Kukomboka 24
24
Kutalikana nu kujuku kabee mmbomba
1“Ana mwanalomi jujukwii mmbomba na mwenikatai jubweni ngaseampala ndaba jubweni kuka mmbomba hoju sindu sanga saasapi, henu mmbomba hoju anhandakia likalatasi lu kuntalika ampekia nukummbenga kunyumba jaki ndi mmbomba hoju juboka. 2Najombi ana jubokiki panyumba jaki juwesa kujenda nukujukuliwa na mwanalomi jongi. 3Ana mwanalomi jwapili hoju anzukwi nukunhandaki likalatasi lukutalikana nukumpeke nukummbenga kunyumba jaki au ana mndomi waki hoju jutei kuwa, 4henu mwanalomi jojwatumbulia jola ngasejupalika kabee kunzuku mmbomba jola ndaba bunhengiki kuba jwangakujetakeka palongi jaka Sapanga. Ana juhengiki hela Sapanga jutenda kusuki.
Mihilu jengi
5“Mwanalomi jojujukwi mmbomba masoba masokopi gagapetiki kwiijenda kukomana ngondu wala bampeke lihengu lokapi lengi bunndekakia kwa saka simu, ili jutama panyumba nukutogule nu nhwanu waki.
6“Mundu jokapi jwijujuku lilibu la pai au la panani lukuyagi kuba poni, kukuhenga hela kwibiya ngati jujuku womi waka mundu hoju.
7“Mundu jokapi ana anzibiki Nhizilaeli nzaki nu kunhenga kuba ntumwa waki au kunndombesa kuutumwa mundu hoju kupalika jukomika. Sukuhenga hela ndi mwiibiya mmboiki kihakau mu nndema winu.
8“Ana mundu gumpatiki ugonzu gu ukoma kupalika kuangali ngamaa nu kupwata malagalaki ga Alawi. Ngati henunndagalaki ndi hemwiipwata kukulingalaki.
9“Nkombuka Bambu Sapanga, Sapanga wii, heanhenga Miliamu hemwabia mwiindela kuhuma ku Misili.
10“Ana ukopisi wapambipi waku sindu sokapi, wiijingi kunyumba jaki kujuku poni. 11Unndendalia kunza na gunndeka mweni juguletila poni jeheji. 12Ana jombi ndi nhagu wiitama na poni heji ikilu kelukelu. 13Unkelabukia kila lisoba pakamii ili ikilu juwesa kuliyekale na kugupengee. Kuhenga hela ndi lijambu laamboni palongi jaka Bambu Sapanga, Sapanga wiino.
14“Wanndepa malepu masoku ntumisi nhagu na jojupalika kujangatiwa, jukubi Nhizilaeli au jumu jwaageni baatama mu misi jinu. 15Kila lisoba kabula lioba ngaselijingi unndepa malepu gaki wilisoba heli, ndaba jombi ndi nhagu na malepu haga ndi mwoju waki juhobale gagaga ili jwiika nukunndele Bambu Sapanga na wehapa wiikuba na mahakau.
16“Akatati na akamabu biikomeka kupete makosa ga bana babo, wala bana biikomeka kupete makosa ga akatati na akamabu babo. Kila mundu jwiikomika kupete makosa gaki mwene.
17“Mwiihenga ngati ekupalika kwaahenge ageni na bana akeba. Wala mwiijuku ingobu yaka mundu joawii alomi baki kuba poni. 18Nkombuka mwanganya mwabia mwaatumwa ku nndema uku Misili na Bambu Sapanga, Sapanga winu ankombula kuboka hoku. Henu numpeke lilagalaki hele.
19“Pannhusa ilebi yii kumatui nukujewa ilebi yengi momu, mwiibuja kuholo, mwaalekila ageni na akeba na akambomba baawii alomi babu ili Bambu Sapanga, Sapanga wii jaampengila mu mahengu gii goti. 20Ana ntongwi zeituni inu, mwikelabuki kutongo mu mambandi mala ja pili ila mwaalekila gani na akeba na akambomba baawii alomi babu. 21Hentondo zeituni mwiikelabuki kutondo zeituni yeiigali ila mwaalekila ageni na akeba na akambomba baawii alomi babu. 22Nkombuka kubanga mwanganya mwabii mwaatumwa ku nndema Misili, ndienu numpeke malagalaki ganga.
Currently Selected:
Kukomboka 24: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
