إنجیل یُوحَنَّا 16
16
1«گِلتِلکُم هِذِن الْأشیاء خاطِر لا تْعِثرون مِن إیمانکُم. 2یِخَرجونکُم مِن مَحَل عِبَادة الْیَهُود وَ حَتَّیٰ یوصَل وَکِت إلْلي کِلْمَن یِقتِلکُم، یِظُن گاعد یِخدِم الْإلَه. 3راح یِعِملون هِذِن الْأعمال، لِأن لا یِعُرفون الْأب، وَ لا یِعُرفوني. 4گِلتِلکُم هِذِن خاطِر مِن یوصَل وَکِتهِن، تِتْذَکَّرون إلْلي چِنِت إمْنَبِّهکُم وَ ما گِلتِلکُم هِذِن مِن الْبَدایَه لِأن چِنِت مَعَکُم.
عَمَل روح الْقُدُس
5«أمَّن هَسّه أروح عِند الْإموَدّیني، وَ وَلا أحَد مِنکُم یِسأَلني، ”وَین إتروح؟“ 6أمَّن بي سَبَب هَي إلْلي إتْصَنَّطتوا لِکَلامي، گَلُبکُم مِتْروس مِن الْهَم. 7بي هِل حال، أنا أگِلکُم الْحَقیقه إلْلي روحتي بي نِفِعکُم. لِأن لُو ما أروح، ذاک الْمُعین ما ایّي عِندکُم؛ أمَّن لُو أروح أوَدّيه عِندکُم. 8وَکت إلْلي هُوَّ ایّي، یِقَنِع الْعالَم أن الْعالَم مُخطئ بي سَبَب الذَّنِب وَ الْصَالِحیَّه وَ الْقَضاء. 9بي سَبَب الذَّنِب، لِأن ما یُؤمِنون بیِه. 10بي سَبَب هَي إلْلي إشلون إیکونون صالحین، لِأن أروح عِند الْأب وَ بَعَد ما تْشوفوني. 11وَ بي سَبَب الْقَضاء، لِأن رَئیس هَذا الْعالَم یِنْحُکُم.
12«بَعَد عِندي أشیَاء چِثیره إلْلي أگِلکُم، أمَّن هَسّه ما تِتْحَمِّلون سِمِعهِن. 13أمَّن وَکت إلْلي روح الْحَقّ ایّي، یِرشِدکُم لِکِل الْحَقیقه؛ لِأن هُوَّ ما یِتکَلَّم مِن نَفسه، بَل شي إلْلي یِسِمعه ایگوله وَ یِکَلِّمکُم مِن شي إلْلي قادِم. 14هُوَّ راح یِمَجِّدني، لِأن یَأخذ شي إلْلي مالي وَ یِعِلنه ألکُم. 15کِل شي إلْلي لِلْأب، إلي. بي هِل سَبَب گِلِت یَأخذ شي إلْلي مالي وَ یِعِلنه ألکُم.
