إنجیل مَرقُس 2
2
عیسیٰ یِشفي زِلْمه أمگَرَّم
1مِن بَعَد چِم یُوم، وَکت إلْلي عیسیٰ بَعَد مَرّه إیّه لِکَفَرناحوم، النَّاس عُرفُوا إلْلي هُوَّ یَاي لِلْبَیت. 2جَمعیَّه چِثیره إلْتَمَّت، بي شِکل إلْلي ما چان مَکان حَتَّیٰ عَلَیٰ الْباب هَم، وَ هُوَّ چان یُوعِظ ألهُم الْکَلام. 3بي هِل وَکِت، وُصلَت جَمعیَّه، یابُوا لِه زِلْمه أمگَرَّم إلْلي أربَع أشخاص چانُوا حاملینَه. 4أمَّن بي سَبَب الْأزدِحام ما گِدْرُوا ایِّبونَه عِند عیسیٰ، شِلْعَوا سَگُف إلْلي چان فُوگ رَأس عیسیٰ. بَعَد ما فِتحَوا الْسَگُف، نِزِّلُوا أفراش إلْلي الْأمگَرَّم چان نایِم عَلِیه. 5وَکت إلْلي عیسیٰ شاف إیمانهُم، گِل لِلْأمگَرَّم: «یا ابني، إنْغُفرَن ذِنوبَک.» 6بَعَض مِن مُعَلِّمین التُّورات إلْلي چانُوا گاعدین أهناک، فَکِّرُوا مَعَ نَفِسهُم: 7«لِیش هَذا الْزِلمه هِیچ یِحچي؟ هَذا کُفُر! یاهو یِگدَر یِغفِر الذِّنوب غِیر الْإلَه؟» 8عیسیٰ بي نَفس الْوَکِت بي روحَه عِرَف إلْلي هِذول شِیْفَکرون بي نَفِسهم وَ گِلهُم: «لِیش بي گلوبکُم هِیچ إتْفَکرون؟ 9گولِت یاهي أسهَل لِهذا الْأمگَرَّم،”إنْغُفرَن ذِنوبَک“ لُو ”گوم وَ شیل أفراشَک وَ أمشي“؟ 10هَسّه خاطِر تِعُرفون إلْلي ابنِ الْإنسان، عِندَه أقتدار إلْلی عَل أرض یِغفُر الذِّنوب»، گال لِلْأمگَرَّم: 11«أگِلَک، گوم، شیل أفراشَک وَ روح لِلْبَیت!» 12ذاک الْزِلمه گام وَ بي لَحظَتها لِم أفراشَه وَ جِدَّام أعیون الْجَمیع طَلَع مِن أهناک. الْجَمیع إتحَیِّرُوا وَ مِن بَعَد ما مَجِدُّوا الْإلَه، گالُوا: «أبَد ما چِنَّا شایفین هِیچ شي.»
دَعوَة لاوي
13عیسیٰ بَعَد مَرَّه راح إلَیٰ راگ الْبَحَر. کِل الْجُموع إیَّوا یِمَّه وَ گام یِعَلِّمهُم. 14وَکت إلْلي چان یِتْمَشَیٰ، شاف لاوي ابِن حَلْفاي إلْلي چان گاعِد بي مَحَل أخذ الْضَریبه. گِلَّه: «أتْبَعني.» هُوَّ گام وَ تِبَعه.
