Kukomboka 10
10
Musa jujopa kabe mihilu komi
Kuboka 34:1-10
1“Ndienu, Bambu Sapanga jambwagila, ‘Hongula ibau ibeli ya malibu ngati yu kutumbuli yela ni lisanduku li imbau, ndi guhika kwangu nepani kunani kukitombi kongo, 2nanepani niiandika malobi goti ganabiya nagaandiki muibau yewitunula, na kabee wiibeka ibau heyi mu lisanduku.’
3“Ndipala, nalenganakia lisanduku sukutumi imbau yu nkongu gobugukema mshita ni ibau ibeli ya malibu ngati yukutumbuli yela, nakwela nayu kukitombi. 4Bambu Sapanga jaandika mu ibau mola malobi galaga ngati ga mwandi gala. Mihilu komi jeampekia mwanganya pajalongila kuhuma pikilanda ja mwotu lisoba letwaketangana pamu. Ndi Bambu Sapanga jambekia ibau ibeli heyi. 5Nang'anambuka, nukuhuluka kuhuma kukitombi, ngati Bambu Sapanga ejanagalakia, niibeka ibau yela mu lisanduku lenabia nililenganakii, ni ibii nkati ji lisanduku heli, ngati Bambu Sapanga ejanagalakia.”
6Aizalaeli babia mu sapwali kuhuma mu iliba ya bandu buku Yaakani mbaka ku Mosela. Hapu ndi Aloni jatenda kuwa, na batenda kuntaga. Eleazali mwanamundu, jajukua napwasi jaki ngati nngolu. 7Kuboke hapu babia nsapwali mbaka ku Gudigoda, nu kuboke ku Gudigoda mbaka ku Yotibata, pandu papabi nu tulosi twingi twa masi. 8Kipindi hesi Bambu Sapanga jaahagula bandu bi likabila la Lawi abia baatoto lisanduku lililaganu laka Bambu Sapanga, antumakia ngati agolu nu kwaapenge bandu kwi liina laki mbaka lelenu. 9Ndaba bandu bi likabila la Alawi ngasebabii na pandu pabaapekia pabia pabu pamu na kaalongumundu, sebajopa ndi isima pena ya kuba akagolu baka Bambu Sapanga, ngati Bambu Sapanga, Sapanga witu, ejalagila.
10“Natama kukitombi kwa masoba alubaini, ikilu na muhi ngati pamwandi. Bambu Sapanga janyowania kabee mala jengi na jajetakia kubanga ngajunkomi mwanganya. 11Ndienu jambwagila, ‘Guboka guendalia na sapwali jaku jukwaalongosa bandu ili awesa kujingi nu kujijuku gubia gwabu nndema gonaalapila akahoku binu kubanga niitenda kumpeke.’
Sejupala Bambu Sapanga
12“Henu, Aizalaeli Bambu Sapanga, Sapanga winu jupala kike kwinu mwanganya, ila pe kundumbali Bambu Sapanga, Sapanga winu nukujipwata indela jaki nu kumpala nu kutumakila Bambu Sapanga, Sapanga winu, kwa mioju jinu joti na kwa loho yinu yoti, 13nu kujikamu mihilu na malagalaki gaka Bambu Sapanga ganumbeke lelenu, ili majambu gii gunnzendila sapi? 14Linga kunani hata kunani ju kunani ngani ndi mali gaki Bambu Sapanga, Sapanga winu, nndema na hindu yoti yeibii homu ndi mali gaki. 15Kabee Bambu Sapanga jwaapala akahoku binu ngani, junhagula mwanganya mo mmbii ibeleku yabu ili nkuba mwabandu baki badala ja bandu bangi boti, ngati ekubi lelenu. 16Henu, kutumbuli lelenu munzowania Bambu Sapanga, wala mwiikuba ni ing'omu kabee. 17Ndaba Bambu Sapanga, Sapanga winu, ndi Sapanga jwi isapanga na Bambu wa aka bambu jwombi ndi Sapanga nkolongu, na jojujogopeka, ngasejupendale wala ngasejujopa lushwa. 18Jwaakengale bandu banga na atati wala amabu na akambomba baawii akaalomi babu, na kwaapeke posu ni ingobu. 19Mwaapala ageni ndaba mwanganya nanamu mwabii mwa ageni ku nndema uku Misili. 20Mundumbalia Bambu Sapanga, Sapanga winu, muntumakia kajika jaki nukujongana naku nu nndapa kwi lihina laki. 21Jombi ndi jompalika kunndumbali, ndi Sapanga winu jojunhengi majambu makolongu haga na gukutisa gamugabona kwa mihu ginu mwabete. 22Akahoku binu pabajenda ku nndema uku Misili, babia bandu sabini pena, lakini sajenu Bambu Sapanga, Sapanga winu, junhengiki kuba mwa bingi ngati ndondu yukunani.
Currently Selected:
Kukomboka 10: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
