Kukomboka 18

Seapalika kupata Agolu

1“Agolu boti Alawi, babube ndi likabila loti la Alawi nga biikubi na pandu wala kwaapeke pandu punndema pabiya pabu mu nndema uku Izalaeli. Bombi biikula pandu pi litambiku laka Bambu Sapanga. 2Wala nga biikubi nu nndema wabu kati ja alongu babu, Bambu Sapanga ndi lipungu labu ngati ejalagila.”

3“Heli ndi libia lipungu la Akagolu kuhuma kwa bandu babiipiya litambiku la ng'ombi au lilikondoo, baampekea agolu kugolu kukulongi ni inyama jikimutu nu utumbu. 4Mwaapekia pandu pukutumbuli pi ilebi yinu na divai na mahuta ginu na mangoma gukutumbuli ga makondoo ginu. 5Mu makabila ginu goti, Bambu Sapanga jilihagwi likabila la Lawi luntumakia ngati agolu masoba goa ganga na mwisu.”

6“Ana Ndawi jokapi sukupala mweni juwesa kuboka mu musi wokapi gola gwa Aizalaeli nukujenda pandu pala Bambu Sapanga pajupasagwi, 7ndi juwesa kuhenga lihengu ngati nngolu waka Bambu Sapanga, Sapanga waki, ngati Alawi bangi bala baahenga mahengu palongi jaka Bambu Sapanga. 8Biipata mapungu gabu gagalengana na bangi, hata ngati abi na mali kupete hindu yealombesa alongu babu.”

Kuhenga mahengu gagasukisa

9“Emwiihika mu nndema gola goguwe Bambu Sapanga, Sapanga winu jwampekia, mwiijiga kuhenga mahengu mabaja ga bandu baatama mu milema heji. 10Jwiikuba mundu jokapi pikilanda jinu jojantinia mwanamundu mwanalomi au mmbomba pa mwotu, wala jojulondola wala jojulinga ipindi, 11wala nhabi wala joannzambaki nzaki sukukonga muhundu, wala jojukemale majini, wala jojaagungamali bandu baakuwiki wala jojaaloba bandu baawii. 12Mundu jokapi jojuhenga mahengu ngati haga ndi ansukisa Bambu Sapanga na kwa ndaba ja majambu haga gukusukisa, Bambu Sapanga, Sapanga winu, jaabenga bandu ba namuna heji palongi jinu. 13Mwiikuba na makosa sukuhenga majambu gagunsukisa Bambu Sapanga, Sapanga winu.”

Lilagi lukunndeta nndota

14“Bandu bi milema aje bamwaabenga baajowanee ngani baahenga majambu gikihabi nu kulondoo, lakini Bambu Sapanga, Sapanga winu, ngasejunzetake mwanganya nhenga hela.”

15“Bambu Sapanga, Sapanga winu jandetila nndota jojubi ngati nepani kuhuma pikilanda jinu, na mwanganya mwanzowania hoju.” 16“Hesi ndi senundoba Bambu Sapanga, Sapanga winu, ku Holebu kola, lisoba lela pamwaketangana nu kupwaga, ‘Twiijowanake kabee sauti kwaka Bambu Sapanga, Sapanga witu, wala twagubona kabee mwotu nkolongu ago, ili twiikuwa!’ 17Najombi Bambu Sapanga jambwagila, Alongi sakaka. 18Nanhagulia nndota ngati wehapa kuhuma pikilanda ja alongu babu, nagajegala malobi gangu mu nndomu waki, na jombi janndandila goti gananndagalakia. 19Jokapi jola jwanga kujowane malobi gajwiilongila nndota jola, nepani na mweti nitenda kundapula. 20Lakini nndota jokapi jojwiipwaga kubanga jujopiki malobi kuhuma kwangu nepani naakati nepani ngasenumpwagi sindu au ndota jojwiipwapa kwi liina liisapanga yengi kupalika jukomika.”

21“Lakini mwanganya nhwesa kupwaga, ‘Twiiwesa bole kulimanya lilobi langa kulonge Bambu Sapanga?’ 22Ana nndota jupwagiki sindu kwi lihina laka Bambu Sapanga na sindu hesi ngasekihengiki au ngase kikuba sakaka, lijambu heli ngasejupwagiki Bambu Sapanga, nndota jupwagiki sukumanya mwene, nanamu mwiijogopa kwa ndaba ji lijambu heli.”

Currently Selected:

Kukomboka 18: MaBV

Highlight

Copy

Compare