Kukomboka 20
20
Kujenda kungondu
1“Anampiti kungondu kukomana na akaabaja binu nu kuibona inyama yebiikema falasi na magali na akomana ngondu bingi ngani kuliku binu mwaajogopa. Ndaba Bambu Sapanga, Sapanga winu jojumpiya kundema uku Misili, jibiya pamu na mwanganya. 2Kabula jukutumbuli kukomana, nngolu jipitila palongo nakwapwagi akomana ngondu, 3‘Mwaakomana ngondu buku Izalaeli nzowania! Lelenu nzenda kungondu kukomana na akabaja baku. Mwiihola mu mioju jinu, wala mwiijogopa, au kuntisa, au kwaajogopa abaja binu, 4ndaba Bambu Sapanga, Sapanga winu jiijenda na mwanganya kunkomane kwa akabaja binu nukunhenga mwaawesa.’”
5“Akakilongosi baapwagila bandu, ‘Jubii mundu jokapi pamba jojusengiki nyumba inyai lakini ngasejuwaiki kunkabisi Sapanga jujilendaje? Jukelubuka kunyumba ili jiiwele kungondu na mundu jongi jijenda kutama nkati jaki. 6Boo, jubii mundu jokapi pamba jojupandiki mizabibu na ngase jutumbuli kula matunda gaki gukutumbuli? Jukelabuka kunyumba jiwele kungondu na mundu jongi kutumbuli kula matunda gaki. 7Boo, jubii mwanalomi jokapi pamba jojusumbi nukupia mali na jubii pambipi kujuku mmbomba? Jukelabuka kunyumba jwiiwele kungondu, na mwanalomi jongi kunzuku nsumba waki.’” 8“Akakilongosi biiendalia kwaalaluki bandu, ‘Boo, jubii pamba mundu jojubii nulujogopu mu mwoju jake? Jukelabuka kunyumba ndaba juwesa kwaahenga ajaki abiya nulujogopu mu mioju jabu ngati jwombi.’ 9Akaakilongosi ebibiya ajomuli kulonge na bandu, ndienu akalonda baalongua bandu.”
10“Kipindi pamwiijenda kukoma na bandu ba musi, ntumbulia kwaalaluki ana abii tayali kukomana au ngaseabi tayali. 11Bandu ba musi hogu anaapai lukwali nukulibeka mu ulongosi winu, ndienu bandu boti babii homu biitenda kuntumaki nu kuhenga mahengu gaganonwipi sakwaalasimisa. 12Lakini ana bandu ba musi hogu ngaseapai lukwali na mwanganya, nukukomana ngondu na mwanganya, ndienu mwaguyongulata musi wabu, 13na Bambu Sapanga, Sapanga winu jaahenga mwaawesa na mwaakoma ku upanga akanalomi boti, 14lakini akambomba na bana, ng'ombi na hindu yoti yeibii mu musi, nhwesa kujukuu yemwiikamwi kwa ndaba jinu mwabete, nanamu nhwesa kutumi hindu heyi yeyuye Bambu Sapanga, Sapanga winu jutei kumpeke. 15Hela ndi emwaahengila bandu ba misi joti jejibi kutali nu nndema gowibiya gwinu.” 16Lakini mu misi ju nndema goguwe Bambu Sapanga, Sapanga winu, jutei kumpekea, mwaakoma bandu boti ni inyama yoti. 17Mwaakoma tipitipi bandu boti Ahiti na Aamoli na Akanani na Apelizi na Ahivi na Ayebusi ngati Bambu Sapanga, Sapanga winu, ejunndagalakia, 18ana ngamwiihengi hela bombi bammbola mwanganya kuhenga mahengu goti gukusukisa gaguge biihenge isapanga yabu, nanamu mwiibia munhengi mahakau kwaka Bambu Sapanga, Sapanga winu.
19“Kipindi pamwaguyongalota musi sukukomana ngondu kwi kipindi kilasu, ili kugukamu mwiipengula mikongu ja matunda kwa mapengu, ndaba mwiiwesa kula matunda gaki. Boo, mikongu le ndi bando mbaka mujilapulaje? Nhwesa kula matunda gi mikongu heji ila mwiiseku. 20Hata hela nhwesa kuseku mikongu jengi janga ja matunda ili kutumi kugukamuli musi.”
Currently Selected:
Kukomboka 20: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
