Uamusi 6
6
Gidioni
1Aizilaeli bahenga kabee kihakau palongi jaka Bambu Sapanga, najombi Bambu Sapanga jwaawesisa Amidiani jwaawesa kwi kipindi sa yaka saba. 2Amidiani baang'alisa ngamaa Aizilaeli, mbaka Aizilaeli bilihembila mabomba na makolu ku itombi kuba pandu pukujoba pabu. 3Kila mala Aizileli pabapanda imbeju mu migonda, Amidiani, Ahamaleki na bandu bangi buku mashaliki bahika kwaatukali. 4Akalonda bi milema heji babekiki kambi munndema hogu nu kuhalabana ilebi yoti punndema mbaka pumpaka uku Gaza sanga kwaaleke Aizilaeli sindu sokapi, likubi likondoo, au ng'ombi au liponda. 5Kwa ndaba bahika na mipugu jabu na mahema gabu gabiya gingi ngati makundu ga halwa. Kwabiya ngakuwesikana kwaabalanga bandu na ngamia yabu bababia bugutukali nndema nukuguhalabana. 6Amidiani bahenga Aizilaeli abiya akakapuku na banga na makili ndienu bunndelila Bambu Sapanga jwaajangatia.
7Aizilaeli pabunndelila Bambu Sapanga jwaabokia mang'aliku gabapata kuhuma kwa Amidiani, 8Bambu Sapanga jwaapelakia nndota waka Sapanga najombi jwaapwagila, “Bambu Sapanga, Sapanga jwa Aizilaeli jupwaga ana, ‘Numpia ku nndema uku Misili komwabii mwaatumwa, 9nunkombula kuhuma pai ju ulongosi wa Amisili boti bababia anng'alisa mwanganya. Naabenga bandu palongi jii nukumpeke mwanganya nndema wabu. 10Ndi nunkombusa kubanga nepani ndi Bambu Sapanga, Sapanga wino, na mwailumbali isapanga ya Ahamoli babube nndema wabu ntei kugujuku, lakini ngasemwajoani sauti jango.’”
11Ntumi jukunani waka Bambu Sapanga jwajenda nukutama pai ju nkongu nkolongu gobukema nhaloni guka Yoashi gogubii pambipi nuku Ofula, mundu ju lukolu lwa Abiezeli. Kipindi sehesi Gidioni mwana waka Yoashi jwabia jupeta inganu nkati ji libomba pandu paaminyi zabibu ili Amidiani baammbona. 12Ntumi jukunani waka Bambu Sapanga ampitila Gidioni nukumpwagi, “Bambu Sapanga jubii pamu na wehapa, we gubii na makili na wanga kujogopa.”
13Gidioni ampwagila, “Waa Bambu wangu ana Bambu Sapanga jubii pamu na twepani ndaba jaki majambu goti gani gatei kutupata? Gabii kwaa mahengu gaki makolongu gabutulandila akahoku bito koni bakapwaga, ‘Bambu Sapanga ndi jojutupia ku nndema uku Misili.’ Lakini henu Bambu Sapanga jaaleka Amidiani butung'alisa!”
14Ndienu, Bambu Sapanga ang'anambukia nukumpwagi, “Jenda ku uwesu gogubii naku wakaagombula Aizilaeli kuhuma kwa Amidiani. Boo, nga nepani lee ndi nenugutuma.”
15Gidioni anzibua, “Pepa koku Bambu, niiwesa boo kujigombo Izilaele? Lukolu lwangu ndi ngaselubii nu uwesu na makili mu likabila laka Manase na namweti nu nsoku ngani mu kilongu situ!”
16Bambu Sapanga ampwagila, “Nagujangatiya wehapa na wehapa waakoma Amidiani ngati gunkoma mundu jumu.”
17Gidioni ampwagila, “Nala ana gutei kunhagu nangia nginyuli ili manya wehapa ndi wegulongi nanepani. 18Nuguloba wiiboka pamba mbaka paniikelabuka nu kugulete nhupi yangu.”
Bambu Sapanga jwajibua, “Niitama pamba mbaka pawiikelabuka.” 19Gidioni jwajenda kunyumba jaki, nukuanda kambui na mabumunda ganga kujege amila kuhuma mu lidebi lu uwembi, jwajegala inyama mu kitonga ni imitu mu kibega, ndi jwapelika pai ju nkongu gu nhaloni nukumpeke. 20Ntumi jukunani jwaka Sapanga ampwagila, “Jukua inyama na mabumunda ganga kujege amila uibeka panani ji lilibu lende. Ndi gujegala imitu panani ja mabumunda ni inyama, najombi jwahenga ahelahela. 21Ntumi jukunani kwaka Sapanga jwanyosha ndonga jaki nukugusa inyama na mabumunda kwa ndonga apalapa mwotu wapitila mu lilibu watinia inyama na mabumunda. Ndi ntumi jukunani kwaka Sapanga jahoba palongi jaki.”
