Uamusi 20
20
Aizilaeli biliandaa ku ngondu
1Bandu boti buku Izilaeli, kuhuma kila pandu kutumbulii ku Dani mbaka ku Belisheba, pamu na bandu bu nndema guku Gileadi bakusanyiki ku Mizipa palongi jaka Bambu Sapanga. 2Aka kilongosi boti ba makabila ga Aizilaeli bahika palongi ja bandu baka Sapanga. Babii jumula alonda laki nsesi baabii na hindu yukukomane ngondu baajenda kwa magolu. 3Kipindi sehesi bandu bi likabila la Benyamini bajowana Aizilaeli bangi babia akusanyiki ku Mizipa.
Ndienu Aizilaeli bunndalukia mwanalomi nndawi jola, “Tupwagila kihakau sehesi sahengika bole?” 4Nndawi jola jojabii nndomi u libangu jola, jwaajibua, “Nepani ni libangu langu twahika ku musi uku Gibea, musi ulikabila la Benyamini ili tugonila kola ikilu. 5Lakini bandu ba musi uku Gibea bahika ikilu nukujiyongalota nyumba mo nabia ng'oni. Bapala kungoma, nu kulilimba libangu langu kwa makili mbaka latenda kuwa. 6Nepani najukua nntui waki, nunsekula sekula ipandi ipandi nukuipeleka kwa makabila goti guku Izilaeli, ndaba atei majambu gukusukisa na galia mu nndema uku Izilaeli. 7Henu mwa Aizilaeli mpwaganinya nukutemu.”
8Bandu boha pamu bajema nukupwaga, “Ngamundu jokapi kati jitu jojwiibuja ku lihema laki au kunyumba jaki. 9Henu lende ndi letwiihenga ku Gibea, twiipega gudugudu ili kumanya namuna ja kwaalapu. 10Twiihagula bandu komi mu kila likundi la bandu mia jimu kuhuma makabila goti ga Aizilaeli, bandu mia jimu mu kila bandu elupu jimu na bandu elupu jimu mu kila bandu elupu komi. Haba biibia ni lihengu la kwaalete posu bandu babibia ni lihengu la kwaalapu na bandu ba musi guku Gibea mu nndema uku Benyamini ndaba ju ubaja wabu nu kihakau seahengiki mu Izilaeli.” 11Ndi akomana ngondu boha buku Izilaeli bakusanyika kwa moju gumu kugulapu musi uku Gibea.
12Bandu ba makabila guku Izilaeli baatuma bandu kila pandu bi likabila luka Benyamini, koni bakapwaga, “Boo, ubaja boo gongo gogupiiti kwino? 13Henu mutupekia bandu haba abaja buku Gibea ili twaakoma nukuhoha kihakau kuhuma kwa Aizilaeli.” Lakini bandu bilikabila laka Benyamini ngasebaajowania alongu babu Aizilaeli. 14Ndienu Abenjamini bakusanyika ku Gibea kuhuma kila musi wabu ili kukomana na bandu buku Izilaeli. 15Bandu bi likabila la Abenyamini bakusanyika kuhuma mu misi jabu jengi, akomana ngondu elupu ishilini na sita baabi na hindu yukukomane, nabombi bandu ba musi uku Gibea baakusanya akomana ngondu mia saba banga kujogopa ngondu. 16Kati ja akomana ngondu haba babahaguliwa kwabia na bandu mia saba babatumia kuboku kwa mangenga, kila jumu jwawesa kuleke lilibu nukulenga mu majunzu sanga kukose. 17Nabombi Aizilaeli sanga kwaabalangi bandu baka Benjamini bakusanya akanalomi laki nsesi baatumi upanga boti babia baawesa kukomana.
Aizileli akomana na Abenjamini
18Aizilaeli bajenda ku Beseli kunndoba Bambu Sapanga ili amanya likabila lelilongulia kujenda kukomana na bandu bi likabila la Abenyamini.
Bambu Sapanga jwaapwaga, “Likabila la Yuda lilongulia hoti.”
19Ndi Aizilaeli bajenda kilabu jaki pulukela, babeka kambi jabu pambipi na musi uku Gibea.
20Aizilaeli baboka nu kujenda kukomana na bandu bi likabila laka Benyamini bijipanga kwa ndaba ja ngondu koni agulingali musi uku Gibea. 21Bandu bi likabila la Benyamini bapita kunza ja musi uku Gibea nu kukomana na Aizilaeli ni lisoba heli baakoma bandu elupu ishilini na abeli. 22Lakini Aizilaeli bilipekia moju, bilipanga kabee kukomana pandu pabilipanga lisoba lukutumbuliya. 23Kabula ja haga Aizilaeli bakweli ku Beseli bajenda kunndoba Bambu Sapanga mbaka pakamii. Ndi bunndoba Sapanga, “Boo, tujenda kabee twakakomana na alongu bitu bi likabila la Abenyamine?” Bambu Sapanga jwajibua, “Nzendania mwakakomana nabu.” 24Ndi lisoba la pili bandu buku Izilaeli bajenda kukomana na bandu bi likabila la Benyamini. 25Lisoba la pili lela bandu bi likabila la Abenyamini bapita ku Gibea na kwaalapu Aizilaeli na kwaakoma bandu elupu kumi na nani bababii ayobali kutumii mapanga. 26Akomana ngondu boti buku Izilaeli bajenda ku musi uku Beseli. Bapilakiya kola palongi jaka Bambu Sapanga koni alobalake nukupunga mbaka pakamii. Ndi bumpiikia Bambu Sapanga matambiku gukutini na matambiku gulukwali. 27Aizilaeli bajenda kunndoba Bambu Sapanga ku Beseli, kwa ndaba kipindi hesi Lisanduku li Lilaganu laka Bambu Sapanga labiya hoku, 28Fineasi mwana waka Eleazali, nsoko waka Aloni jwabia nngolu. Aizilaeli bumpwagila Fineasi bunndalukia Bambu Sapanga, “Boo, tujenda kabee kukomana naaka alongu bito, bandu bi likabila la Abenyamine?”
