Alawi 27
27
Malagalaki gukupia nhupi kwaka Sapanga
1Bambu Sapanga ampwagila Musa, 2“Waapwagila Aizilaeli ana, ana mundu jokapi julagi nazili jukumbiki mundu nepani Bambu Sapanga, lakini ana mundu hoju ngasejiiwesa kumbiki nepani jupia lupija ngati ana, 3mwanalomi wa yaka ishilini na yaka sitini jwikombuliwa ku kwi ipandi ya madini ga feza amusini kulengana na shekeli ja pandu paka Sapanga. 4Ana mmbomba, jwiikombuliwa kwi ipandi selasini ya madini ga feza. 5Ana mundu hoju jubii kati ja yaka nhwanu mbaka ishilini jwiikombuliwa kwi ipandi ya madini ga feza ishilini ana mwanalomi, lakini ana mmbomba kwi ipandi ya madini ga feza komi. 6Mwana jwa mwei gumu mbaka yaka nhwanu, jwiikombuliwa kwa ipandi ya madini ga feza nhwanu mwanalomi ana mbomba jwikombuliwa kwi ipandi ya madini ga feza itatu, 7Ana mundu hoju jubii na yaka sitini, kukombulewa kwaki kwi ipandi ya madini ga feza komi nu nhwanu ngati na mwanalomi, lakini kwi ipandi ya madini ga feza komi jugombuliwa mmbomba. 8Lakini ana mundu hoju nhagu na ngajuwesa kulepa malepu gaki, ndienu mundu hoju baampelika kuku nngolu waka Sapanga. Nngolu waka Sapanga jwiipema ulenganu waki kulengana nu uwesu waki jojulagi hoju.”
9“Ana mundu jalagani na Sapanga nu kulagani je hoku ndi kukupia kinyama sesuse bandu bumpiki Bambu Sapanga, kinyama sa sehesi kikuba sindu saka Sapanga. 10Ngakwiipaliki kunng'anambuka kupia kinyama si lihaa kwi kinyama saamboni, ana juking'anambwiki kinyama sengi yoti yiibiya yaka Sapanga.
11“Ana sejulagi sehesi ndi kinyama sanga kujetakeka ku litambiku lukumpiiki Bambu Sapanga, ndienu mundu jojupiiki jukileta kuku nngolo, 12najwombi nngolu bei jaki kulengana wamboni au ubaja waki. Ngati ejwiihamua nngolu, ndi ekwiibiya. 13Lakini ana mweni jupai kukikombo, ndienu, jwijonnzukiya asilimia ishilini ja bei ji kinyama hesi.”
14“Ana mundu jujibei nyumba kwaka Bambu Sapanga kuba jaka Sapanga, nngolu waka Sapanga jwiamua malepu gaki kulengana na uwamboni au upija waki. Ngati ejwiamua nngolu waka Sapanga ndi ekwibia. 15Ana mundu hoju jojijibei palongi jaka Bambu Sapanga, ana jupai kujigombo nyumba heji, ndienu jwiijonzukia asilimia ishilini pa bei jaki, najombi jibia nyumba jaki.”
16“Ana mundu jugubei nngonda waki, goguwe ndi ulisi waki, kuba waka Bambu Sapanga, ndienu bei jaki jiipemwa kulengana nu nngonda hogu, kwa kila kilu ishilini ya shayili jaki jibia ipandi hamusini ga madini ga feza. 17Ana jugubei ngonda waki palongi jaka Bambu Sapanga mu saka sukuhenga matola jukukombuke, yaka amusini, bei jaki ndi jiipalika jilengana ni ipemu yino. 18Lakini anajulibei palongi jaka Bambu Sapanga baada ja mwaka hogu, enu nngolu waka Sapanga jwiamua bei jaki kulengana na yaka yeihigali kuhiki saka sukukombukela yaka amusini na bei jaki jitenda kupungua. 19Ana jupala kulikombo mweni ndi kwiipalika jujozukia asilimia ishilini ja galama ju ngonda hogu, nawombi wiikuba waki. 20Lakini anangase jupala kuligombo au nngolu waka Sapanga ana andombasi jongi, enu, ngonda hogu wiikombolewa kabee. 21Mu saka su kulekakewa nngonda hogu bagulekakea wiibiya wangu nepani Bambu Sapanga masoba goti. Nngolu waka Sapanga ndi wiibiya waki.”
22Ana mundu jugubei palongi jangu nepani Bambu Sapanga ngonda gojulombiki nga waki kukulisi, 23nngolu waka Sapanga jwiiamua galama ju nngonda hogu kulengana na yaka yeihigali kuhiki saka su kukomboka yaka amusini na mundu hoju jwiipalika kulepa galama jaki ngati sindu sekijetakeka kwaka Bambu Sapanga. 24Lakini mu saka sukukomboka yaka amusini, ngonda hogu ndi kwiipalika ankelabukia mundu jojililombisi jola. 25Kila malepu giipemwa kwiipemu yukutopee kwiipandi simu sa madini ya feza kulengana ni ipemu ya pandu paka Sapanga. Kutope kwaki jahegalia lobu kilu nakutopee kwa shekeli jimu. 26Ngasekupalika kukibeka kwaka Bambu Sapanga kibeleku sukutumbuli kusaliwa si kinyama kwa ndaba hesi ndi mali gaki, kikubi sa ng'ombi au likondoo.
27Lakini ana kinyama hesi ngasekijetakeka palongi jangu, mweni juwesa kulomba kulengana na eampema na jwiijonzukia asilimia ishilini ja galama ji kinyama hesi. Ana ngakukikombola, ndienu jwiilombisa kulengana na bei jejipalika.
28“Lakini sindu sokapi sekibekikwi kwaka Bambu Sapanga, kikubi mundu au kinyama au sindu sekipatikini sukulisi, ngakilombeswi wala kukikombola. Sokapi sekibekwiki palongi jangu nepani Bambu Sapanga hesi ndi saka Sapanga ngani. 29Mundu jokapi jobummbekiki kwaka Sapanga sukukomeka ndienu jwiikombolewa na kwiipalika kunkoma.”
30“Zaka ji ilebi ikubi imbeju au matunda gi mikongu, yoti ndi mali gangu nepani Bambu Sapanga, ndi ya sapi kwaka Bambu Sapanga. 31Ana mundu jupala kujikombo zaka jaki, jilepa galama jaki nukujonzukela asilimia ishilini ja bei ja zaka heji. 32Kupete mipugu ejibalangika, kila kinyama sa komi ndi saka Bambu Sapanga. 33Mundu jokapi ngasejubi nu uwesu ukulalukia ngati kinyama hesi ndi saamboni au kipija wala kinyama hesi nga kiilombiswi kwi kinyama sengi. Ana siilombasika kwikinyama sengi, inyama yoti ibeli ibiya yaka Sapanga, ngayikombolewi.”
34Haga ndi malagalaki gaguge Bambu Sapanga anndagalakia Musa ili jwaapwagila Aizilaeli kukitombi sa Sinai.
Currently Selected:
Alawi 27: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