هَمکُم یِتْحَوَل لِلْفَرَح
16«مِن بَعَد مُدَّه قَلیله، بَعَد ما راح تْشوفوني وَ بَعدِین مِن بَعَد مُدَّه قَلیله، بَعَد مُرَّه راح إتْشوفوني.» 17چَا بَعَض مِن تِلامیذه واحَد گِل لِلْآخَر: «شِنهو قَصده مِن هَي الْإحچایه، ”مِن بَعَد مُدَّه قَلیله، بَعَد ما راح تْشوفوني، وَ بَعدِین مِن بَعَد مُدَّه قَلیله، بَعَد مُرَّه راح إتْشوفوني“؟ لُو مِن هَي الْإحچایه إلْلي ایگول ”لِأن أروح عِند أبوي“؟» 18چَا واحَد چان ایگول لِلْآخَر: «هَي ”مُدَّه الْقَلیله“ إلْلي ایگولها، شِنهي؟ ما نُعرُف قَصده.» 19أمَّن عیسیٰ مِن گَبُل چان یِدري یِردون یِسِألونه؛ چَا گِلهُم: «هَل عَلَیٰ هَي تِتْباحِثون إلْلي گِلِت، ”مِن بَعَد مُدَّه قَلیله، بَعَد ما راح تْشوفوني، وَ بَعدِین مِن بَعَد مُدَّه قَلیله، بَعَد مُرَّه راح إتْشوفوني“؟ 20بِالْحَق، بِالْحَق، أگِلکُم، أنتُم تِبْچون وَ إتْنوحون، أمَّن الْعالَم یِفرَح؛ أنتُم تِحِزنون، أمَّن هَمکُم یِتحَوَل لِلْفَرَح. 21الْمَراء بي وَکت الْوَلاده تِتْوَجَّع، لِأن واصله ساعَة مِییبها؛ أمَّن وَکت إلْلي تُولِد طِفِلها، بَعَد ما تِتْذَکَّر وَیَعها، لِأن فَرحانه مِن هَي إلْلي إنسان یَاي بي الْعالَم. 22بي هِل شِکِل، أنتُم هَم هَسّه مِهمومین؛ أمَّن بَعَد مَرَّه راح أشوفکُم وَ گَلُبکُم یِفرَح وَ وَلا أحَد یِگدَر یَأخِذ مِنکُم ذیچ الْفَرحه. 23بي ذاک الْیُوم، بَعَد ما تِرْدون شي مِنّي أنا. بِالْحَق، بِالْحَق، أگِلکُم، کِل شي إلْلي بي أسمي تِطُلبون مِن الْأب، یِنْطیکُم أیَّاه. 24لِهَسّه ما طَلَبتوا شي بي أسمي؛ اُطُلبوا خاطِر إتْحَصلون وَ فَرحَتکُم تِکمَل.
25«بي شِکِل مَثَل گِلتِلکُم هِذِن؛ أمَّن یُوصَل وَکِت إلْلي بَعَد بي هِل شکل ما أحاچیکُم، بَل عَل مَکشوف أکَلِّمکُم عَن الْأب. 26بي ذاک الْیُوم، تِطُلبون بي أسمي. طَبعاً مو لازِم أنا أوَصّي الْأب بیکُم خاطِر یِنْطیکُم شي إلْلي تِردونه؛ 27چِیمِن الْأب هُوَّ یِحِبکُم، لِأن أنتُم إتْحِبّوني وَ آمَنتوا إلْلي أنا یَاي مِن صُوب الْإلَه. 28أنا یَاي مِن صُوب الْأب وَ دَخَلِت هَذا الْعالَم؛ وَ هَسّه أترِک هَذا الْعالَم وَ أروح صُوب الْأب.»
29بَعدِین تِلامیذه گالُوا: «هَسّه عَل مَکشوف تِتْکَلَّم، مو بي مَثَل. 30هَسّه بَعَد نِدْري الْلي تُعرُف کِل شي وَ حَتَّیٰ ما تِحتاج أحَد یِسأَل سُؤاله مِنَّک. بي هِل سَبَب، نُؤمِن إلْلي أنتَ یَاي مِن صُوب الْإلَه.» 31عیسي گِلهُم: «چَا هَسّه، آمَنتوا؟ 32هَسّه یُوصَل ذاک الْوَکِت، وَ بِالْحَق واصِل، هُوَّ زمان إلْلي إتْطَشون وَ کِلْمَن ایروح لِبَیته وَ إتْخِلّوني لِوَحدي؛ مَعَ هِل حال أنا ماني لِوَحدي، لِأن الْأب مَعَي. 33گِلتِلکُم هِذِن خاطِر یِطیب خاطِرکُم بیِه. یِضیج بیکُم الْعالَم؛ أمَّن قَوّا گُلوبکُم، لِأن أنا فِزِت عَلَیٰ الْعالَم.»
Currently Selected:
إنجیل یُوحَنَّا 16: ACM
Highlight
Copy
Compare
Share
Want to have your highlights saved across all your devices? Sign up or sign in
©️2024 Korpu Company