15وَکت إلْلي عیسیٰ بي بَیت لاوي چان گاعِد عَلَیٰ السُّفره، چِثیر مِن مُجَمِّعین الْضَریبه وَ الْمُذنِبین چانُوا گاعدین مَعَه وَ مَعَ تِلامیذه عَلَیٰ السُّفره، لِأن چِثیر مِنهُم چانُوا مُتابِعینه. 16وَکت إلْلي مُعَلِّمین التُّورات إلْلي چانُوا مِن فَرقة الْفَریسیین، شافُوا عیسیٰ گاعِد عَلَیٰ السُّفره مَعَ الْمُذنِبین وَ مَعَ مُجَمِّعین الْضَریبه، گالُوا لِتَلامیذه: «لِیش یَأکِل أکِل وَیَّا مُجَمِّعین الْضَریبه وَ الْمُذنِبین؟» 17عیسیٰ مِن سِمَع هَذا الْحَچي گِلهُم: «الْأصَحاء ماهُم بي حاجَة طَبیب، بَلْ الْمَرضَیٰ. أنا مو یاي خاطِر أدعي الصّالِحین، بَلْ یای خاطِر أدعي الْمُذنِبین.»
سُؤال عَن الصِّیَام
18وَکت إلْلي تِلامیذ یَحیَّیٰ وَ فِرقَة الْفَریسیین چانُوا صایمین، بَعض النَّاس إیَّوا عِند عیسیٰ وَ گالُوا: «لِیش تِلامیذ یَحیَّیٰ وَ تِلامیذ فِرقَة الْفَریسیین یِصومون، أمَّن تِلامیذَک ما یْصومون؟» 19عیسٰ جاوَب: «هَلْ مُمکِن ضِیوف الْعِرِس یِصومون وَکت إلْلي الْعِرّیس مَعَهُم؟ لِحَد وَکت إلْلي الْعِرّیس مَعَهُم ما یِگِدرون یِصومون. 20أمَّن راح یُوصَل وَکِت إلْلي الْعِرّیس یِنْوُخِذ مِنهُم. بي ذِکن الْأیَّام یِصومون.
21«ماکو أحَد یِرگَع أگماش الْیِدید عَلَیٰ هِدِم عَتیج. لُو هِیچ یِسُوّي، الرِّگعه تِنْشِلِع مِن مَکانها، وَ رِگعَه الْیِدیده تِنْعِزِل مِن الْعَتیجه، وَ الشَّگ یِصیر أخَس. 22وَ هَم ماکو أحَد یِچِب شَراب الْیِدید بي رُکوات عِتَّج. لُو هِیچ یِسُوّي، ذاک الشَّراب یِشِگ الرُّکوات، وَ بي هِل شِکِل، الشَّراب وَ الرُّکوات أثنَینهِن یِتِلفِن. شَراب الْیدید کون یِنچَب بي رُکوات یِدیده.»
صاحِب الْشَبّات
23بي یُوم مِن أیَّام الْشَبّات، عیسیٰ چان یِتعَدَّه مِن بِین مَزارِع الْحُنطه وَ تِلامیذه هُمَّا وَ سایرین، ضَلَّوا یِحْوون بي سَنابِل الْحُنطه. 24عُلَماء فِرقَة الْفَریسیین گِلُولِه: «لِیش تِلامیذَک یِسَّوون شي إلْلي مو جائِز بي یُوم الْشَبّات؟» 25جاوَب: «لِهَسّه ما گَرِیتوا شِنهي عِمَل داوود الْمَلِک وَکت إلْلي چان مِحتاج وَ یاع هُوَّ وَ مُرافقینه؟ 26هُوَّ بي زمان أبیّاتار، کاهِن الْأعظَم، دَخَل بي بَیت الْإله وَ أکَل خُبز الْمُقَدَّس وَ أنْطا مُرافقینه هَم، وَلُو أکِل ذاک الْخُبُز بِس جائز لِلْکاهِنین.» 27بَعدِین گِلهُم: «الْشَبّات إنْجَعَل لِلْإنسان، مو الْإنسان لِلْشَبّات. 28حَسَب هَي، ابن الْإنسان، حَتَّیٰ صاحِب الْشَبّات.»
Currently Selected:
إنجیل مَرقُس 2: ACM
Highlight
Copy
Compare
Share
Want to have your highlights saved across all your devices? Sign up or sign in
©️2024 Korpu Company
