إنجیل مَرقُس 1
1
یَحیَّیٰ، یِجَهِز طَریق عیسیٰ
1بِدایَة إبشاره عَن عیسیٰ الْمَسیح ابن الْإلَه.
2بي کِتاب إشعیاء النَّبي مِکْتوبه:
«شوف، أوَّدي رَسُولي جِدَّامَک،
وَ هُوَّ راح یِجَهِز طَریقَک؛»
3«نِداء ذاک إلْلي یِصرَخ بي الصَّحراء:
”جِهْزوا طَریق الرَّب!
أعِملوا طُرُقه مُستَقیمه.“»
4چا إیّه یَحیَّیٰ الْمُعَمِّد وَ عَمَد النَّاس بی الصَّحراء. یَحیَّیٰ عَلَم النَّاس وَ چان ایگول: «توبوا لِغُفران ذِنوبکُم وَ أخذوا غُسل الْتَعمید.» 5أهالي مَنطَقة الْیَهُودیَّه وَ ناس أورشَلیم، الْجَمیع چانُوا یِرحون یِمَّه وَ چانُوا یِعْتَرفون بي ذِنوبهُم وَ بي نَهَر أُردُن چانُوا یَأخذون مِنَّه غُسل التَّعمید. 6یَحیَّیٰ چان یِلبَس هِدِم مِن صوف الْیِمَل وَ چان یِشِد أحزام مِن یِلِد، وَ چان یَأکِل یَراد وَ عَسَل بَرّي. 7هُوَّ چان یُوعَظ وَ ایگول: «مِن بَعدي، ایّي واحَد أقوَیٰ مِنّي إلْلي حَتَّي ما أسْتاهِل أدَنِّج وَ أفتَح إخیوط قِنادرَه. 8أنا عَمِّدِتکُم بي الْماي، أمَّن هُوَّ یِعَمِّدکُم بي روح الْقُدُس.»
تَعمید عیسیٰ
9بي ذِنیچ الْأیَّام، ایّه عیسیٰ مِن مَدینَة ناصِرَه الَّذي بي مَنطَقَة الْجَلیل وَ بي نَهر الْأُردُن إتْعَمَّد عَلَیٰ إید یَحیَّیٰ. 10وَکت إلْلي عیسیٰ چان یِطلَع مِن الْماي، بي نَفس الْوَکِت شاف إنْفِتحَت السَّماوات وَ روح الْإلَه مِثِل حَمامَه گاعِد یِنزِل عَلِیه. 11وَ وُصَل نِدَاء مِن السَّماء إلْلي «أنتَ أبني الْمَحبوب؛ وَ أنا وایِد راضي مِنَّک.»
أمتِحان عیسیٰ
12الرّوح بي نَفس الْوَکِت خِذَّه عیسیٰ إلَیٰ الصَّحراء. 13عیسیٰ أربَعین یُوم چان بي الصَّحراء وَ الشَّیطان جَرُبَه. هُوَّ چان بِین حِیوانات الْوُحوش وَ الْمَلائِکه چانِن یخِدْمَنه.
عیسیٰ یِستَبدي خِدِمتَه
14مِن بَعَد أعتقال یَحیَّیٰ، عیسیٰ راح لِمَنطَقة الْجَلیل. وَ چان یِعلِن إبشارَة الْإله 15وَ چان ایگول: «وُصلَت ساعَة الْإمقَرَّره وَ إتْگَرَّب مَلَکوت الْإلَه. توبوا وَ آمِنوا بي هَي الْإبشارَه.»
أوَّل تِلامیذ عیسیٰ
16وَکت إلْلي عیسیٰ چان یِمُر مِن راگ بَحر الْجَلیل، شاف شَمعون وَ أخو شَمعون آندریاس إلْلي چانُوا یِذِبّون الشِّبَچ بي الْبَحَر، لِأن چانُوا صَیَّادین سِمَچ. 17گِلهُم: «أتِبْعوني إلْلي راح أصْنَع مِنکُم صَیَّادین النَّاس.» 18ذاکول بي نَفس الْوَکِت ذِبُّوا شِبَچْهُم وَ تِبْعوه. 19مِن أشوَي راح جِدَّام، شاف یَعقوب ابِن زِبِدي وَ أخوه یُوحَنَّا إلْلي بي بَلَمهُم چانُوا یِجَهْزون الْشِبَچ. 20إبسَع صاح ألهُم. چا ذاکول عافُوا أبوهُم مَعَ الْعُمّال بي الْبَلَم، وَ راحُوا وَراه.
