39چَه دَخَل وَ گِلهُم: «إلْمَن هِل ضَجَّه وَ الْنوح؟ الْبِنت مو مِیته، بَلْ نایمه.» 40أمَّن ذاکول ضُحکُوا عَلِیه. بَعَد ما طَرَدهُم کِلهُم، أخَذ أبو وَ أم الْبِنِت وَ هَم تِلامیذ إلْلي چانُوا مَعَه وَ دَخَل بي مَکان إلْلي الْبِنت چانَت. 41بَعدِین کَض إید الْإبنَیه وَ گِل ألْها: «تالیتا کوم!» یَعني: «یا بِنت الضِّغیره، أگِلِچ گومي!» 42هيَّه بي وَکِتها گامَت وَ ضَلَّت تِمْشي. ذیچِ الْبِنت چانَت أثْنَعَش سِنَه. ذاکول مِن هَي السَّالفه چِثیر إتْحَیِّرُوا. 43عیسیٰ بي شِدَه أمَرهُم إلْلي لا یْخِلّون أحَد یِفْتِهِم مِن هَي السَّالفه، وَ گال یِنْطون شي لِذیچ الْبِنت خاطِر تَأکِل.
Currently Selected:
إنجیل مَرقُس 5: ACM
Highlight
Copy
Compare
Share
Want to have your highlights saved across all your devices? Sign up or sign in
©️2024 Korpu Company
