Kukomboka 19
19
Misi jukutili
Esabu 35:9-34; Joshua 20:1-9
1“Kipindi Bambu Sapanga, Sapanga winu, ejiibiya jaakomiki bandu bu nndema gola goguwe jumpekee mwanganya na pamwiibiya mugukamwi nu kutama mu manyumba gabu, 2ndienu mwajitenga misi mitatu mu nndema gojampekia Bambu Sapanga, Sapanga winu, gubia winu. 3Kupalika kugubagana ndema jejampekia gojumpeke Bambu Sapanga, Sapanga winu pandu patatu, ndi nhagula musi gumu mu kilapandu gukutili. Mwilenganake indela ili bandu awesa kuhika hoku mu kila musi bila tabu. Ili mundu ana jukomiki nzaki juwesa kutili mu musi gumu kati ja misi je heji jubia mwomi. 4Mundu anajunkomiki nzaki sanga nauli, na jombi ngasejwabii mmbaja waki, juwesa kutili mu musi gumu kati ja misi mitatu heji, juwesa kuba mwomi. 5Tupwaga, mundu jojuwesa kujenda kukiholi nu nnzaki kutinya hanzu na jwombi kipindi sejuseku nkongu, libagu liwesa kuhopoka mu saka saki, nukunkoma nzaki jola, mundu hoju juwesa kutili mu musi gumu kati ji mitatu heji, ili juwesa kulama. 6Lakini ana kwakabii na musi gumu pe na wabii kutali, jojulepesa kisasi hoju ndaba jiinyela juwesa kumpwatali nu kunkamu nu kunkoma mundu hoju jojunhengiki nnzaki jukuwa, hata ngati ngasebuntemwi kukomeka na abeli haba ngasebabii nu ubaja wokapi pamwandi! 7Kwa ndaba heji nundagalaki ntenga misi jitatu.”
8“Kabee ngati Bambu Sapanga, Sapanga winu jwipanua mipaka ju nndema winu, ngati ejalapila akahoku binu, na jwombi jampekia nndema woti gojaalagila kwaapeke akahoku binu haba, 9Ana nhangali nu kupwata mihilu aje joti jenundagalaki lelenu, nukumpala Bambu Sapanga, Sapanga winu, nukujipwata masoba goti indela jaki, ndienu, mwiijonzukia kabee misi jengi mitatu, 10ili mundu jwanga nu ubaja jiikomeka mu nndema winu goguwe Bambu Sapanga, Sapanga winu, jwampekia gubiya winu ili bandu biikuba na lawama juku kukoma.”
11“Lakini anamundu jubii nu ubaja nu nnzaki, na juhamu kuhepale nukukoma, alapu jutili kati ja musi gumu kati ja misi heji, 12pala ndi aseja ba musi hogu baatuma bandu bu mpiya hoku nukukabisi kuka mundu jojulepesa kisasi kwa ndaba jukukoma. 13Mwaambone ikia, ila mwaguhenga ubaja gukukoma mundu jwanga nu ubaja gujomuka mu nndema uku Izalaeli, ili nhwesa kutama su lukwali.”
Mipaka japa mwandi
14“Wiiboa lilibu lu mpaka wa bapambipi baku, goguwe bugubekiki pa mwandi mu nndema gojwampekia Bambu Sapanga, Sapanga winu gubia winu.”
Malagalaki kwa babagajowana nukugabona
15“Mundu jumu jojujowini nukubona likosa laka mundu ngajwiitosi mundu hoju kunzowane kajika ili mundu jojuhengiki makosa kutemuliwa. Ndi kupalika abia bandu abeli au atatu baabweni nukujowana ndi baapalika kwaajowane ili kutemu. 16Anajubii jojupwaga isoli kubanga ambweni nu kunzowane mundu jokapi kupete likosa lokapi, 17ndienu jwombi na jojuntaki jola ndi biijenda pandu pukunndumbali Bambu Sapanga, palongi jaka Agolu na baatemu bababii mu lihengu kipindi hesi, 18baatemu balisungusa sukulihangali ligambu heli ana mundu jojugabweni nu kugajowana julongiisoli antaki nzaki kwiisoli, 19ndienu mwanhengila ngati ejwapala kunhenge nndongu waki. Hela ndi emwaguhenga ubaja ukotuka pikilanda jinu. 20Na bombi bandu bangi biijowana nukujogopa, nu ubaja ngati ago ngagwiihengeki kabee kwinu. 21Mwaabonee ikia bandu ba namuna heji. Azabu jabu jiibia womi wiilepika kwa womi na liu kwa liu na linu kwalinu na kuboku sukuboku nu kugolu sukugolu.”
Currently Selected:
Kukomboka 19: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
