لوقا 14
14
عیسیٰ بي بِیت الْفَریسي
1بي یُوم مِن أیَّام الْشَبّات عیسیٰ چان مَعزوم و راح لِبَیت واحَد مِن قادَة فِرقَة الْفَریسیین، الْحُضّار بي دِقّه چانُوا یِراقبونه. 2چان إمگابله زِلمه مَریض إلْلي جِسمه چان إمعَبّه ماي. 3عیسیٰ سِأَل مِن الْفُقَهاء وَ فِرقَة الْفَریسیین: «هَلْ الشَّفاء بي یُوم الْشَبّات یِجوز لُو لا؟» 4ذاکول ضَلَّوا ساکتین. چا عیسیٰ کَض ذاک الْزِلمه، شِفَاه وَ رَخُّصَه. 5بَعدِین إلتِفَت ألهُم وَ سِأَل: «یاهو مِنکُم إلْلي ابنه لُو ثورَه بي یُوم الْشَبّات یِطیح بي الْبیر وَ بي سُرعَه ما یِطَلعَه؟» 6ذاکول ما چان عِندهُم جَواب.
7وَکت إلْلي عیسیٰ شاف الضِّیوف إشلون یِختارون صَدر الْمَجلِس ألهُم، یاب ألهُم هَذا الْمَثَل: 8«وَکت إلْلي أحَد یِعِزمَک لِحَفلَة الْعِرِس، لا تِگعِد بي صَدر الْمَجلِس، لِأن بِلکِة واحَد أعرَف مِنَّک إیکون مَعزوم. 9بي ذاک الْوَکِت، الْإمعَزِب إلْلي عازِم أثنَینکُم، ایّي وَ ایگِل لَک: ”أُنطي مَکانِک لِهَذا الْشَخُص.“ تِنجُبُر بي فِشله إتروح وَ تِگعِد حَدر الْمَجلِس. 10بَلْ وَکت إلْلي أحَد یِعِزمَک، روح وَ إگعِد حَدر الْمَجلس، خاطِر مِن ایّي الْإمعَزِب، ایگِل لَک: ”یا صَدیقي، إتْفَضَّل أگعِد بي الصَّدِر.“ بَعدِین تِعْلَیٰ عِند باجي الضِّیوف. 11لِأن کِلمَن یِکَبُّر نِفسه، یِضغَر، وَ کِلمَن یِضَغُّر نِفسه، یِکبَر.»
12بَعدِین عیسیٰ گال لِإمْعَزبه: «وَکت إلْلي تِعزِم عَلَیٰ غِداء لُو عَشاء، لا تِعزِم ألاْصدقاء وَ الْخُوّان وَ الْگَرایِب وَ جیرانَک الْغَنیین، لِأن ذاکول هَم یِعِزمونَک وَ بي هِل شِکِل تِتْعَوَّض. 13چا وَکت إلْلي إتْسَوّي عَزیمه، أعزِم الْفُقَراء وَ الْمَعلولین وَ الْعِریان وَ الْعِمیان 14خاطِر إتْحَصُّل بَرَکه؛ لِأن ذاکول ما عِندهُم شي یِعَوضونَک، وَ تِلگه أجرَک بي قیامَة الصّالِحین.»