22Ndienu Gidioni jwamanya hoju jwabia ntumi jukunani jwaka Sapanga, jajamaliya kwa sauti, “Mitinikiboni nepani mwa Bambu Sapanga ndaba numbweni ntumi waku jukunani miu kwa miu.”
23Lakini Bambu Sapanga ampwagila, “Gubia pe nu lukwali wiijogopa nga wiikuwe.” 24Gidioni ansengila Bambu Sapanga pandu pukupiiki matambiku nu kupakema, “Bambu Sapanga ndi Lukwali lwangu.” Pandu pukupiiki matambiku haga ku Ofula, musi ulukolu lwaka Abiezeli mbaka lelenu.
25Ikilu heji Bambu Sapanga ampwagila Gidioni, “Jukua likambaku la ng'ombi limu la atati baku ni likambaku la pili lelibii na yaka saba. Bombula pandu pukupiiki matambiku gaka Baali ga atati baku nu kutunu kimong'umong'u sa Ashela sekibii pambipi naku. 26Ndienu gunsengila Bambu Sapanga, Sapanga waku sindu sasapi sukupiiki matambiku panani ja katombi kanga ngati ekupalika kusenga. Ndi gumbiikia litambiku lukutini ji likambaku la ng'ombi la pili sukutumi nhanzu yi kimong'umong'u sa Ashela segukitunwi.” 27Ndienu Gidioni jwaajukua atumisi baki komi, jwahenga ngati he jwalagalakia Bambu Sapanga. Lakini ndaba jwaajogopa alongu baki na bandu ba pamusi badala jukuhenga haga pamuhi, jwahenga ikilu.
28Bandu ba musi pabajumuka pulukela babona pandu pukupiiki matambiku ga Baali ni imong'umong'u sa Ashela sesabii pambipi atunwi pamu na ngombi ja pili jebatini panani ja mesa inyai jukupiiki matambiku jejwabia jusengiki pandu pala. 29Balaluana, “Boo, nya jojuhengiki lijambu heli?” Pabaendaliya kulaluana nukutaputa nakanopi bamanya kubanga Gidioni mwana waka Yoashi ndi jojuhengiki lihengu heli. 30Bandu bunzendila Yoashi, bumpwagila, “Mpia mwana waku tunkoma, ndaba juhalabini pandu pukupiiki matambiku ja Baali nu kutunu kimong'umong'u sa Ashela jejabi pambipi.”
31Lakini Yoashi jwaapwagila boti bababia atenda kumpenga, “Boo munkengale Baali? Boo mwitenda kunkombola? Jokapi jo jwankengalia Baali jwiikomika kabula jukukusa. Ana Baali ndi Sapanga ndi julikengalia mweni, ndaba pandu paki pukumpiiki matambiku atei kupabombola.” 32Lisoba heli bunkema Gidioni, “Yelubaali.” Lihina Baali mana jaki ndi julikengalia mweni, ndaba Gidioni japabombula pandu pukupiiki matambiku gaka sapanga Baali.
33Kipindi sehesi Amidiani na Ahamaleki na bandu boti baatama pulutengu ju upandi golipiti lyoba batenda kujetanganela kukomana pamu. Balombuka losi luku Yoludani nukubeka kambi yabu pi ligomba la Yezileeli. 34Lakini Loho jaka Bambu Sapanga junhikila Gidioni. Gidioni jwajemba imbata kwaakema bandu bu lukolu lwaka Abiezeli ahika kumpwata. 35Jwaatuma bandu mu nndema woti uku Manase ahika kumpwata. Bandu bangi jwaatuma kwaakema bandu ba makabila guku Asheli na Zebuloni na Nafutali nabombi bahika kujongana najombi.
36Ndienu Gidioni ampwagila Sapanga, “Ana sakaka winhenga nepani naakombola Aizilaeli ngati hewapwaga, 37henu meka ngosi ji likondoo pai paapete inganu pamba. Ana kwiibia nu ulumi panani ja ngosi pena na pai papijiyongolota ngosi ana piibia pajomu nala niimanya gutei kundumi kwaakombo Aizilaeli ngati hegupwagiki.” 38Kwabi ahelahela, ndaba pajwajumuka kilabu jaki pulukela jwaminya masi gagaabia panani ja ngosi jela nu kutwelake bakuli. 39Gidioni ampwagila Sapanga, “Pepakoku wiinhyome. Nuguloba nongila mala jimu kabee. Nuguloba gunekakia ndumia ngosi jenze kulenge sindu sengi. Lakini henu nuguloba panani jangosi jenze pabia pajomu, lakini pai pabia nu ulumi.” 40Sapanga jwahenga ahelahela ikilu jela, ndaba panani ja ngosi kwabia kujomu na pai pabia nu ulumi.
Currently Selected:
Uamusi 6: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