شَفاء زِلْمه الْمِتلَبَّس روح شَیطانیّه
21ذاکول راحُوا إلَیٰ مَدینة کَفَرناحوم. وَکت إلْلي وُصَل یُوم الْشَبّات، عیسیٰ بي نَفس الْوَکِت راح لِمَحَل عِبادَة الْیَهُود وَ گام یِعَلِّم. 22النَّاس فِهُوا مِن تَعلیمه، لِأن بی أقتدار چان یِعَلِّم، مو مِثِل مُعَلِّمین التُّورات. 23بي ذاک الْوَکِت، بِي مَحَل عَبادَتهُم چان زِلْمه إلْلي چان عِندَه روح خَبیثه. هُوَّ صِرَخ: 24«یا عیسیٰ النَّاصِري، شِنهو شُغلَک وَیَّانا؟ هَل یاي تِهلِکنا؟ أدري بیک أنتَ یاهو! أنتَ ذاک قُدّوس الْإلَه!» 25عیسیٰ عاتَبها وَ گال: «إسکتي وَ أطلعي مِنَّه!» 26بَعدِین روح الْخَبیثه حِیل هِزَّت ذاک الْزِلمه وَ بي صَریخ عالي طَلْعَت مِنَّه. 27جَمیع النَّاس إتْحَیِّرُوا وَ واحَد چان یِسأَل مِن الْآخَر: «هَي شِنهي؟ تَعلیم یِدید مَعَ سُلطه! هُوَّ حَتَّیٰ یُؤمُر أرواح الْخَبیثه وَ هنَّه یِطیعَنه.» 28چا ما طَوَّل شي إلْلي سِمِعْتَه أنتِشرَت بي کِل مَنطَقَة الْجَلیل.
شَفاء أُم مَرَت پِطرُس وَ چِثیرین آخَر
29وَکت إلْلي عیسیٰ تَرَک مَحَل الْعِبادَه، بي نَفس الْوَکِت مَعَ یَعقوب وَ یُوحَنَّا راح لِبَیت شَمعون وَ آندریاس. 30أم مَرَت شَمعون چانَت إمْسَخنه وَ نایمه بي الْأفراش. ذاکول بي نَفس الْوَکِت خَبِّرُوا عیسیٰ عَن حالِتْها. 31چا عیسیٰ راح یِمها وَ کَض إیدها وَ گَوَّمها. إنگُطْعَت إسْخونَتها وَ گامَت وَ إلتِهَت بي خِدمَتهُم.
32بَعَد ما سَلِّمِت الشَّمس، بِاللِّیل، یابُوا کِلِ الْمَرضیٰ وَ مِتلَبسین أرواح الْشَیطانیّه عِند عیسیٰ. 33کِل ناس الْمَدینه چانُوا مِجتَمعین عَلَیٰ باب الْبَیت! 34عیسیٰ شِفَیٰ چِثیر مِن إلْلي چان صایِبهُم أمراض مُختَلفه، وَ هَم طَلَّع چِثیر مِن أرواح الْشَیطانیّه، أمَّن ما سِمَح لِأرواح الْشَیطانیّه یِحچَن إحچایه، لِأن چانَن یِعُرفَنه.
وَعْظ عیسیٰ بي الْجَلیل
35بي الْفَجُر إلْلي بَعَدهو چان ظَلام، عیسیٰ گام وَ تِرَک الْبَیت، وَ راح إلَیٰ مَکان مَتْروک وَ أهناک إنْدَعیٰ. 36شَمعون وَ إلْلي چانُوا مَعَه، گامُوا یِدَوْرون عَلِیه. 37وَکت إلْلي لِگُوه، گِلُولِه: «الْجَمیع گاعدین یِدَوْرون عَلِیک!» 38عیسیٰ گِلهُم: «تَعالوا إنْروح لِلْقُرَیٰ الْمُجاوِرَه خاطِر أهناک هَم أوْعِظ، لِأن یاي لِخاطِر هَي.» 39چا راح، وَ بي کِل مَنطَقة الْجَلیل چان یُوعِظ بي مَحَل عِبادَة الْیَهُود وَ چان یِخَرُّج أرواح الْشَیطانیّه.
شَفاء فِرِد زِلْمه جُذامي
40فِرِد زِلْمه جُذامي إیّه عِند عیسیٰ وَ رِکَع جِدَّامه، إتْرَجّاه وَ گال: «لُو إترید، تِگدَر تِشفیني.» 41عیسی بي حِنِّیَه مَد إیده، لِمَس ذاک الْزِلمه وَ گال: «أرید، أشفَیٰ!» 42بي لَحظَتها، الْجُذام تَرَکه وَ شِفَیٰ. 43عیسیٰ بي نَفس الْوَکِت رَخَّصه وَ أکَد عَلِیه 44وَ گِلَّه: «شوف، عَلَیٰ هِل مود لا تْگول شي لِأحَد؛ بَلْ روح وَ راوي نَفسَک لِلْکاهِن وَ لِطَهّارتَک، قِدِّم شي إلْلي أمَر بيه موسیٰ، خاطِر إیکون ألهُم شَهادَه.» 45أمَّن ذاک الْزِلمه مِن طَلَع بَرّا، بي حُرّیه حِچه عَلَیٰ هِل مود وَ نِشَر ذاک الْخَبَر. بي هِل سَبَب عیسیٰ بَعَد ما گِدَر عَلَیٰ الْمَکشوف یِدخُل بيالْمَدینه، بَلْ چان یِضُل بي أماکِن مَتْروکه. بي هِل حال، النَّاس مِن کِل الْأطراف چانُوا إیّون عِندَه.
Currently Selected:
إنجیل مَرقُس 1: ACM
Highlight
Copy
Compare
Share
Want to have your highlights saved across all your devices? Sign up or sign in
©️2024 Korpu Company
