Uamusi 7
7
Gidioni jwaawesa Amidiani
1Yelubaali yaani Gidioni na akomana ngondu boti bababia pamu najombi bajumuka pulukela babeka kambi jabu kumosu pambipi ni kiliba saka Helodi, kambi ja Amidiani jabia upandi wa kasikazini ji ligomba pambipi ni katombi sa Mole.
2Bambu Sapanga ampwagila Gidioni, “Akomana ngondu bagubii nabu ndi bingi ngamaa kwangu kwaahenga baawesa Amidiani. Ili Aizilaeli bakipuna palongi jangu nu kupwaga atei kulioko beni. 3Henu waapwagila akomana ngondu boti kubanga mundu jokapi jojujogopa au jojubagaja juboka pikitombi sa Gileadi nu jubuja kunyumba jaki.” Ndienu Gidioni jwaalenga, na bandu elupu ishilini ni ibeli babuja kunyumba jwaigalia na bandu elupu komi pena.
4Bambu Sapanga ampwagila Gidioni, “Akomana ngondu haba akona bingi ngamaa. Henu waapelika kulosi nane niitenda kwaalenga kokoko. Mundu jokapi jonagupwagila, ‘Hajo jwiijenda pamu na wehapa jombi jiitenda kujenda. Lakini ana mbwagiki hajo ngajujendi pamu na wehapa, ngajiijendi na wehapa.’”
5Ndienu Gidioni jwaapelika bandu kulosi na Bambu Sapanga ampwagila, “Bandu babiilamba masi ngati jimbwa, waabeka kutali na bandu babiipega magoti kunywa masi.”
6Akomana ngondu babakunywa masi sukuteka kwa maboku gabu nu kulamba ngati jimbwa babia mia tatu. Lakini bangi boti babaigali bapega magoti kunywa masi.
7Bambu Sapanga ampwagila Gidioni, “Kupete akomana ngondu mia tatu haba babakunywa masi kukulamba ngati jimbwa, naakombula Aizilaeli na kwaahenga baawesa Amidiani. Lakini bangi bala boti abuja mu manyumba gabu.”
8Ndienu Gidioni jwajukua posu ja bababia atenda kuboka ni imbata na kwaatabuka abuja. Najombi jwaigalia na akomana ngondu mia tatu bala. Kambi ja Amidiani jabia upandi wabu wa pai.
9Ikilu jela Bambu Sapanga ampwagila Gidioni, “Boka gujenda mu makambi gabu, ndaba naguhenga waawesa. 10Lakini ana gutenda kujogopa, gujenda pamu nu ntumisi waku Pula. 11Hoku wiijowana gaapwaga, na wehapa wiipata makili gukuwesa kujenda kwaalapu.” Henu Gidioni jwajenda pamu nu ntumisi waki Pula mbaka paatama alonda ba zamu bi likambi la Amidiani. 12Akomana ngondu buku Midiani na Ahamaleki na akomana ngondu boa buku upandi golipiti lyoba bajagania kilapandu, babia bingi ngati halwa na ngamia yabu yanga kubalangika yabia ingi ngati nsangi ukumbwani.
13Gidioni pajwahika, anzowania mundu jumu ansimuli nzaki ndotu jaki ana, “Nalota ndotu. Nalota libumunda la shaili labilinguka mbaka ku likambi kwa Amidiani nu kulilapu lihema nuku lipendu pai kunani. Lihema lagoni pai.”
14Nzaki jwajibua, “Lijambu heli nga sindu sengi ila jilang goniogu upanga waka Nhizilaeli Gidioni mwana waka Yoashi jojuwe Bambu Sapanga anhengiki jaawesa Amidiani pamu na akomana ngondu baki boti.”
15Gidioni pajwajowana gaalandi kwi ndotu heji na maana angungamalia Sapanga. Ndi jwabuja ku likambi la Aizilaeli nu kupwaaga, “Nzumuka tubokaniaje ndaba Bambu Sapanga junnzangati mwaawesa alonda ba Amidiani.”
16Ndi jwaabagula akomana ngondu mia tatu bala mu makundi matatu, jwaapekia imbata ni ibega yanga na masi yeibii na haha yeinyaka mwotu. 17Jwaapwagila, “Nningalia na mwiihenga sapi ngati heniihenga panihika ku likambi. 18Paniipega imbata, nepani pamu ni likundi langu, mwaboha mwiipega imbata kuhuma kila upandi nukupwaga kwa sauti ngolongu, ‘Ndaba jaka Bambu Sapanga na kwa ndaba jaka Gidioni.’”
19Pakwahegalia pamahiku, Gidioni ni likundi laki la bandu mia jimu bahika pa mwisu wi likambi. Hogu wabia utumbuli wikipindi sa akomanangondu paabadilisana zamu yukulonda. Bapega imbata nu kukaju ibega yebabii naku. 20Makundi goha matatu gapega imbata nu kukaju ibega yabu. Mumaboku gabu gu ku mangega bakamwi miengi na mu maboku gabu guku malele bakamwi imbata nu kujemba koni ajamali kwa sauti ngolongu, “Upanga kwa ndaba jaka Bambu Sapanga na kwa ndaba jaka Gidioni!”
21Bajema kila mundu pandu paki kujiyongolota kambi ja Amidiani. Alonda boti ba Amidiani batenda kupesangana koni bakapega keleli.
22Akomana ngondu baka Gidioni pababia ajemba imbata yabu mia itatu, Bambu Sapanga jwaahenga Amidiani atumbulia kukomana beni kwa beni mu likambi. Babahigali sanga kuwa batenda kutilila ku Betishita kujenda ku Selela, mbaka ku mpaka wa Abeli Mehola pambipi na Tabati. 23Gidioni jaakema akomana ngondu bangi buku Izilaeli kuhuma ku likabila la Nafutali na Asheli na Manase boti baakema na kwaapwata Amidiani. 24Gidioni jwaatuma bandu mu nndema wi itombi ya Efulaimu bakatangasa, “Nhelala kwaapenga Amidiani nu kukamula ilosi na losi wa Yoludani mbaka Beti Bala.” Ndi akomana ngondu boti buku Efulaimu bahika nukugukamu losi lwa Yoludani mbaka Beti Bala. 25Baakamula aka kilongosi abeli buku Midiani, yaani Olebu na Zeebu. Bunkoma Olebu mu lilibu laka Olebu najombi Zeebu bunkoma pandu pukuminyi zabibu paka Zeebu pababia baapwatali Amidiani. Bunndetila Gidioni imutu saka Olebu na Zeebu kwii ja losi lwa Yoludani.
Currently Selected:
Uamusi 7: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
