إنجیل یُوحَنَّا 21
21
ظُهور عیسیٰ عَلَیٰ سِبِع أشخاص مِن تِلامیذه
1مِن بَعَد هِذِن الْوَقایِع، عیسیٰ مَرَّه أخریٰ یِم بَحیرَة تیبِریه ظَهَر عَلَیٰ التِّلامیذ. هُوَّ هِیچ ظَهَر نَفسه: 2فِرِد یُوم شَمعون الْپِطرُس وَ توما الْمَعروف بي تُؤم وَ نَتَنائیل مِن نَاس قانا الْجَلیل وَ أولاد زِبِدي وَ أثنَین آخَر مِن التِّلامیذ چانُوا سُوا. 3شَمعون الْپِطرُس گِلهُم: «أنا أروح أصید سِمَچ.» ذاکول گالُوا: «إحنَا هَم نِیّي وَیَّاک.» چَا طَلعَوا وَ رِکبُوا الْبَلَم. أمَّن بي ذیچ اللِّیله ما صادُوا شي. 4بي وَکت الْفَجُر، عیسیٰ وُگَف بي راگ الْبَحیرَه؛ أمَّن التِّلامیذ ما عُرفُوا إلْلي هَذ عیسیٰ. 5عیسیٰ گِلهُم: «یا أولاد، ما عِندکُم شي لِلْأکِل؟» جاوُبُو: «لا!» 6گال: «ذِبّوا الشِّبچه عَلَیٰ یَمین الْبَلَم خاطِر إتْصیدون.» هِذول هِیچ عِملُوا وَ مِن کِثرَة السِّمَچ ما گِدْرُوا اییُرّون الشِّبچه داخِل الْبَلَم. 7تِلمیذ إلْلي عیسیٰ چان یِوَدَّه، گال لِپِطرُس: «هَذ هُوَّ الرَّب!» شَمعون الْپِطرُس وَکت إلْلي سِمَع إلْلي هَذ هُوَّ الرَّب، بي لَحظَتها لِف ثُوبه عَلَیٰ نَفسه وَ چان ذَب نَفسه بي الْبَحیره، لِأن چان نازعه. 8أمَّن باجي التِّلامیذ إیَّوا بي الْبَلَم، چانُوا اییُرّون الشِّبچه إلْلي چانَت مِتْروسه مِن السِّمَچ، وَ بِعِدْهُم وَیَّا راگ الْبَحیرَه چان میتَین إذراع.
9وَکت إلْلي وُصلَوا بي راگ الْبَحیرَه، شافُوا نَار مِشتَعله بي فَحَم وَ السِّمَچ مَحطوط عَلِیها، وَ خُبُز هَم چان. 10عیسیٰ گِلهُم: «یِبوا مِن ذاک سِمَچ إلْلي هَسّه صِدْتوا.» 11شَمعون الْپِطرُس راح بي الْبَلَم وَ یِر الشِّبچه لِراگ الْبَحیرَه. الشِّبچه چانَت مِتْروسه مِن سِمَچ إکبار، مِیَه وَ ثِلاثه وَ خِمسین سِمچه. أمَّن الشِّبچه ما إنْشَگَت مَعَ هَذ إلْلي چان بیها سِمَچ چِثیر. 12عیسیٰ گِلهُم: «تَعالوا إتْرَیِّگوا.» وَلا أحَد مِن التِّلامیذ إتْجَرَء یِسأَل مِنَّه، «أنتَ یاهو؟» لِأن چانُوا یِعُرفون إلْلي هُوَّ الرَّب. 13عیسیٰ أتْقَدَّم، کَض الْخُبُز وَ السِّمَچ وَ أنْطاهُم. 14هَي چانَت ثالِث مَرَّه إلْلي عیسیٰ مِن بَعَد ما گام مِن الْمُوتیٰ یِظْهَر نَفسه عَلَیٰ تِلامیذه.
