Kukomboka 23

Kubekwa kutali na bandu baka Sapanga

1“Mwanalomi jokapi joambotwi au joansekwi lihona laki ngakwiipaliki kujingii mu likundi la bandu baka Bambu Sapanga. 2Mundu jokapi jojusaliwi kunza ja ndoa ibeleku yaki ngakwiipaliki kujingi mu nsambi waka Bambu Sapanga hata mbaka mu kibeleku sa komi. 3Aamoni au Amoabu jokapi, ibeleku yabu yoti hata mbaka kibeleku sa komi, ngabiijetakewe kujingi mu likundi la bandu baka Bambu Sapanga, 4ndaba bakaniki kumpekee posu na masi pamwabii mwiindela kuhuma ku nndema uku Misili, kabee bumpekiya lupija Balamu mwana uka Beoli kuhuma kumusi uku Petoli ku Mesopotania ili kwatende yaambamba. 5Lakini Bambu Sapanga, Sapanga winu ngasejunzowani Balamu, jang'anambula yambamba kuba mbenge, ndaba Bambu Sapanga, Sapanga winu jutenda kumpala. 6Mwiijongana nabu wala kuhenga nabu ukosi nu lukwali mu kutama kwii kwoti.

7“Lakini mwaasuki Aedomu kwa ndaba bombi ndi alongu baku. Waasukila Amisili ndaba watemi ngati gungeni mu nndema waki. 8Kibeleku sa tatu sa bana babu babisaliwa kwabu, awesa kujingi mu likundi la bandu baka Sapanga.

Kulibeka likambi libiya sapi

9“Enzenda kungondu nukubeka likambi, kila jumu julihangalia jwiihenga sindu sokapi sesanhenga jubia jwanga kujetakeka palongi jaka Bambu Sapanga. 10Ana pikilanda jinu jubii mundu jokapi jojubii jwanga kujetakeka palongi jaka Bambu Sapanga kwa ndaba jukumpita imbeju ikilu, jwiipalika jupita kunza jilikambi nu kutama hoku. 11Lakini hekwihika pakamii jwiihoga masi, na lyoba palibia lijingi juwesa kukelabuka kulikambi.

12“Mwapatenga pandu kunza ji likambi pamwiiwesa kujenda kutunda. 13Nanamu mwiibiya na kagela kasoku mu hindu yaku, na haka mwiitumia kuhemba libomba kwa ndaba jukuyelale likelu linu. 14Likambi linu ndi kwiipalika libiya la sapi, ndaba Bambu Sapanga jujenda pikilanda jinu ili kundenda nukwaabeka abaja binu pai juulongosi winu. Henu mwanndeka jukibona sindu sokapi kipija pikilanda jinu nukuamu kung'anambuka nukundeka.

Mihilu jengi

15“Ana ntumwa jutili kwaku wehapa waankelabu kuka bambu waki. 16Mundeka jutama pikilanda jinu pandu pokapi pajupapala mu musi wokapi gojagusagula mwambone.

17“Mwiizalaeli jokapi, mwanalomi au mmbomba ngasejupalika hatakulenga kuba ngoni sukujenda kulumbali isapanga yengi. 18Lupija lokapi lolupatikana sukuhenga ugoni sukulumbali isapanga yengi, yiipelekwa mu Lihema la Sapi laka Bambu Sapanga, Sapanga winu, kulepe sindu segulagi, kwa ndaba mwanalomi au mmbomba jojubii ngoni sukuilumbali isapanga yengi ndi sibiya sindu sukusukisa kwaka Bambu Sapanga.

19“Wankopesa nndongu waku Mwiizalaeli sindu kukupala liba, wandepesa liba kwa ndaba ju kukopesa hela au posu au sindu sokapi sesuse bandu akopesa kwa liba. 20Guwesa kumpwagi nngeni julepila liba, lakini nndongu waku Mwizalaeli wanndepesa liba, najombi Bambu Sapanga, Sapanga waku, jagupengila kwa mahengu gaku goti gawihenga mu nndema gowijenda kutama. 21Egulagi sindu kwaka Bambu Sapanga, Sapanga waku, wiiselawesa kujitimisa ndaba Bambu Sapanga, Sapanga waku jitenda kukulaja, nanagu wibiya na mahakau. 22Lakini anagukotwiki kulagi sindu ngawikubi na mahakau. 23Ulihangaliya kutimisa sindu segulagi sukulogo pu ndomu waku, ndaba undagi Bambu Sapanga, Sapanga waku, sukupala wa mweti.

24“Anagupetiki mungonda ukunzilani waku umizabibu guwesa kula zabibu kadili mogwiwesa, lakini waitongoo zabibu nukuinyege mwikitonga saku. 25Ana gupetiki mu ngonda ukunzilani waku gogubii ni ilebi uwesa kutongo ilebi isokopi kukuboku kwaku na kula, lakini wiitola kijipi nukujipa ilebi yaki.

Currently Selected:

Kukomboka 23: MaBV

Highlight

Copy

Compare