Kukomboka 12
12
Pandu pakajika pukulumbali
1“Jenze ndi mihilu na malagalaki gaguge mwagahenga mu nndema goguwe Bambu Sapanga, Sapanga jwa akahoku binu, jumpeki gubia winu masoba goti gukutama kwinu mu nndema hogu. 2Nhalabana ngani pandu poti paalumbali bandu isapanga yabu kwiitombi ilasu, mututombi na pai ji mikongu mikolongu jejibi na manyai mabei. 3Ntunula tipitipi mesa yabu yukupiiki matambiku nu kubombulane ako mipendi jambu. Ntinia kwa mwotu imong'umong'u yabu ya Ashela nu kuisekulana imong'umong'u yabu yukubasa nu kuliputa liina labu pandu pabu.
4“Wala mwandumbali Bambu Sapanga, Sapanga winu, ngati bombi healumbali. 5Ila pe mwiijenda kulumbali papupe Bambu Sapanga, Sapanga winu, pajapahagula mu makabila gi goti, ili kulibeka liina laki na pandu pukutama, hoku ndi komwiijenda. 6Hoku ndi mwiipelaka matambiku ginu gukutinia na matambiku ginu na zaka yinu yemwimbikia, matambiku ginu gukulagi, na matambiku gukupia sukupala ni ibeleku yukutumbuli ya ng'ombi na makondoo ginu. 7Hoku mwiikula palongi jaka Bambu Sapanga, Sapanga winu, na mwiitogulia mwanganya pamu na bandu bu nnyumba jinu kwa ndaba jukupata majambu gaamboni kojumpengila Bambu Sapanga, Sapanga winu.
8“Mwiihenga ngati etuhenga sajenu, kila mundu ngati ejupala kuhenga mweni, 9ndaba mwakona ngasenzingi mu nndema gojumpeke, Bambu Sapanga, Sapanga winu, komwiitama kulukwali. 10Lakini pa mwiilobuka losi luku Yoludani nu kutama mu nndema goguwe Bambu Sapanga, Sapanga winu, jampekia kuba gwiinu, na pajaanhenga mpomulia sulukwali na bansumbu abaja binu babunyongulata. 11Ndienu, pandu pala Bambu Sapanga, Sapanga winu, pajwapahagula ili lihina laki litama, hapu ndi pamwiipelika kila sindu senundagalaki matambiku ginu gukutinia na matambiku ginu, zaka yinu na matambiku ginu gukulagi kumpiiki Bambu Sapanga. 12Hoku mwitogulia palongi jaka Bambu Sapanga, Sapanga winu, mwanganya pamu na banabinu akanalomi na akambomba, na bandu bilikabila la Lawi baatama mu misi jinu, ndaba bombi ngaseabii na pandu pabu pbeni pa baapeki kuba pabu. 13Mwililingalia mwiipiya matambiku ginu gukutinia pandu pokapi pamupabona, 14ila pe pandu pajapahagwi Bambu Sapanga mu likabila limu kati jinu. Hapu ndi pamwiipiya matambiku ginu gukutinii, na ndi pamwanhengila majambu goti gajundagalakia.
15“Lakini nhwesa kusinza na kula inyama hii pokapi pamwiitama. Nhwesa kula inyama ingi kulengana na Bambu Sapanga, Sapanga winu, jejumpeki, kulengana na ejanhwesisa Bambu Sapanga. Bandu boti babi sapi au apija awesa kula inyama heji, ngati enkula inyama ja holoku au inyama ja mbabala. 16Lakini mwiikula mwai wi inyama heyi, mugujitala mwai hogu puluhombi ngati masi. 17Mwiikula hindu aye pamwiitama. Zaka yiilebi yinu, wala ya divai yinu, wala ya mahuta ginu, wala yiibeleku yukutumbuli ya ng'ombi au makondoo ginu, wala matambiku ga nazili au matambiku ginu gukupia sukupala wala matambiku gangi. 18Mwiikula hindu heyi palongi jaka Bambu Sapanga, Sapanga winu. Mwiikula mwanganya pamu na bana binu akanalomi na akambomba, atumisi binu akanalomi na akambomba, na bandu bi likabila la Lawi baatama mu misi jinu. Mpalika kutogule palongi jaka Bambu Sapanga, Sapanga winu kwa kula sindu semwiibeka mumaboku jii. 19Kabee mpalika mwaajewa bandu bi likabila la Lawi masoba goti gamwiitama pu nndema jinu.
20“Bambu Sapanga, Sapanga winu, pajwagujonzukia nndema winu, ngati ejalagila nanamu mwiipwaga, ‘Tupala kula inyama,’ kwa ndaba mpala kula inyama, nhwesa kula inyama kiasi sokapi sempala. 21Ndienu, pandu pajihagula Bambu Sapanga, Sapanga winu, jwalibeka lihina laki, ndi pala nhwesa kusinza ng'ombi au likondoo lokapi lelule Bambu Sapanga jutei kumpeke, ngati enundagalakia na nhwesa kula kiasi sokapi si inyama heji, ngati anambii mu misi jinu. 22Mwiikula inyama heji ngati enkula ja holoku au jikinyama sa mbabala. Mundu jokapi juwesa kula, jwaasapi au mpija. 23Ila pe nndingalia mwiikula mwai, ndaba mwai ndi womi, ndienu mwiikula womi pamu ni inyama. 24Mwiikula mwai hogu ila pe mugujitala pai ngati masi. 25Mwiikula mwai, mwanganya ni ibeleku ili majambu gii giijenda sapi, ndaba mwiibiya nhenga gamboni palongi jaka Bambu Sapanga. 26Hindu ye biibiki kwa ndaba jaka Sapanaga yemwiipiya pamu na matambiku ginu ga nazili, mwaijukua nukuipeleka pandu pajwapahagula Bambu Sapanga. 27Pala, mwiipiya matambiku gukutinii inyama na mwai, pandu paasengiki pukupiiki matambiku paka Bambu Sapanga, Sapanga winu, mwai wikinyama hesi mwiimisi panani ja pandu pukupiiki matambiku pala, ila pe nhwesa kula inyama jaki. 28Mpalika kukamu malobi haga ganundagalaki ili majambu gi gunzendila sapi mwanganya ni ibeleku yinu yoti, kwa ndaba mwiibiya nhenga gamboni na gagajetakewa palongi jaka Bambu Sapanga, Sapanga winu.
Kulakali kuigungamali imong'omong'o
29“Bambu Sapanga, Sapanga winu, pajajomula kwaakome kutali bandu bi milema jejabii palongi jinu, milema jenzenda kujibenga nukujipia ili ntama mwanganya mu nndema wabu, 30ndingalia mwalijingisa mu ntaba sakwapwata bandu haba baada jakakoma palongi jinu. Mwiihangajika kuimanya isapanga yabu koni mpwaga, ‘Bandu bi milema aje biilumbalia bole isapanga yabo? Ili na twepani tuilumbalia helahela.’ 31Mwandumbali hela Bambu Sapanga, Sapanga winu, ndaba kila sindu sukusukisa sesuse Bambu Sapanga ngasejwikipala, bombi biihengi isapanga yabu, hata baajosiki pa mwotu bana babu akanalomi na akambomba, ili kuipiiki litambiku isapanga yabu.
32“Mpalika kuhenga kila sindu senundagalaki, mwiijonzuke sindu wala kupungusa sindu.
Currently Selected:
Kukomboka 12: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