مَثَل عَزیمَة الْچِبیره
15وَکت إلْلي واحَد مِن الضِّیوف إلْلي چان گاعِد مَعَ عیسیٰ عَلَیٰ السُّفرَه، سِمَع هَي، گال: «خِیعون ذاک إلْلي یَأکِل أکِل بي عَزیمَة مَلَکوت الْإلَه.» 16عیسیٰ بي الْجَواب گال: «فِرِد شَخُص سَوّا عَزیمَه چِبیره وَ عِزِم چِثیرین. 17وَکت إلْلي وَصَل وَکت الْعَشاء، وَدَّه خادمه خاطِر ایگِل لِلْمَعزومین، ”تَعالوا إلْلي کِل شي جاهِز.“ 18أمَّن ذاکول کِل واحَد یاب عِذِر. واحَد گال: ”مِشْتِري زَرِع إلْلي کون أروح أشوفه. أتْمَنَّیٰ إلْلي تِعذِرني.“ 19الْآخَر گال: ”شاري خِمِس تِیواز ثور، وَ هَسّه أنا بي الطَّریق خاطِر أمتِحِنهِن یِفیدَنّي لُو لا. أتْمَنَّیٰ تِعذِرني.“ 20الثّالِث هَم گال: ”تَوْني مِتزَوِّج، وَ بي هِل سَبَب ما أگدَر أیّي.“ 21چا الْخادِم رِجَع وَ خَبَّر سِیِّده. سِیِّده حُمَگ وَ أمَر الْخادِم بي سُرعَه ایروح لِلشّارِع وَ سوگ الْمَدینه، وَ إیِّب الْفُقَراء وَ الْمَعلولین وَ الْعِمیان وَ الْعِریان. 22الْخادِم گال: ”یا سِیِّدي، صار أمرَک، أمَّن بَعَد اکو مَکان.“ 23چا سِیِّده گال: ”روح لِلطُّرُق وَ بَرّات الْمَدینه وَ بي لَح یِب النَّاس لِعَزیمتي خاطِر یِنْتِرِس بَیتي. 24أگِلکُم إلْلي وَلا أحَد مِن الْمَعزومین، یِذوگ عَشاي.“»
ثَمَن مُتابِعَة الْمَسیح
25جَمعیَّه چِثیره چانُوا وَیَّا عیسیٰ. هُوَّ إلتِفَت ألهُم وَ گال: 26«کِلمَن ایّي عِندي وَ ما یِغسِل إیدِیه مِن أبوه وَ أمّه، مَرته وَ أولاده، أُخوه وَ أخته، وَ حَتَّیٰ نِفسه، ما یِگدَر إیکون تِلمیذي. 27وَ کِلمَن ما یِحمِل صَلیبه عَلَیٰ چِتفه وَ ما ایّي وَراي، ما یِگدَر إیکون تِلمیذي.
28«یاهو مِنکُم إلْلي ایرید یِبْني بُرُج وَ أوَّل ما یِگعِد حَتَّیٰ یِحسِب إحساباته وَ ایشوف یِگدَر یِکَمله لُو لا؟ 29لِأن لُو حَطِّ السّاس أمَّن ما گِدَر یِکَمِّل الْبِناء، کِلمَن یِشوفه، یِمَسخُرَه، 30ایگول: ”هَذا الشَّخُص أبتِدَء بي عَمار الْبِناء، أمَّن ما گِدَر یِکَمله!“
31«وَ یا مَلِک ایروح یِحارِب مَلِک آخَر، بِدون ما أوَّل یِگعِد وَ یِفَکِّر هَلْ بي عَشُر تالاف جِندي یِگدَر یِجابِل أحَد إلْلي یاي یِحاربه بي عِشرین ألِف جِندي؟ 32وَ لُو یِشوف ما یِگدَر یِجابِل، وَکت إلْلي جِیش الْعَدو بِعید، یِوَدّي مِن طَرَفه وَکیل خاطِر یِسأل شُروط السَّلام. 33بي هِل شِکِل، أحَد مِنکُم هَم لُو ما یِغسِل إیدِیه مِن کِل أمواله، ما یِگدَر إیکون تِلمیذي.
34«الْمِلِح طَیِّب، أمَّن لُو یِفقِد خاصیته، إشلون ایصیر إنوب إتصَلحَه؟ 35لا یِفید لِلْأرض وَ لا یِفید لِلسِّماد؛ بَل یِذِبّونه بِعید. کِلمَن عِنده إذِن لِلسِّمِع، خِلْ یِسمَع!»
Currently Selected:
لوقا 14: ACM
Highlight
Copy
Compare
Share
Want to have your highlights saved across all your devices? Sign up or sign in
©️2024 Korpu Company