Bambu Sapanga jwaapwagila, “Nzendania. Kilabu nitenda kunhenga mwaawesa.”
29Ndi Aizilaeli baahia bandu kuyongalota musi uku Gibea.
30Ndienu Aizilaeli bajenda kukomana na bandu bi likabila laka Benjamini mu lisoba la tatu. Bilipanga kukomana na bandu ba musi uku Gibea ngati hebahenga pu utumbuli. 31Ndi bandu bilikabila la Abenjamini bapita nukujenda kukomana na Aizilaeli, Aizilaeli baboka ili kwaahuta Abenjamini ajenda kunza ja musi. Abenjamini batumbulia kwaalapu nakwaakoma bandu ngati selasini buku Izilaeli ngati ebahenga kipindi sumunyuma. Bangi baakoma mwiindela ngolongu jejijenda ku Beseli na jejijenda ku Gibea kumigonda. 32Akomana ngondu bilikabila la Abenjamini bapwaga, “Twaalapwi ngati kipindi sekipetiki.”
Lakini Aizilaeli bapwaga, “Twepani tutila ili kwaahuta mbaka tuhika kutali niindela ngolongu.” 33Ndienu akomana ngondu boti buku Izilaeli bahika ku Baali Tamali nukujema hapa bilipanga ili akomana. Kipindi sese akomana ngondu bangi buku Izilaeli bababiya atei kujoba upandi golijingi lyoba guku Gibea batenda kupiti. 34Na akomana ngondu bangi elupu komi buku Izilaeli baamanyiki kukomana sapi baatukaliya bandu buku Gibea. Elahika lisoba heli kwabiya na ngondu ngolongu, lakini bandu buku Benjamini ngasebanyiki ngati kukomeka kwabu kutei kuhika. 35Bambu Sapanga jwaawesa bandu bi likabila laka Benjamini palongi ja Aizilaeli. Aizilaeli baakoma bandu bi likabila laka Benyamini elupu ishilini nu nhwanu na mia jimu. Haba boti babakuwiki babia akomana ngondu babawesa kutumi hindu yukukomane. 36Ndi bandu bi likabila laka Benjamini babona asindwiki.
Aizilaeli hebawesa Abenjamini
Aizilaeli babuja mu nyuma ngati atenda kwaatila bandu bi likabila la Abenjamini, ndaba baahobalia ajabu babajobiki kugulapu musi uku Gibea hela ndi namuna Aizilaeli hebawesa. 37Bandu babaabekiki kuguhepale musi gola bapita nyatanyata nukugulapu musi uku Gibea na kwaakoma ku upanga boti bababia mola. 38Akomana ngondu buku Izilaeli na akomana bangi boti babajobiki bajetangini kuhenga nginyuli. Bajetangania kubanga babibia atenda kwahepale pabijingala mu musi biipambakiya mwotu nkolongu ni liyoi laki likwela kunani ngati likongobu, 39ndienu akomana ngondu buku Izilaeli bang'anambuka na kwaatukali akomana ngondu buku Benjamini bababia atenda kwaabenga. Kipindi sesela akomana ngondu bi likabila laka Benjamini babia baakomiki akomana ngondu ngati selasini buku Izilaeli nu kupwagani, “Twaalapwi ngati puutumbuli pala.” 40Lakini likongobu li liyoi lela palatumbulia kupiti pa musi, akomana ngondu bi likabila laka Benyamini pabalingalia munyuma jabu basangia kulibona liyoi lipita mmusi jabu. 41Ndi Aizilaeli bang'anumbuka na akomana ngondu bi likabila laka Benyamini bapata kiholu ndaba babona kuwa kwabu kuhegali. 42Ndienu bang'anambuka na kwaatila Aizilaeli kujenda ku lukoba, lakini ngondu jaaketani nu kulibona abi pikilanda ja makundi ga akomana ngondu buku Izilaeli na kila nkomana ngondu jojapitila kumisi jela batenda kunkoma. 43Aizilaeli baalapula bandu bi likabila laka Benjamini kila upandi, baapwataliya kuboka kumusi uku Noha mbaka upandi golipiti lyoba uku musi wa Gibea koni baakoma bandu bingi. 44Lisoba akomana ngondu elupu kumi na nani bi likabila la Benjamini bababia awesa kukomana ngondu sapi batenda kwaakoma. 45Akomana ngondu bangi bi likabila laka Benyamini bang'anambuka nu kutila kulukoba mbaka ku lilibu luku Lemoni. Bangi elupu nhwanu bakuwa mu indela ngolongu pababia atenda kutila. Aizilaeli baendalia kwaabenga kwa makili bandu bi likabila la Benjamini mbaka ku musi uku Gidomu na kwaakoma bandu elupu ibeli. 46Lisoba heli akomana ngondu boti bi likabila la Benjamini bababia baakomiki babia elupu ishilini nu nhwanu, babube babia akomana ngondu ba sapi baatumi saamboni hindu yukukomane.
47Lakini akanalomi mia sita bilikabila la Benjamini bawesa kutili kulukoba mbaka ku lilibu luku Limoni na batama kola kwa muda wa miei nsesi. 48Akomana ngondu buku Izilaeli baang'anumbukia bandu bangi bi likabila laka Benjamini na kwaakoma bandu boti pamu ni inyama na kila sindu sebikikolila homu. Na misi joti bijijosa mwotu.
Currently Selected:
Uamusi 20: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