مُکالِمَة عیسیٰ مَعَ پِطرُس
15بَعد الرِّیوگ، عیسیٰ سِأَل مِن شَمعون الْپِطرُس: «یا شَمعون، ابِن یونا، إتْحِبّني أکثَر مِن هِذول؟» هُوَّ جاوُب: «نَعَم یا سِیِّدي؛ أنتَ تُعرُف إلْلي أحِبَّک.» عیسیٰ گِلَّه: «راقِب طُلیاني.» 16مَرَّه ثَانیه عیسیٰ سِأَل مِنَّه: «یا شَمعون، ابِن یونا، إتْحِبّني؟» جاوُب: «نَعَم یا سِیِّدي؛ تُعرُف إلْلي أحِبَّک.» عیسیٰ گال: «کون راعي لِغَنْمي.» 17ثالِث مَرَّه عیسي گِلَّه: «یا شَمعون، ابِن یونا، إتْحِبّني؟» پِطرُس مِن هَي إلْلي عیسي ثِلِث مَرَّات سِأَله، «إتْحِبّني؟» زَعَل وَ جاوُب: «یا سِیِّدي، أنتَ تِعلَم کِل شي؛ أنتَ تُعرُف إلْلي أحِبَّک.» عیسیٰ گال: «راقِب غَنْمي. 18بِالْحَق، بِالْحَق، أگِلَک، وَکت إلْلي چِنِت شاب چِنِت إتْشِد أحزامَک وَ وَین ما إتْرید إتْروح؛ أمَّن مِن إتْشَیِّب تِفتَح إیدَیک وَ غِیر واحَد یِشِد أحزامِک، یَأخذَک مَکان إلْلي ما إتْریده.» 19عیسیٰ بي هَذا الْکَلام چان یِأَشِّر بي شِکِل مُوتِة پِطرُس إلْلي بیها یِمَجِّد الْإلَه. بَعدِین عیسیٰ گِلَّه: «أتْبَعني.»
20بَعدِین پِطرُس إلْتِفَت وَ شاف ذاک تِلمیذ إلْلي عیسیٰ چان یِوَدَّه یِتبَعهُم. ذاک هُوَّ چان إلْلي وَکت الْعَشاء إنتِچه مِن گُفاه عَلَیٰ صَفحَة عیسیٰ وَ سِأَل مِنَّه، «یا سِیِّدي، یاهو إلْلي یِسَلمَک لِلْعَدو؟» 21وَکت إلْلي پِطرُس شافه، سِأَل مِن عیسیٰ: «یا سِیِّدي، چَا هَذا شِیصیر لَه؟» 22عیسیٰ گِلَّه: «لُو أرید یِبقیٰ لِوَکِت رَجِعتي، أنتَ إش عَلِیک؟ أنتَ أتْبَعني!» 23چَا هَذا الْفُکُر شاع بِین الْخُوّان إلْلي ذاک التِّلمیذ ما یِموت، أمَّن عیسیٰ ما گال لِپِطرُس إلْلي ذاک ما یِموت، بَل گال: «لُو أرید یِبقیٰ لِوَکِت رَجِعتي، أنتَ إش عَلِیک؟»
24ذاک التِّلمیذ هُوَّ إلْلي یِشهَد عَلَیٰ هِذِن وَ هُوَّ کاتِبهِن. إحنَا نِدْري شَهادته حَقیقه. 25عیسیٰ عِمَل أعمال چِثیره أخریٰ إلْلي لُو چانَن مِکْتوبات وَحده وَحده، ما أظُن حَتَّیٰ چَان صَار مَکان لِذَنیچ الْکُتُب بي کِل الْعالَم.
Currently Selected:
إنجیل یُوحَنَّا 21: ACM
Highlight
Copy
Compare
Share
Want to have your highlights saved across all your devices? Sign up or sign in
©️2024 Korpu Company
